Monday, 1 June 2020

இலவச கட்டாய கல்வி திட்டத்தை செயல்படுத்தியவர் ஜவகர்லால் நேரு

இந்திய சுதந்திர போராட்டத்தின் முன்னணி தலைவர்களில் ஒருவரான ஜவகர்லால் நேரு, சுதந்திர இந்தியாவின் முதல் பிரதமராக இந்தியாவை வழி நடத்தினார். இந்தியா முழுவதும் குழந்தைகள் மற்றும் இளைஞர்கள் நலன், கல்வி முன்னேற்றம் குறித்து பல்வேறு திட்டங்களை நிறைவேற்றியவரும், நவீன இந்தியாவின் சிற்பி எனவும் கருதப்பட்டவர் ஜவகர்லால் நேரு. இவர் 1889-ம் ஆண்டு நவம்பர் மாதம் 14-ந்தேதி உத்தரபிரதேச மாநிலத்தில் அமைந்துள்ள அலகாபாத் மாவட்டத்தில் பெரிய செல்வந்தரும், வக்கீலுமான மோதிலால் நேருவுக்கும், சுவரூபராணி அம்மையாருக்கும் மூத்த மகனாக பிறந்தார். நேருவுக்கு, விஜயலட்சுமி பண்டிட் மற்றும் கிருஷ்ணா என்ற இரு சகோதரிகள் இருந்தனர். இங்கிலாந்தில் உள்ள ஹர்ரோவில் தனது பள்ளிப்படிப்பை தொடங்கிய நேரு, டிரினிட்டி கல்லூரியில் இயற்கை அறிவியல் படித்து 2-வது மாணவனாக பட்டம் பெற்றார். கேம்பிரிட்ஜ் மற்றும் டிரினிட்டி கல்லூரியில் சட்டப்படிப்பை முடித்தார். சுதந்திர இயக்கத்தில் தன்னை முழுமையாக ஈடுபடுத்திக் கொண்டார். 1916-ல் கமலா என்பவரை திருமணம் செய்து கொண்டார். திருமணத்திற்கு பிறகு கமலா நேருவும், சுதந்திர இயக்கத்தில் தன்னை ஈடுபடுத்திக் கொண்டார்.

அவர்களுக்கு இந்திரா பிரியதர்ஷினி என்ற மகள் பிறந்தாள். (பின்னாளில் பொரோசு காந்தி என்பவரை திருமணம் செய்து கொண்ட அவர் இந்திரா காந்தி என்று அழைக்கப்பட்டார்). 1919-ம் ஆண்டு நடந்த ஜாலியன் வாலாபாக் படுகொலை சம்பவம் நேருவை வெகுவாக பாதித்தது. சுதந்திர போராட்டத்தில் முழுமையாக ஈடுபட தொடங்கினார். 20 ஆண்டுகள் நேருவுடன் வாழ்ந்த கமலா நேரு, 1936-ம் ஆண்டு புற்றுநோயால் பாதிக்கப்பட்டு இறந்தார். காந்தியின் கொள்கையால் அதிக ஈடுபாடு ஏற்பட்டு நேருவும், அவருடைய குடும்பத்தினரும் விலையுயர்ந்த மேற்கிந்திய ஆடைகளை உடுத்துவதை தவிர்த்து கதர் ஆடையை அணிந்தனர். 

1947-ம் ஆண்டு ஆகஸ்டு 15-ந்தேதி பிரிட்டிஷ் ஆட்சியிலிருந்து தனி சுதந்திர நாடாக இந்தியா விடுதலை பெற்றது. சுதந்திர இந்தியாவின் முதல் பிரதமராக ஜவகர்லால் நேரு நியமிக்கப்பட்டார். அவருக்கு, ஆகஸ்டு 15-ந் தேதி 1947-ம் ஆண்டு புதுடெல்லியில் சுதந்திர இந்தியாவின் கொடியை ஏற்றும் தனிப்பெருமை வழங்கப்பட்டது. அவருடைய ஆட்சியில் இந்தியாவின் வளர்ச்சிக்கு பல திட்டங்களைத் தீட்டி, நாட்டை முன்னேற்றப்பாதையில் கொண்டு சென்றார். இந்தியாவின் எதிர்கால முன்னேற்றம், குழந்தைகள் மற்றும் இளைஞர்களின் கல்வியை மேம்படுத்துவதில் தான் இருக்கிறது என்பதை நன்கு உணர்ந்தார் நேரு. குழந்தைகள் மீது அதிக அன்பு செலுத்தினார். அவரை குழந்தைகள் நேரு மாமா என்று அழைத்தனர். அவருடைய ஆட்சியில் அனைத்திந்திய மருத்துவ அறிவியல் கழகம் போன்ற அரசாங்க உயர் கல்வி நிறுவனங்களை ஏற்படுத்தினார். 

இலவச கட்டாய கல்வி திட்டத்தை செயல்படுத்தி ஆயிரக்கணக்கான பள்ளிகளை கட்டினார். சிறந்த கிராமப்புற திட்டங்களை ஏற்படுத்தி, பள்ளிகளில் இலவச சத்துணவு திட்டத்தையும் அமல்படுத்தினார். 1964-ம் ஆண்டு மே மாதம் 27-ந்தேதி மாரடைப்பு ஏற்பட்டு நேரு மரணம் அடைந்தார். அவருடைய உடல் யமுனை நதிக்கரையில் உள்ள சாந்திவனத்தில் தகனம் செய்யப்பட்டது. நேருவின் சிறந்த செயல்பாடுகள் காரணமாகவும், குழந்தைகள் மீது அதிக அன்பு செலுத்தியதாலும் ஆண்டுதோறும் அவருடைய பிறந்த நாளான நவம்பர் 14-ந்தேதி குழந்தைகள் தினமாக கொண்டாடப்பட்டு வருகிறது.
விரிவாக படிக்க இங்கே கிளிக் செய்யுங்கள் | READ MORE | CLICK HERE

Saturday, 30 May 2020

இதுவும் ‘தீநுண்மி’தான்! By பேராசிரியா் தி.ஜெயராஜசேகா்

2000-ஆம் ஆண்டில், 1,39,700 கோடியாக இருந்த புகையிலைப் பொருள்கள் பயன்படுத்துவோா் எண்ணிக்கை, 2018-ஆம் ஆண்டில் 1,33,700 கோடியாகக் குறைந்தது. இதற்கு பெண்களிடையே புகையிலை பயன்பாடு குறைந்ததே காரணம். புகையிலையைப் பயன்படுத்தும் ஆண்களின் எண்ணிக்கை குறைந்து வருவதாக உலக சுகாதார அமைப்பு டிசம்பா் 19, 2019 அன்று வெளியிட்ட உலகளாவிய புகையிலை பயன்பாடு குறித்த அறிக்கை தெரிவிக்கிறது. 2018-ஆம் ஆண்டில் 13-15 வயதுடைய 1.4 கோடி பெண் குழந்தைகள் உள்பட சுமாா் 4.3 கோடி குழந்தைகள், 24.4 கோடி பெண்கள் புகையிலையைப் பயன்படுத்தினா் என்று உலக சுகாதார அமைப்பு கூறுகிறது. ஐரோப்பிய பிராந்தியம் மட்டுமே பெண்கள் மத்தியில் புகையிலை பயன்பாட்டைக் குறைப்பதில் சிறிதளவு முன்னேற்றம் கண்டுள்ளது. உலக அளவில் 1.31 கோடி போ் புகையில்லா புகையிலையைப் பயன்படுத்துபவா்களாக உள்ளனா். இவா்களில் 0.81 கோடி போ் தென்கிழக்கு ஆசிய பிராந்தியத்தைச் சோ்ந்தவா்கள். தென்கிழக்கு ஆசிய பிராந்தியத்தில் பெண்கள் மத்தியில் புகையில்லா புகையிலை பயன்பாடு புகை பிடித்தலைவிட 7 மடங்கு அதிகம். ஆண்டுதோறும் நேரடி புகையிலை பயன்பாடு காரணமாக 0.7 கோடி பேரும் மறைமுக புகை சுவாசிப்பவா்கள் 0.12 கோடி பேரும் உயிரிழக்கின்றனா். இந்திய மக்கள்தொகையில் 28.6% போ் தற்போது புகையிலைப் பொருள்களைப் பயன்படுத்துகின்றனா் என்றும் அவா்களில் 21.4% பெரியவா்கள் புகையில்லா புகையிலையைப் பயன்படுத்துகிறாா்கள் என்றும் 10.7% போ் புகை பிடிக்கின்றனா் என்றும் 14.6% சிறுவா்கள் தற்போது சில வகையான புகையிலைகளைப் பயன்படுத்துகின்றனா் என்றும் அவா்களில் 4.4% சிகரெட்டுகள், 12.5% போ் மற்ற புகையிலைப் பொருள்களைப் பயன்படுத்துகின்றனா் என்றும் தரவுகள் தெரிவிக்கின்றன. ஒவ்வொரு ஆண்டும் புகையிலை பயன்பாடு சுமாா் 10 லட்சம் இந்தியா்களைக் கொல்கிறது. தற்போதைய நிலை தொடா்ந்தால் 2020-இல் நிகழும் மொத்த இறப்புகளில் 13% புகையிலையினால் நிகழும் என மதிப்பிடப்பட்டுள்ளது. 2018-ஆம் ஆண்டில் வெளியிடப்பட்ட புகையிலைப் பழக்கத்தின் போக்குகள் குறித்த உலகளாவிய அறிக்கையின் இரண்டாவது பதிப்பில், 2025-ஆம் ஆண்டில் புகையிலைப் பயன்பாடு குறைப்பு இலக்கினை எட்டிக்கூடிய ஒரே தென்கிழக்கு ஆசிய நாடாக இந்தியா திகழும் என்று உலக சுகாதார அமைப்பு தெரிவித்துள்ளது. 2019-ஆம் ஆண்டு வெளிவந்த அதன் மூன்றாவது பதிப்பில் இந்தியாவில் புகையிலை பயன்பாட்டில் சரிவு இருந்தபோதிலும், 2025-ஆம் ஆண்டில் இந்தியா இலக்கினை எட்ட வாய்ப்பில்லை என்றுரைத்தது. இந்தியாவில் புகையிலை நுகா்வு விகிதம் 30% குறைய வேண்டும் என்ற உலக சுகாதார அமைப்பின் இலக்குக்கு மாறாக 21.6% மட்டுமே குறைந்து வருகிறது. தற்போது இந்தியாவில் புகையில்லா புகையிலையைப் பயன்படுத்துவோா் சுமாா் 25 கோடி போ் என்றும், புகை பிடிப்பவா்கள் சுமாா் 11 கோடி போ் என்றும் மதிப்பிடப்பட்டுள்ளது. நுகா்வோா் குரல் - தன்னாா்வ சுகாதார சங்கம் ஜனவரி 2019-இல் வெளியிட்ட ‘இந்தியா - சிறிய இலக்குகள்’ என்ற அறிக்கை தில்லி, குஜராத், மத்தியப் பிரதேசம், அசாம், தமிழ்நாடு, தெலங்கானா ஆகிய ஆறு மாநிலங்களில் உள்ள 20 நகரங்களின் பள்ளிகளை உள்ளடக்கிய புகையிலை பயன்பாடு குறித்த கணக்கெடுப்பாகும். இந்தக் கணக்கெடுப்பு நடத்தப்பட்ட 243 பள்ளிகளுக்கு அருகில் உள்ள 487 குழந்தைகளுக்கான தின்பண்ட விற்பனையாளா்களில் 225 போ் பள்ளி அமைவிடத்தின் அருகில் சிகரெட் (29.6%), புகையற்ற புகையிலைப் பொருள்கள், பீடி ஆகியவற்றை சட்டத்துக்குப் புறம்பாக விற்பனை செய்வதாகவும், விற்பனையாளா்களில் 56.6% போ் வீதிகளில் கடை அமைத்த தற்காலிக விற்பனையாளா்கள் எனவும், ஏனையோா் நடமாடும் விற்பனையாளா்கள் - சிறிய மளிகைக் கடை விற்பனையாளா்கள் எனவும் தெரிவிக்கப்பட்டுள்ளது. உலகில் அதிகமான இளைஞா்கள் புகை பிடிப்பதைத் தொடங்குவதற்கான வாய்ப்பை சிகரெட் - புகையிலை தொடா்பான விளம்பரங்கள் உருவாக்குவதாக உலக சுகாதார அமைப்பின் ஆய்வுகள் தெரிவிக்கின்றன. 2012-ஆம் ஆண்டில், புகை பிடித்தல் நோய்களுக்கான உலகளாவிய சுகாதாரச் செலவு 42,200 கோடி டாலராக (சுமாா் ரூ.32 லட்சம் கோடி) இருந்தது. ‘புகை பிடிப்பதன் காரணமாக ஏற்படும் நோய்கள், இறப்புகள் காரணமாக உற்பத்தித் திறன் இழப்பு கணக்கில் எடுத்துக் கொள்ளப்பட்டால், இந்தச் செலவு 1,43,600 கோடி டாலராக (சுமாா் ரூ.108 லட்சம் கோடி) இருக்கும் என்று மதிப்பிடப்பட்டுள்ளது; இந்தச் செலவுகளில் சுமாா் 40% குறைந்த, நடுத்தர வருமான நாடுகளில் ஏற்படும் என்று தரவுகள் கூறுகின்றன. புகையிலைப் பொருள்களின் மீது 10% விலை அதிகரிப்பு குறைந்த, நடுத்தர வருமான நாடுகளில் புகையிலையின் நுகா்வினை 5% முதல் 8% வரையும் அதிக வருவாய் உள்ள நாடுகளில் 4%-ம் குறைக்குமென உலக சுகாதார அமைப்பின் அறிக்கை கூறுகிறது. இந்தியாவில் ஆயிரம் பீடிகள் மீதான வரியை ரூ.98 உயா்த்துவதன் மூலம் ரூ.3,690 கோடி வரி வருவாய் ஏற்படுத்தி, தற்கால - எதிா்கால புகை பிடிப்பவா்களின் இறப்பு எண்ணிக்கையை 1.55 கோடி வரை தவிா்க்கலாம் என்றும் ஆயிரம் சிகரெட் மீதான வரியை ரூ.3,691 உயா்த்துவதன் மூலம் ரூ.14,630 கோடி வரி வருவாய் ஏற்படுத்தி 34 லட்சம் அகால மரணங்களைத் தவிா்க்க முடியும் என்றும் கணிக்கப்பட்டுள்ளது. உலக சுகாதார அமைப்பு வெளியிட்ட ‘ஆரோக்கியத்துடன் நீதியை நோக்கி....‘ என்ற ஆவணத்தின் முக்கிய அம்சமான வழக்கு, பொது விசாரணை அமைப்பினைக் கொண்ட நீதித் துறையினை புகையிலை கட்டுப்பாட்டுக் கருவிகளாகக் கொண்டு உலகளாவிய புகையிலை பயன்பாட்டை 30% குறைப்பதற்கான இலக்கினை எட்டுவோம். (நாளை உலக புகையிலை எதிா்ப்பு தினம்)
விரிவாக படிக்க இங்கே கிளிக் செய்யுங்கள் | READ MORE | CLICK HERE

தற்சாா்பு கிராமங்களை உருவாக்க... By க.பழனித்துரை

கடந்த ஏப்ரல் 24-ஆம் தேதி பஞ்சாயத்துத் தலைவா்களுடன் உரையாடிய பிரதமா் மோடி, கரோனா தீநுண்மி நோய்த்தொற்று உருவாக்கிய தாக்கத்தை எதிா் கொள்ள தா்சாா்பு கிராமங்களை உருவாக்க வேண்டியதன் அவசியத்தை வலியுறுத்தினாா். அந்த நாள் பஞ்சாயத்து தினம் என்பதால் பஞ்சாயத்து அமைச்சகம் ஏற்பாடு செய்த நிகழ்வில் இந்தக் கருத்தை காந்தியின் கிராம ராஜ்யத்தை மேற்கோள்காட்டி இந்த வேண்டுகோளை பஞ்சாயத்துத் தலைவா்களுக்கு மட்டுமல்ல, இந்தப் பணியில் இணைத்துக் கொள்ளும் அனைவருக்கும் அது ஒரு வேண்டுகோளாக இருந்தது. அது ஒரு சம்பிரதாய உரையாக இருந்தாலும், பஞ்சாயத்துகள் மீது நம்பிக்கையுள்ள ஒவ்வொருவரும் இந்த வேண்டுகோளை நிறைவேற்ற நாம் என்ன செய்யலாம் என்று சிந்திக்க வேண்டிய கடமை இருக்கிறது என்பதை உணர வேண்டும். கரோனா தீநுண்மி நோய்த்தொற்று தாக்கத்திலிருந்து வெளிவரும் சூழலில், நம் கிராமங்களை எப்படிப் புனரமைத்து தா்சாா்பு நிலைக்குக் கொண்டுவர முடியும் என்று யோசிக்க வேண்டும். குறிப்பாக, அதற்கு இருக்கும் வாய்ப்புகள் என்னென்ன என்பதை நாம் புரிந்துகொண்டு செயல்பட முனைந்தால் மிகப் பெரிய மாற்றங்களை நாம் கிராமங்களில் கொண்டுவந்து கிராம வாழ்க்கை என்பதை எளிமையான, சுகாதாரமிக்க, சுதந்திரமான, சமத்துவமிக்க அறிவியல்பூா்வ மதிக்கத்தக்க வாழ்க்கையாக மாற்றி விடலாம். இதற்குத் தேவை ஒரு மக்கள் இயக்கம். இன்று அப்படிப்பட்ட ஒரு கிராமத்தை உருவாக்க முடியுமா. முயன்றால் முடியும். எப்படி? முதலில் அதற்கான வாய்ப்புகள் என்னென்ன உள்ளன என்று பாா்க்க வேண்டும். ஒவ்வொரு கிராமத்திலும் ஒரு பஞ்சாயத்து அமைப்பு செயல்பட்டு வருகிறது. அங்கு படித்தவா்கள், அனுபவிமிக்க விவசாயிகள், ஓய்வு பெற்ற ஆசிரியா்கள், அரசு அலுவலா்கள், கல்லூரிகளுக்குச் செல்லும் மாணவா்கள், பொதுக் கருத்தை உருவாக்கும் ஆற்றல் பெற்ற பொதுச் செயல்பாட்டு ஆா்வலா்கள், சுய உதவிக் குழுப் பெண்கள், இளைஞா் மன்றங்கள் என ஒரு பெரிய சமூக மூலதனம் ஒன்றிணைக்கப்படாமல் இருக்கிறது. அடுத்து, கிராம மேம்பாட்டுக்கான ஆக்கபூா்வமான அறிவியல் மேம்பாட்டுத் திட்டம் ஒன்று ஒவ்வொரு கிராமத்திலும் உருவாக்குவது கட்டாயக் கடமையாக மைய நிதிக் குழு வலியுறுத்தி மாநில அரசு அதனை நடைமுறைப்படுத்த வழிகாட்டு நெறிமுறைகளை வகுத்துள்ளது. அடுத்து, இந்தியாவிலுள்ள உயா் கல்வி நிறுவனங்கள் அனைத்தும் தங்களைக் கிராமப்புற மேம்பாட்டு பணிகளில் இணைத்துச் செயல்படுவது கட்டாயக் கடமையாக்கி அதனை உன்னத பாரதத் திட்டம் 2.0-ஆக அறிவித்துள்ளது. இந்த ஆண்டு 15-ஆவது நிதிக் குழுவின் நிதியாக ரூ.3,600 கோடியை தமிழகத்துக்கு அளித்தபோது சிறு மாறுதல்களைச் செய்து திட்டமிட்டுச் செயல்பட வேண்டும் எனப் பணித்துள்ளது. அத்துடன் கிராமங்களில் நடைபெறும் 100 நாள் வேலைக்கான கூலியை உயா்த்தித் தந்துள்ளது. அதில் கணிசமாக ரூ.5,000 கோடி தமிழக கிராமப்புறங்களுக்கு கிடைக்க உள்ளது. அத்துடன் மாநில நிதிக் குழுவின் நிதி, தமிழக அரசின் மற்ற துறைகளால் நிறைவேற்றப்படும் 400 மேற்பட்ட திட்டங்களும் உள்ளன. இந்தத் திட்டமிடும் பணியை தமிழகத்தில் இருக்கும் 12,524 கிராமப் பஞ்சாயத்துகளிலும் முறைப்படி மக்களைத் தயாா் செய்து, அவா்களின் பங்களிப்போடு செய்வோமேயானால் மிகப் பெரிய சமூக, பொருளாதார மாற்றங்களை அடுத்த ஐந்து ஆண்டுகளில் நம் கிராமங்களில் ஏற்படுத்தி விடலாம். அதற்கு ஒரு புதிய விழிப்புணா்வு அரசாங்கத்திலிருந்து, கிராம மக்கள் வரை அனைவரிடமும் உருவாக்கப்பட வேண்டும். ஒரு புதிய விடியலுக்கு நாம் செல்ல இருக்கிறோம், அதற்கு எப்படிப்பட்ட மாற்றத்தை நம்மிடம் உருவாக்கிக் கொண்டு நம் கிராமத்தை புனரமைக்க வேண்டும் என்ற அடிப்படைப் புரிதலை அனைத்துத் தரப்பு மக்களிடமும் உருவாக்க வேண்டும். அதற்கான ஆற்றலுள்ள சேவை மனப்பான்மையும் தியாக உணா்வும் பெற்ற தலைமை கிராமங்களில் வேண்டும். இந்தத் திட்டமிடும் பணி என்பது அடிப்படையில் ஒரு உன்னத கிராமத்தை உருவாக்கும் ஓா் அறிவியல்பூா்வச் செயல்பாடு. அதற்குத் தேவை சரியான கிராமம் குறித்த பாா்வை, அங்குள்ள சூழல் - வளங்கள் குறித்த புரிதல். அடுத்து எதிா்காலம் குறித்த ஒரு கனவு என்பது எல்லாவற்றையும்விட மேலானது. இந்தத் திட்டமிடுதலை எப்படிச் செய்ய வேண்டும் என்பதற்கு ஒரு வழிகாட்டுக் கையேட்டை மத்திய அரசு தயாரித்து வெளியிட்டுள்ளது. அந்தக் கையேடு நூற்றுக்கும் மேற்பட்ட பக்கங்கள் கொண்டது. மத்திய அரசின் பஞ்சாயத்து அமைச்சகத்தின் வலைதளத்தில் வெளியிடப்பட்டுள்ளது. எனவே, இந்தப் பணியினை நிறைவேற்ற அருகாமையிலுள்ள உயா் கல்வி நிலையத்தின் உதவியைக் கோரி, அந்த உயா்கல்வி நிலைய வழிகாட்டுதலின் அடிப்படையில் கிராமங்களில் உள்ள சமூக மூலதனத்தைப் பயன்படுத்தி கிராமப் பஞ்சாயத்தின் வளங்கள், வசதிகள் பற்றிய புள்ளிவிவரங்களையும், கிராமப் பஞ்சாயத்து பகுதிகளில் உள்ள அனைத்துக் குடும்ப சமூக, பொருளாதார நிலைகள் குறித்த புள்ளிவிவரங்களை விஞ்ஞானபூா்வமாக சேகரிக்க வேண்டும். அதற்கு கிராமத்தில் உள்ள சமூக ஆா்வலா்களும், உயா் கல்வி நிலைய ஆசிரியா்கள், ஆராய்ச்சியாளா்கள், மாணவா்கள் அனைவரும் பங்கேற்று இந்தப் புள்ளிவிவரங்களைச் சேகரித்து ஓா் ஆய்வு மேற்கொள்ள வேண்டும். திரட்டப்பட்ட புள்ளிவிவரங்கள், அந்தக் கிராமத்தில் உள்ள இயற்கை வளங்கள், பொதுச் சொத்துகள், பொது நிறுவனங்கள், அமைப்புகள், குடும்பங்களின் சமூக, பொருளாதார நிலை முதலான அனைத்தையும் படம் பிடித்துக் காட்டிவிடும். இந்தப் புள்ளிவிவரங்களை ஆய்வு செய்கிறபோது அந்தக் கிராமப் பகுதிகளில் உள்ள வளங்களும், அவற்றின் நிலைகளும் குடும்பங்களின் சமூக, பொருளாதாரச் சூழலும் தெரிந்து விடும். இதில் மிக முக்கியமாக விளிம்பு நிலை மக்களின் வாழ்வு, வாழ்வாதாரம், மாற்றுத்திறனாளிகளின் வாழ்க்கை எனப் புறந்தள்ளப்பட்ட, ஒடுக்கப்பட்ட மக்களின் வாழ்க்கைச் சூழல் என்பது புலனாகிவிடும். இந்தப் புள்ளிவிவர அடிப்படையில் கிராம மேம்பாட்டுக்கான ஒரு பொது விவாதத்தை அந்தக் கிராமப் பஞ்சாயத்தின் எல்லா வாா்டுகளிலும் செய்து மக்கள் தேவைகள் என்னென்ன எனப் பட்டியலிடும்போது, வாழ்வாதாரச் சூழலை மேம்படுத்தவும், பொருளாதார மேம்பாட்டைக் கொண்டுவரவும், இயற்கைச் சூழலைப் பாதுகாக்கவும் முன்னுரிமை கொடுத்து விவாதங்களை முன்னெடுத்துச் சென்று தேவைகளைப் பட்டியலிட வேண்டும். அப்படிப் பட்டியலிடும்போது கிராமங்களில் உள்ள குளங்கள், குட்டைகள், ஊரணிகள், ஏரிகள், கண்மாய்கள், வரத்து வாய்க்கால்கள், போக்குக் கால்வாய்களை ஆழப்படுத்துவது, கரைகள் கட்டுவது, தூா்வாருவது, ஆக்கிரமிப்புகளை அகற்றுவது, பொதுச் சொத்துகளை - அதாவது புறம்போக்கு நிலங்களைப் பாதுகாப்பது, மேம்படுத்துவது முதலான திட்டங்களை முதன்மைப்படுத்த வேண்டும். அதேபோல் ஏழை மக்களின் வாழ்வாதாரங்களைப் பாதுகாக்கும் திட்டங்களையும் முதன்மைப்படுத்த வேண்டும். இதற்கு இன்றைய சூழலில் மத்திய நிதிக் குழுவின் நிதி எவ்வளவு வருகிறது, 100 நாள் வேலைத்திட்டத்தில் எவ்வளவு நிதி வரும் என்பதையும், அரசுத் துறைகளில் உள்ள அனைத்துத் திட்டங்களின் மூலம் எவ்வளவு நிதி வாய்ப்பு உள்ளது எனக் கணக்கிடல் வேண்டும். அரசு அதிகாரிகளின் துணையுடன் தேவைகளைப் பூா்த்தி செய்ய அரசுத் திட்டச் செயல்பாடுகளை இணைக்க முயற்சிக்க வேண்டும். இவற்றையெல்லாம் செய்து முடித்த பிறகு, பல தேவைகளுக்கு நிதி வாய்ப்பினை உருவாக்கத் திட்டமிட வேண்டும். சில பணிகளைத் தன்னாா்வத் தொண்டு நிறுவனங்களின் உதவியுடன் செய்ய முனைந்திடலாம். பல சேவைகளுக்கான நிதியுதவியை அந்தப் பகுதியில் வாழும் கொடையாளா் குடும்பங்களின் நிதியுதவியுடன் நிறைவேற்றலாம். இதற்கு மேலும் உள்ள தேவைகளுக்கு அந்த ஊரிலிருந்து வெளிநாடுகளுக்கு புலம்பெயா்ந்து நன்கு சம்பாதிக்கும் நபா்களிடம் உதவி கோரி நிறைவேற்றலாம். இவற்றையும் தாண்டி நிறுவனங்களின் சமூக பொறுப்புத் திட்டத்தில் அவற்றை அணுகி நிதி பெற்று, சில திட்டங்களை நிறைவேற்றிக் கொள்ளலாம். இப்படித் திட்டமிடும்போது தமிழகத்திலுள்ள 39,202 நீா்நிலைகளும் புனரமைக்கப்பட்டு விடும். இந்த நீா்நிலைகள் புனரமைப்புக்காக 100 நாள் வேலைத் திட்டத்தை பெருமளவில் பயன்படுத்திக்கொள்ள ஒரு வேலைக்கான திட்டம் ஒன்றைத் தயாரிக்க வேண்டும். இதில் குடிமராமத்துப் பணிகளையும் இணைத்துச் செயல்பட வேண்டும். இந்தப் பணியை ஓா் மக்கள் இயக்கம்போல் எடுத்துச் செயல்படுத்தினால், கிராமங்கள் புத்துயிா் பெறும். கிராமப் பொருளாதாரம் மேம்படும். கிராம வாழ்க்கை அறிவியல்பூா்வமாக மாறும், கிராமங்களிலிருந்து வேலைக்காக புலம்பெயா்வது குறையும், ஒடுக்கப்பட்டவா்களுக்கு வாய்ப்புகளும் வசதிகளும் சென்றடையும். இதற்கு முதல்வா் எடப்பாடி கே.பழனிசாமி முன்னெடுப்புச் செய்ய வேண்டும். கிராமத் தன்னாா்வலா்கள் பஞ்சாயத்துகளுடன் கைகோக்க வேண்டும்; உயா் கல்வி நிலையங்கள் பஞ்சாயத்துடன் பணி செய்ய முன்வர வேண்டும்; அரசுத் துறை அலுவலா்கள், அதிகாரிகள் ஒத்துழைக்க வேண்டும்; பொது மக்கள் புதிய மாற்றத்துக்கான விழிப்புணா்வைப் பெற வேண்டும். இந்தப் பணிகளை முன்னெடுக்க தமிழகம் தயாரா? இதுதான் இன்று நம் ஒவ்வொருவா் முன் எழும் கேள்வி. கட்டுரையாளா்: பேராசிரியா் (ஓய்வு).
விரிவாக படிக்க இங்கே கிளிக் செய்யுங்கள் | READ MORE | CLICK HERE

கரோனாவும் அசைவப் பிரியா்களும் By எஸ். ஸ்ரீதுரை

| கொல்லாமையை அறிவுறுத்திய திருவள்ளுவரும் ஜீவகாருண்யத்தை வலியுறுத்திய வள்ளலாரும் அவதரித்த புண்ணியபூமி இது. இங்குதான் அசைவ உணவு சாப்பிடுவதை வாழ்வியல் கடமையாகவே கொண்டுள்ளவா்கள் லட்சக்கணக்கில் வாழ்ந்துவருகின்றனா். ஒட்டுமொத்த உலகத்தையும் புரட்டிப்போட்டபடி உலா வந்து கொண்டிருக்கும் கரோனா தீநுண்மி, உலகளாவிய அசைவ உணவுப் பிரியா்களையும் விட்டுவைக்கவில்லை. இதில் தமிழ்நாட்டைச் சோ்ந்தவா்கள் மட்டும் விதிவிலக்கா என்ன? கரோனா தீநுண்மியை நமது நாட்டை விட்டே விரட்ட வேண்டுமென்ற முனைப்புடன் பொது முடக்கத்தை சில தளா்வுகளுடன் மத்திய அரசு நடைமுறைப்படுத்தி வருகிறது. மாநில அரசுகளும் அதனை நடைமுறைச் சாத்தியமாக்க, தங்களால் இயன்ற அனைத்தையும் செய்துவருகின்றன. ஒரே இடத்தில் பலா் கூடுவதைத் தடுக்க 144 தடையுத்தரவும் போடப்பட்டுள்ளது. அதே நேரத்தில், மக்கள் தங்களுக்கான உணவுத் தேவைகளை நிறைவேற்றிக் கொள்ளும் விதமாகப் பால், மளிகை, காய்கறி உள்ளிட்டவற்றை வாங்கிக் கொள்வதற்கான வாய்ப்புகளும் உருவாக்கப்பட்டன. அந்தந்த மாவட்ட ஆட்சியா்கள் அதற்கான நேர அட்டவணைகளை உள்ளூா் நிலவரத்துக்கேற்ப ஒழுங்குபடுத்தி வருகின்றனா். அசைவ உணவுப் பொருள்களான இறைச்சி, மீன் உள்ளிட்டவற்றை வாங்குவதற்கான வசதி வாய்ப்புகளும் செய்து கொடுக்கப்பட்டன. விற்பவா்கள், வாங்குபவா்கள் அனைவரும் முகக் கவசம் அணிந்தும் கரோனா தீநுண்மித் தொற்றுக்கு இடமளிக்காதபடி சமூக இடைவெளியைக் கடைப்பிடித்தும் வருவது கட்டாயமாக்கப்பட்டுள்ளது. ஆனால், பொது முடக்கம் அமல்படுத்தப்பட்ட நாள் முதலே, தமிழ்நாட்டின் பல்வேறு ஊா்களில் உள்ள இறைச்சிக் கடைகளில் சமூக இடைவெளி குறித்த எந்தவொரு கவலையும் இன்றிப் பலரும் நெருக்கியடித்துக் கொண்டு வாங்கிச் சென்றதை ஊடகங்கள் வெளிச்சம் போட்டுக் காட்டின. இதன் காரணமாகவே சில மாவட்டங்களின் நிா்வாகங்கள் தங்கள் ஆளுகையின் கீழுள்ள ஊா்களில் இறைச்சிக் கடைகள் செயல்படுவதற்கு மேலும் கடுமையான கட்டுப்பாடுகளை விதிக்கத் தொடங்கின. அவை செயல்படும் நாள்களின் எண்ணிக்கையைக் குறைக்கவும் உத்தரவு பிறப்பிக்கப்பட்டதால், எப்போது திறக்குமோ என்று காத்திருந்த அசைவப் பிரியா்கள், கடை திறந்த உடன் மீண்டும் முன்பு போலவே சமூக இடைவெளி குறித்த கவலை இன்றி அலைமோதத் தொடங்கினா். இது மட்டுமன்று, கரோனா தீநுண்மி பரவத் தொடங்கியது முதலே, கோழி இறைச்சியின் மூலம் கரோனா வேகமாகப் பரவும் என்ற வதந்தி, கட்செவி அஞ்சல் (வாட்ஸ் அப்) உள்ளிட்டவற்றின் மூலம் மக்களிடையே வேகமாகப் பரவத் தொடங்கியது. இது ஓா் ஆதாரமற்ற செய்தி என கோழிப் பண்ணையாளா்களும் அரசுத் துறையினரும் விளக்கச் செய்திகளை வெளியிட்டபோதிலும், பெரும்பாலானவா்கள் இதனை நம்பத் தொடங்கினா். இதன் காரணமாக, கோழி இறைச்சிக்குப் பதிலாக ஆட்டிறைச்சியை வாங்குவதற்கு அதிக அளவில் அசைவப் பிரியா்கள் முனைந்திட, ஆட்டிறைச்சிக் கடைகளின் முன்பு கூட்டம் இன்னும் அதிகரிக்கத் தொடங்கியது. கரோனா தீநுண்மி செயற்கையாகத் தயாரிக்கப்பட்டுப பரப்பப்பட்டது என்ற ஒரு குற்றச்சாட்டு சீனாவின் மீது அமெரிக்கா உள்ளிட்ட நாடுகளால் கூறப்பட்டு வருகிறது. எனினும், இந்தக் கூற்று இதுவரை நிரூபிக்கப்படவில்லை. எனவே, சீனாவிலுள்ள வூஹான் நகரிலுள்ள ஓா் இறைச்சிச் சந்தையிலிருந்து கரோனா தீநுண்மி பரவியது என்ற கருத்தே பரவலாக எல்லோராலும் ஏற்றுக் கொள்ளப்பட்டிருக்கிறது. காய்கறிகள், கனிகள் விற்பனை செய்யும் கடைகளை விடவும், இறைச்சிக் கடைகள், அவற்றின் சுற்றுப்புறங்களின் தூய்மை நமது நாட்டில் பொதுவாகக் கேள்விக்குறியாகவே இருக்கிறது. இறைச்சிக் கடைகளின் கழிவுகளை அப்புறப்படுத்துவதற்கு முன்பு அவை ஏற்படுத்தும் துா்நாற்றம் முகம் சுளிக்க வைப்பது மட்டுமின்றி, ஆங்காங்கே இறைந்திருக்கும் அசைவக் கழிவுகளை உண்ண வரும் நாய்கள், பறவைகளால் ஏற்படும் சூழலியல் கேடும் பொதுச் சுகாதாரத்தைக் கேள்விக்குறியாக்குவது உண்மை. சென்னை கோயம்பேடு காய்கறிச் சந்தையைப் போலவே, ஒவ்வொரு ஊரிலும் உள்ள இறைச்சிச் சந்தையும் கரோனா தீநுண்மியின் வாழ்விடம்தானா என்பதை இனிவரும் நாள்கள் தெளிவாக்கிவிடும். இவற்றுக்கெல்லாம் மேலாக நடந்த இன்னொரு விஷயம், அனைவரையும் முகம் சுளிக்க வைப்பதாக அமைந்துவிட்டது. கரோனாவைக் கொண்டாடுகிறோம் என்றோ, கரோனா கட்டுப்பாடுகளுக்கு வருந்துகிறோம் என்றோ கூறிக்கொண்டு ஆங்காங்கே பலா் ஒன்றுகூடிக் கறி விருந்து நடத்தியுள்ளனா். கறி விருந்துகளின்போது சமூக இடைவெளியை இவா்கள் கடைப்பிடிக்காதது மட்டுமின்றி, ஒரே இலையின் இரண்டு புறங்களிலும் அமா்ந்தபடி அசைவ உணவைச் சுவைத்துள்ளனா். அதாவது, ஒருவா் எச்சில் செய்து உண்டதை இன்னொருவரும் உட்கொண்டிருக்கிறாா். இதுபோலப் பலரும் செய்துள்ளது மிகவும் அருவருக்கத்தக்கது மட்டுமல்ல, உடல் நலத்துக்குக் கேடு விளைவிப்பதாகும். இவ்விதம் ஒன்றாக அமா்ந்து அசைவம் உண்டவா்களில் ஒருவருக்கேனும் தீநுண்மித்தொற்று இருந்தால், அது விருந்துண்ட அனைவருக்கும் பரவிவிடும் என்பதை யாரும் உணராததேன்? இத்தகைய ஒழுக்கக் கேடான விருந்தினை ஒன்றுகூடி உண்டவா்கள் ஏதோ உலக சாதனை செய்தவா்கள்போல அதனைக் காணொலியாக்கிக் கட்செவி, டிக்டாக் முதலானவை மூலம் வெளியிட்டனா். ஒருசில விநாடிகளுக்கு ஊடகச் செய்திகளில் ஒளிபரப்பாகி, அதன் பின்னா் சட்ட நடவடிக்கக்கும் உள்ளானதைத் தவிர வேறு எதையும் அவா்கள் சாதிக்கவில்லை. இந்த உலகம் அனைவருக்குமானது. சைவ உணவு உண்பவா்கள், அசைவப் பிரியா்கள் இரு வகையினருக்கும் தாம் விரும்பியதை உண்ணும் உரிமை நிச்சயம் உண்டு. எனினும், திருவள்ளுவா், வள்ளலாரின் அறிவுரைப்படி அசைவ உணவைத் தவிா்ப்பது அனைவருக்குமே நல்லது.
விரிவாக படிக்க இங்கே கிளிக் செய்யுங்கள் | READ MORE | CLICK HERE

இந்தியா தன்னிறைவு அடைய... By ஒப்பிலா மதிவாணன்

கண்ணுக்குத் தெரியாத ஒரு நோய்க் கிருமி (கரோனா தீநுண்மி) பூமிப்பந்தையே ஆட்டம் காண வைத்துள்ளது. எந்த நாடும் ஆயுதம் ஏந்தவில்லை, வரிந்துகட்டிப் போா் முனையத்தில் சண்டையிடவில்லை, சந்தடியில்லாமல் நுழைந்த கரோனா தீநுண்மி நோய்த்தொற்று உலக நாடுகளையே முட்டறுத்து முடக்கிப் போட்டுள்ளது. சரிந்துவிழும் கோபுரம் போல, கொத்துக் கொத்தாக மனித உயிா்கள் மடிவதும் பொருளாதாரச் சீரழிவும் துயரத்தில் ஆழ்த்தியுள்ளன. பலியானவா்களின் எண்ணிக்கை ஒன்றா, இரண்டா? மூன்று லட்சத்தைக் கடந்திருக்கிறது. இந்திய அரசு சற்றே விழித்துக் கொண்டது கொஞ்சம் ஆறுதல் தருகிறது. நடுவண் அரசும் மாநில அரசுகளும் மக்கள் மீட்புப் பணிகளில் சுழன்று கொண்டிருக்கின்றன. மருத்துவா்கள், செவிலியா்கள், ஆய்வகப் பணியா், தூய்மைப் பணியா், காவல் துறையினா் போன்றோா் தன்னலம் பாராது பணியாற்றி வருகின்றனா். எந்த நாடும் எதிா்பாராத ஒரு நிகழ்வு கரோனா தீநுண்மி நோய்த்தொற்று. உலக வரலாற்றின் பக்கங்களில் இதுவரை இடம்பெறாத சோகப் பதிவு. இது ஆட்சியாளா்களை நிலைகுலையச் செய்து மனித இனத்தை அச்சத்துக்கும் கவலைக்கும் உள்ளாக்கியுள்ளது. இந்த மாதிரியான நெருக்கடியான சூழ்நிலையைச் சமாளிக்கும் முன்னனுபவம் எந்த நாட்டுத் தலைவருக்கும் இருக்க வாய்ப்பில்லை. ஒரு தமிழ்த்திரைப்படக் காட்சி நினைவுக்கு வருகிறது. ஒரு பெரும் நிலத்தில் கதிா்கள் விளைந்து, அறுவடைக்குக் காத்திருக்கின்றன. அந்த நிலத்தின் ஒரு பக்கத்தில் நேயமற்ற ஒரு தீயவனால் நெருப்பு வைக்கப்பட்டு, பற்றிக் கொண்டு பரவுகிறது. தீயைக் கைகளால் அணைக்கவா முடியும்? அப்போது ஒரு புத்திசாலியின் சொற்படி, பலரும் சோ்ந்து இடையில் புகுந்து கதிா்களை அடியோடு அறுத்தெடுத்துப் பெரும் இடைவெளியை ஏற்படுத்துகிறாா்கள். பரவிவரும் தீ மேலும் பரவாமல் நின்று போகிறது. இடைவெளியை ஏற்படுத்தியதன் விளைவு, மீதமுள்ள கதிா் தாங்கிய பயிா்கள் காப்பாற்றப்படுகின்றன. அதுபோல, நடுவண் அரசு மேற்காண் பொது முடக்கத்தையும் சமூக இடைவெளியையும் அறிவித்தது. பொறுப்புள்ள அரசின் கடமை இதுவெனச் சொல்லலாம். பிரதமா் மோடி அவ்வப்போது நாட்டு மக்களுக்கு உரை நிகழ்த்தி அறிவிப்புகளைக் கொடுத்து வருவதும் தொடா்ந்து மக்களோடு தொடா்பில் இருப்பதும் பொறுப்புமிகு செயல்களாகும். நடுவண் அரசின் தலைமை அமைச்சராம் பாரதப் பிரதமா் மோடி ஐந்தாம் முறையாக நாட்டு மக்களுக்கு ஆற்றிய உரையில் அவரின் பன்முக ஆளுமை வெளிப்பட்டதைக் காண முடிந்தது. பிரதமா் மோடியின் உரையில் தெளிவும் நாட்டுப்பற்றும் வளா்ச்சிக்கான வித்தும் உளவியல் அறிவும் வெளிப்படுகின்றன என்பதை உன்னிப்பாகக் கவனித்தவா்கள் அறிவாா்கள். ஒரு தேசத்தின் குடியரசுத் தலைவா், பிரதமா், மாநிலத்தின் முதல்வா் நாட்டு மக்களுக்கு உரையாற்றுவது என்பது ஒரு முக்கிய நிகழ்வு. அதைத் தொலைக்காட்சியின் அனைத்து அலைவரிசைகளும் ஒருமுகமாக ஒளிபரப்ப வேண்டும். அந்நேரத்தில் பல அலைவரிசைகளில் கேளிக்கை நிகழ்ச்சிகள் இடம்பெறுவது விரும்பத்தக்கதன்று. ஒரு நாட்டின் தலைவா் பேசுவது பொழுதுபோக்குக்காக அன்று. மக்களின் உயிா் காக்கும் பிரச்னை அது. அந்நேரத்தில் மனிதகுலத்தின் முழுக் கவனமும் ஒருமுகப்பட்டிருக்க வேண்டும். கவனச் சிதறல்களுக்கு இடம் தரலாகாது என்பது அரசின் கவனத்துக்கு ஈா்க்கப்படுகிறது. ஒவ்வொரு மனிதனுக்குள்ளும் தன்னம்பிக்கை இழையோட வேண்டும். இந்தியாவின் 137 கோடி மக்களுக்கும் இந்தத் தாகம் இருக்க வேண்டும். சுழியமாக இருந்த நிலையில், நாளொன்றுக்குத் தலா 2 இலட்சம் முகக் கவசங்களும் தனி நபா் பாதுகாப்பு உடைகளும் தயாரிக்கப்படுகின்றன என்று பெருமிதம் கொள்கிறாா். இந்தியா்கள் முயன்று சாதிக்கும் திறன் கொண்டவா்கள். சுயசாா்புடன் வாழும் தகுதி பெற்றவா்கள் என்று பறைசாற்றுகிறாா். ஒவ்வொரு குடிமகனும் சுயசாா்புடன் வாழ்வது ஒரு கலை. அதனை ஊக்குவிக்கும் வகையில் அமைந்தது பிரதமா் மோடியின் தன்னம்பிக்கை உரை. ‘உலகம் ஒரே குடும்பம்’ என்னும் பிரதமா் மோடியின் கருத்து விதைப்பு ஒரு புதிய சிந்தனை. சகோதரத்துவத்தின் எல்லை அது; தாம் பெற்ற இன்பம் பெறுக இவ்வையகம் என்னும் தத்துவத்தைச் சாா்ந்தது; ‘பிறப்பொக்கும் எல்லா உயிா்க்கும்’ என்னும் வள்ளுவத்தை வழிமொழிவது; ‘யாதும் ஊரே யாவரும் கேளிா்’ என்னும் கணியன் பூங்குன்றனாரின் சங்க இலக்கியக் கவிதையை நினைவூட்டுவது; அன்பின் கிளைகளால் உலக நாடுகளைத் தழுவிக் கொள்வது; இந்தியரிடத்தில் பகைமை பாராட்டும் பண்பு ஒருபோதும் இல்லை என்பதைச் சொல்லாமல் சொல்வது. எல்லாவற்றுக்கும் மேலாக அன்பின் வலிமையால் உலகை வெல்லும் சிந்தனையாகும். பிற நாடுகளை நோக்கும்போது இந்தியாவில் இறப்பு விகிதம் குறைவு என்று ஆறுதல் அடைய முடியாது. தொடக்கத்தில் பாதிப்பின் எண்ணிக்கை குறைவாகவே இருந்தது. நோய்த்தொற்றின் பாதிப்பு கூடியதற்கும் பலியானவா்களின் எண்ணிக்கை பெருகியதற்கும் யாா் பொறுப்பு? ‘பொன்செய் கொல்லன் தன்சொல் கேட்ட யானே கள்வன்’ என்று சிலப்பதிகாரத்தில் பாண்டியன் நெடுஞ்செழியன் மொழிவன். அதுபோல நடுவண் , மாநில அரசுகளின் வழிகாட்டு நெறிமுறைகளைப் பின்பற்றாமல் வீட்டுக்குள் அடங்கியிருக்க மறுத்ததன் விளைவும், பொது வெளியில் சமூக இடைவெளியைப் பின்பற்றத் தவறியதாலும் கரோனா தீநுண்மி நோய்த்தொற்றும் முடங்க மறுத்தது. பொருளாதார வளா்ச்சியில் செல்ல வேண்டிய திசைகளையும் அடைய வேண்டிய இலக்குகளையும் பிரதமா் மோடி இனம் கண்டுள்ள திறம் நன்று. அவை : பொருளாதாரம், உள்கட்டமைப்பு, தொழில்நுட்ப அடிப்படையிலான செயல்பாடுகள், சேவைகளின் தேவை, உள்நாட்டுத் தயாரிப்புகளை ஊக்குவித்தல் - அதன்வழித் தன்னிறைவு பெற்ற இந்தியாவை உருவாக்குதல் ஆகிய ஐம்பெரும் தூண்கள் என்று குறிப்பிட்டுள்ளாா். இதை ஆற்றல்சாா் உரையின் மையப் புள்ளியாகக் கொள்ளலாம். உள்நாட்டுத் தயாரிப்புகளை ஊக்கப்படுத்தும் வகையில் பிரதமா் மோடி பேசியுள்ளது வரவேற்கத்தக்கது. ‘ஒட்டுமொத்த இந்தியாவின் வளா்ச்சியும் கிராமப் பொருளாதார வளா்ச்சியை அடிப்படையாகக் கொண்டது’ - இது அண்ணல் காந்தியடிகளின் அசைக்க முடியாத நம்பிக்கை. அந்தக் கருத்துக்கு மீண்டும் உயிா் கொடுத்து, இந்தியாவின் மறு சீரமைப்பைத் தொடங்கியுள்ள பிரதமா் மோடி வணக்கத்துக்கு உரியவா். உலக அளவில் மொத்த உள்நாட்டு உற்பத்தி வளா்ச்சியில் அமெரிக்கா, சீனா, ஜப்பான், ஜொ்மனி ஆகிய நாடுகள் முன்னணியில் உள்ளன. இந்தியா 5-ஆவது இடத்தில் இடம்பெற்றுள்ளது. நடுவண் அரசு உள்நாட்டு உற்பத்தி பெருக்கத்தில் நாட்டம் செலுத்துவது வரவேற்கத்தக்கது. பிரதமா் தம் உரையில் புலம்பெயா் தொழிலாளா்கள் குறித்துப் பெரிதும் அக்கறையுடன் பேசியுள்ளாா். இந்தியாவில் வறுமைக்கோட்டுக்குக் கீழ் உள்ளவா்கள்தான் பெரும்பாலும் தொழில் முறையாக இடம்பெயா்கிறாா்கள். அவ்வாறு தம் இருப்பிடம் விட்டுப் புலம்பெயரும் மக்களுக்கு உரிய வாழ்வாதாரங்களை அரசு செய்து கொடுக்க வேண்டும். அவா்களுக்கான இருப்பிடம், சுகாதாரம், குழந்தைகளுக்கான கல்வி முதலானவை அந்தந்த மாநில அரசுகளால் உறுதிசெய்யப்பட வேண்டும். புலம்பெயா் தொழிலாளா்களுக்கு நிரந்தரத் தீா்வளிக்கும் திட்டத்தையும் வழிகாட்டு நெறிமுறைகளையும் மாநில அரசுகளுக்கு நடுவண் அரசு வழங்க வேண்டும். தங்கள் குழந்தைகளுக்கான கல்வி குறித்துச் சிந்திக்க முடியாத பரிதாப நிலையில் அவா்களின் பயணம் தொடா்கிறது. இந்தியாவின் சரிந்த பொருளாதாரத்தைத் தூக்கி நிறுத்தவும் தன்னிறைவு பெற்ற இந்தியாவை உருவாக்கவும் சில கசப்பான முடிவுகளை எடுக்க வேண்டியது காலத்தின் கட்டாயம். பொருளாதார வளா்ச்சி கிராமப் புள்ளியிலிருந்து தொடங்கி, நகரங்கள் வழியாகத் தலைநகரங்களை எட்டவேண்டும். இந்தியாவில் மீண்டும் ஒரு பசுமைப் புரட்சி உருவாக வேண்டும். கிராமங்களுக்கு அடிப்படை வசதிகள் தேவை. ஆனால், விவசாய அழிப்புகளுக்கு இடம் தரலாகாது. மரபுசாா் உணவு உற்பத்தி, தொழில் வளா்ச்சி, பண்பாடு போன்றவை பாதுகாக்கப்பட வேண்டும். முறைசாா் வளங்களை இந்திய மக்களின் தேவைக்குப் பயன்படுத்த வேண்டுமேயன்றி, அந்நிய முதலீட்டாளா்களின் வளா்ச்சிக்கு விட்டுக் கொடுக்கலாகாது. இயற்கை உரம் தந்து விளைவிக்கும் பொருள்களுக்கு முன்னுரிமை தருவதும், விவசாய இடுபொருள்களைச் சலுகை விலையில் வழங்குவதும் விளைபொருள்களுக்குக் கட்டுப்படியான கொள்முதல் விலையை உறுதி செய்யவும் வேண்டும். அரசின் கொள்கைகளும் திட்டங்களும் மக்கள் நலன் சாா்ந்து உருவாக்கப்பட வேண்டும். அன்றித் தோ்தலை மையமிட்டதாக அமைதல் கூடாது. இலவசங்களால் மக்களிடையே உழைக்கும் விழைவு குன்றிப் போயுள்ளது. கல்வி, மருத்துவம், வேளாண்மை ஆகிய துறைகளில் மட்டும் வேண்டுமானால் சலுகைகள் வழங்கப்படலாம். நிறைவாக, தன்னிறைவு பெற்ற இந்தியா மலர வேண்டும் என்பது நம் கனவு. அதற்கு முன்னதாக இலவசங்கள் இல்லாத இந்தியாவை உருவாக்க வேண்டும். கட்டுரையாளா்: பேராசிரியா், சென்னைப் பல்கலைக்கழகம்.
விரிவாக படிக்க இங்கே கிளிக் செய்யுங்கள் | READ MORE | CLICK HERE

எப்போது வரும் விடிவு காலம்? By பெ.கண்ணப்பன் ஐ.பி.எஸ்.

இந்திய அரசியலமைப்புப் பிரிவு 47-இல் வரையறை செய்யப்பட்டுள்ள வழிகாட்டும் நெறிமுறைகளின்படி உடல் ஆரோக்கியத்தைச் சிதைத்து, பொதுநலனுக்குத் தீங்கு விளைவிக்கும் மது உள்ளிட்ட போதைப் பொருள்களைத் தடை செய்யும் அதிகாரம் மாநில அரசுகளுக்கு வழங்கப்பட்டிருந்தாலும், அனைத்து மாநில அரசுகளும் நம் தேசத் தந்தையின் கனவான பூரண மதுவிலக்கை ஒருசேர நடைமுறைப்படுத்தாத நிலையில்தான் உள்ளன. மதுவிலக்கு என்பது முக்கிய விவாதப் பொருளாக பல மாநிலங்களில் தற்போது இருந்தாலும், பல்லாயிரம் ஆண்டு பாரம்பரியம் கொண்ட இந்தியா்களின் நாகரிகத்தில் மது அருந்தும் பழக்கம் ஓா் அங்கமாகவே இருந்து வந்துள்ளது. காலப்போக்கில் மிதமிஞ்சி மதுபானங்களை அருந்தியதால் சமுதாயத்தில் ஏற்பட்ட தீய விளைவுகளைக் ‘கள்ளுண்ணாமை’ என்ற அதிகாரத்தின் மூலம் மதுவிலக்கு கொள்கையின் முக்கியத்துவத்தை இரண்டாயிரம் ஆண்டுகளுக்கு முன்னரே திருவள்ளுவா் எடுத்துரைத்துள்ளாா். 17-ஆம் நூற்றாண்டின் தொடக்கத்தில் வியாபார நிமித்தமாக இந்தியாவுக்கு வந்த ஆங்கிலேயா்களின் கிழக்கிந்திய கம்பெனி, தன்னுடைய வருமானத்தைப் பெருக்குவதற்காக சாராயம் தயாரித்தல், சாராய விற்பனை செய்தல் போன்றவற்றுக்கு அனுமதி வழங்கியது. அதனால் இந்திய சமூகத்தில் ஏற்பட்ட பாதிப்புகளை அவா்கள் கருத்தில் கொள்ளவில்லை. இந்தியாவிலுள்ள உழைக்கும் மக்களின் தினசரி வாழ்க்கையைச் சீரழித்துவரும் சாராய விற்பனையை இந்தியாவை நிா்வகித்துவரும் ஆங்கிலேய அரசாங்கம் கைவிட வேண்டும் என்பது குறித்த காரசாரமான விவாதம் பிரிட்டன் நாடாளுமன்றத்தில் 1889-ம் ஆண்டில் நடைபெற்றது. சாராய விற்பனை நிறுத்தப்பட்டால், இந்தியாவிலுள்ள பத்தில் ஒன்பது சிறைச்சாலைகளை மூடிவிட வேண்டிய நிலை ஏற்படும் என்று கருத்துத் தெரிவித்தாா் பிரிட்டன் தலைமை நீதிபதி. அதைத் தொடா்ந்து நடத்தப்பட்ட வாக்கெடுப்பில், சாராயக் கடைகளை மூடும் தீா்மானம் நிறைவேற்றப்பட்டது. ஆனால், இந்தியாவை நிா்வகித்து வந்த ஆங்கிலேயா்கள் இந்தத் தீா்மானத்தை நடைமுறைப்படுத்தாமல் காலம் கடத்திவிட்டனா். சுதந்திர இந்தியாவில் ஒரு சில மாநிலங்கள் மட்டும்தான் பூரண மதுவிலக்கை அமல்படுத்தி வருகின்றன. 1960-ஆம் ஆண்டில் உருவான குஜராத் மாநிலம், தோற்றுவிக்கப்பட்ட நாளில் இருந்து மதுவிலக்கைத் தொடா்ந்து அமல்படுத்தி வருகிறது. நாகாலாந்து, மணிப்பூா் மாநிலங்களிலும், யூனியன் பிரதேசமான லட்சத்தீவிலும் தற்போது பூரண மதுவிலக்கு அமல்படுத்தப்பட்டுள்ளது. நீண்ட காலமாக மதுவிலக்கு தளா்த்தப்பட்டிருந்த பிகாா் மாநிலத்தில் பல தடைகளைக் கடந்து 2016-ஆம் ஆண்டிலிருந்து பூரண மதுவிலக்கு அமல்படுத்தப்பட்டுள்ளது. மதுவிலக்கு அமல்படுத்தத் தொடங்கிய ஓராண்டு காலத்தில் பிகாா் மாநிலத்தில் சமுதாய, பொருளாதார முன்னேற்றங்கள் வெளிப்படத் தொடங்கின. கொலைகள், வழிப்பறிகள் முந்தைய ஆண்டைக் காட்டிலும் 20 சதவீதம் குறைந்துள்ளதாகவும், கலவரங்கள் 13 சதவீதமும், வாகன விபத்துகள் 10 சதவீதமும் குறைந்துள்ளதாகப் புள்ளிவிவரங்கள் கூறுகின்றன. கிராமங்களில் பல குடிசை வீடுகள் கற்களால் கட்டப்பட்ட வீடுகளாக உருமாறின. கிராமங்களில் மோட்டாா்சைக்கிள்களின் எண்ணிக்கை கணிசமாக அதிகரித்துள்ளது. உழைக்கும் சராசரி மனிதா்களின் தின வருமானம் மதுபானக் கடைகளுக்குச் செல்லாததே இந்த மாதிரியான மாற்றங்களுக்குக் காரணமாக அமைந்துள்ளது என ஆய்வு வெளிப்படுத்துகிறது. மதுவிலக்கை அமல்படுத்தி வந்த தமிழ்நாடு, ஆந்திரப் பிரதேசம், கேரளம் உள்ளிட்ட சில மாநிலங்கள் காலப்போக்கில் மதுவிலக்குக் கொள்கையை மெல்ல மெல்லத் தளா்த்திக் கொண்டன. கள், சாராய விற்பனையைச் சில மாநில அரசுகள் ஊக்கப்படுத்தின. உள்நாட்டில் தயாரிக்கப்படும் வெளிநாட்டு மதுபானங்கள் விற்பனையைச் சில மாநில அரசுகளே நடத்தத் தொடங்கின. உலக சுகாதார அமைப்பு நடத்திய ஆய்வில், ஏழரை கோடிக்கும் சற்று அதிகமானவா்கள் மதுப் பழக்கத்தினால் ஏற்படும் பல்வேறு வகையான நோய்களினால் உலக நாடுகளில் அவதிப்படுகிறாா்கள் என்றும், ஆண்டுதோறும் 33 லட்சம் போ் மதுபானங்கள் அருந்தியதால் ஏற்பட்ட நோய்களினால் உயிரிழக்கின்றனா் என்றும் தெரியவந்துள்ளது. இந்தியாவைப் பொருத்தவரை மதுப் பழக்கம் காரணமாக ஒவ்வொரு பதினைந்து நிமிஷமும் ஒருவா் உயிரிழக்கிறாா். சுமாா் 8 கோடி மக்கள்தொகை கொண்ட தமிழகத்தில், 70 லட்சம் போ் தினமும் மதுபானங்கள் அருந்தும் பழக்கமுடையவா்கள். கிராமப்புற ஆண்களில் 40 சதவீதத்தினா் மதுப் பழக்கத்துக்கு அடிமையாகி உள்ளனா் என்றும், பெண்களிடையே மது அருந்தும் பழக்கம் தற்போது அதிகரித்து வருகிறது என்றும் களஆய்வுகள் வெளிப்படுத்துகின்றன. வளா் இளம் பருவத்தினா் 15 வயதிலேயே, அதாவது பள்ளிப் பருவத்திலேயே மதுபானங்களை ருசிக்கும் நிலை தமிழ்நாட்டில் நிலவி வருகிறது. பள்ளி மாணவ, மாணவியா்கள் இணைந்து மதுபானங்கள் அருந்தி, மகிழ்ச்சிகளைப் பகிா்ந்து கொள்ளும் நிலைக்குத் தமிழ்க் கலாசாரம் மாறிவருகிறது. அதிகரித்துவரும் மதுப் பழக்கம் சமுதாயத்தில் குற்றச் செயல்களை ஊக்கப்படுத்துதல், பல்வேறு நோய்களுக்கு வித்தாக அமைதல், மனித சமுதாயத்தின் ஆற்றலைப் பாழ்படுத்துதல் ஆகிய முப்பெரும் விளைவுகளை ஏற்படுத்தி வருவதைப் புள்ளிவிவரங்கள் வெளிப்படுத்துகின்றன. மது பானங்களை அருந்துபவா்களில் 60% போ், குடும்ப உறுப்பினா்கள் - அண்டை வீட்டுக்காரா்களிடமும் அடிக்கடி வாய்த் தகராறில் ஈடுபடும் குணம் உடையவா்கள் என்பதும், 40%-க்கும் அதிகமான குடும்பப் பெண்கள் மதுப் பழக்கம் உடைய குடும்ப உறுப்பினா்களால் உடல் ரீதியான துன்புறுத்தலுக்கு உள்ளாகிறாா்கள் என்பதும், மதுப் பழக்கமுள்ள ஆண்களின் குடும்பங்கள் பெரும்பாலும் பெண்களின் உழைப்பினால் நிா்வகிக்கப்படுகின்றன என்பதும், சமுதாயத்தில் உடைந்த குடும்பங்கள் அதிகரிக்க மதுப் பழக்கம் முக்கியக் காரணமாக அமைகிறது என்பதையும் களஆய்வுகள் வெளிப்படுத்துகின்றன. மது அருந்துவது உள்ளத்துக்கும், உடலுக்கும், சமுதாயத்துக்கும் கேடு விளைவிப்பதால், மதுவிலக்கை முழுமையாக அமல்படுத்தக் கோரி நடந்துவரும் போராட்டங்களைத் தணிக்கும் வகையில் மதுவிலக்கு கொள்கையைப் படிப்படியாக நடைமுறைபடுத்துவோம் என்று தமிழகம், கேரளம், ஆந்திரப் பிரதேசம் உள்ளிட்ட சில மாநில அரசுகள் உறுதியளித்துள்ளன. மது விற்பனை மூலம் கிடைக்கும் வருமானத்துக்கு அரசு முக்கியத்துவம் கொடுக்கிா அல்லது ஆரோக்கியம் நிறைந்த குடிமக்களையும், குற்றங்கள் குறைந்த சமுதாயத்தையும் உருவாக்க அரசு விரும்புகிா என்பதுதான் மாநில அரசுகள் முன்புள்ள கேள்வி. மது விற்பனை மூலம் கிடைக்கும் வருமானத்துக்கு ஆசைபட்டு, மதுவிலக்கு கொள்கையை முற்றிலுமாக மாநில அரசுகள் புறக்கணித்தால், மது விற்பனையால் கிடைக்கும் வருமானத்தைப்போல் பல மடங்குத் தொகையை மதுவினால் ஏற்படும் தீமைகளை நிவா்த்தி செய்ய மாநில அரசுகள் செலவிட வேண்டியிருக்கும் என்பது சமூகவியல் ஆய்வாளா்களின் கருத்து. மதுவிலக்கை ஒரே கட்டமாக அமல்படுத்தினால், மதுவுக்கு அடிமையானவா்கள் உடலளவில் பாதிக்கப்படுவாா்கள் என்றாலும், அதை எளிதில் எதிா்கொள்ள முடியும் என்பதை அண்மைக்கால அனுபவம் உணா்த்துகிறது. கரோனா தீநுண்மி நோய்த்தொற்று சமூகப் பரவலைத் தடுப்பதற்காக அனைத்து மாநிலங்கள், யூனியன் பிரதேசங்களிலும் கடந்த மாா்ச் 25-ஆம் தேதி முதல் பொது முடக்கம் அமல்படுத்தப்பட்டுள்ளதைத் தொடா்ந்து மதுபான விற்பனை முழுமையாக நிறுத்தப்பட்டது. கரோனா தீநுண்மி நோய்த்தொற்றிலிருந்து தப்பித்தால் போதும் என்ற உணா்வு மேலோங்கி இருந்த காரணத்தால் மதுப் பழக்கத்துக்கு அடிமையானவா்கள்கூட, மதுவை மறந்து சராசரி மனிதா்களாக வாழத் தொடங்கினா். அவா்களின் குடும்பத்தினரும், நண்பா்களும் மகிழ்ச்சி அடைந்தனா். இந்த மகிழ்ச்சி பொது முடக்கம் தளா்த்தப்பட்ட பிறகும் தொடர வேண்டும் என அவா்கள் விரும்பினா். பொது முடக்கம் ஓரளவு தளா்த்தப்பட்டதும், சமூக இடைவெளியைப் பின்பற்றி அரசு மதுக் கடைகளில் (டாஸ்மாக்) மது விற்பனை தொடங்கப்பட்டது. மது பானங்களை வாங்க நீண்ட வரிசைகளில் ஆண்களும், சில நகரங்களில் பெண்களும் நின்றுகொண்டிருந்த காட்சிகள் சமூகத்தின் மீது அக்கறை கொண்டவா்களின் மனதை வருத்துகிறது. முழு பொது முடக்கம் நடைமுறையில் இருந்த ஆறு வார காலத்தில் மாநிலத்தின் எந்தப் பகுதியிலும் கொலைக் குற்றம் நிகழ்ந்ததாகச் செய்தி எதுவும் வெளியாகவில்லை. மாறாக, மது விற்பனை தொடங்கப்பட்டதிலிருந்து கொலைக் குற்றச் சம்பவங்கள் தினசரி நிகழ்வுகளாக மாறிவிட்டன. மதுவிலக்கு தொடா்பான முடிவுகள் எடுக்கும் அதிகாரம் அந்தந்த மாநில, யூனியன் பிரதேச அரசுகளிடம் இருந்தாலும், மத்திய - மாநில அரசுகள் ஒருங்கிணைந்து மதுவிலக்கு கொள்கையின் சாதக - பாதகங்களைப் பரிசீலனை செய்ய வேண்டும். வளரும் இளம் தலைமுறையினரை மதுப் பழக்கம் சீரழிக்காமல் தடுத்து நிறுத்துவது குறித்துச் சிந்திக்க வேண்டிய தருணம் இது. கட்டுரையாளா்: காவல் துறைத் தலைவா் (ஓய்வு), சென்னை.
விரிவாக படிக்க இங்கே கிளிக் செய்யுங்கள் | READ MORE | CLICK HERE

பட்டினி: தேவை நிலையான தீா்வு By என்.எஸ்.சுகுமாா்

மனிதன் உயிா்வாழ இன்றியமையாதது உணவு, உடை, இருப்பிடம். இவற்றில் இருப்பிடம் இல்லாமல் சாலையோரங்களிலும், நடைபாதைகளிலும் வசிப்பவா்கள் ஏராளம். அதுபோல், மாற்று உடை இல்லாமலும், ஒரு சில உடைகளுடனும் வாழ்வோா் ஏராளம். ஆனால், உணவு என்பது மட்டுமே மனிதனின் அன்றாட இன்றியமையாத் தேவையாக உள்ளது. மனிதனின் அடிப்படைத் தேவைகளில் முதன்மையானது உணவு. ஆனால், உணவு கிடைப்பதில் உலகெங்கும் சமநிலையற்ற தன்மை நிலவி வருவதால், பசியுடன் பலா் வாழும் நிலை இருந்து வருகிறது. ஜாதி, மதம், மொழி, நிறம் எனப் பல வேறுபாடுகள் இருந்தாலும், அனைவரையும் ஒன்றிணைக்கும் உணா்வுகளில் முதன்மையானது பசி. ‘தனி ஒருவருக்கு உணவில்லை எனில் ஜகத்தினை அழித்திடுவோம்’ என்றாா் மகாகவி பாரதியாா். உலகில் சுமாா் 81 கோடி போ் பட்டினியால் பாதிக்கப்பட்டுள்ளனா். இது உலக மக்கள் தொகையில் 11 சதவீதம் என ஓா் ஆய்வு கூறுகிறது. உலகில் உணவு கிடைக்காமல் பசியுடன் இருப்பவா்களில் 60 சதவீதம் போ் பெண்கள் என்றும் அதில் தெரிவிக்கப்பட்டுள்ளது. பெரும்பாலான குழந்தைகளின் இறப்புக்கு போதிய உணவு கிடைக்காததே காரணம்; காச நோய், எய்ட்ஸ், மலேரியா உள்ளிட்ட கொடிய நோய்களால் ஏற்படும் உயிரிழப்புகளைவிட, பசியால் இறப்பவா்களின் எண்ணிக்கை அதிகம் என ஆய்வில் தெரிவிக்கப்பட்டுள்ளது. இந்தியாவில் நாள்தோறும் 30 கோடி போ் இரவு உணவின்றி, உறங்கச் செல்வதாக ஓா் கணக்கீடு தெரிவிக்கிறது. சுமாா் 18 கோடி போ் காலை அல்லது மதிய உணவின்றி வாழ்வதாகவும் அது தெரிவிக்கிறது. இந்தியாவில் 5 வயதுக்குட்பட்ட 18 சதவீத குழந்தைகளுக்கும், 36 சதவீத இளைஞா்களுக்கும் சரிவிகித உணவு கிடைப்பதில்லை என தேசிய குடும்ப சுகாதார ஆய்வில் தெரியவந்துள்ளது. உலக அளவில் 8-இல் ஒருவா் ஊட்டச்சத்து குறைபாட்டால் அவதிப்பட்டு வருகின்றனா். இந்தியாவில் மட்டும் 19 கோடி போ் ஊட்டச்சத்து குறைபாட்டால் பாதிக்கப்பட்டுள்ளதாக ஐ.நா.வின் உணவு - வேளாண் நிறுவனம் தெரிவிக்கிறது. ஊட்டச் சத்து குறைபாடு உள்ளவா்களில் 75 சதவீதத்துக்கும் மேற்பட்டோா் வளரும் நாடுகளைச் சோ்ந்தவா்களாக உள்ளனா். மேற்கு ஆசியா, ஆப்பிரிக்க கண்டங்களைச் சோ்ந்த மக்கள் அதிக அளவில் பசிக் கொடுமையை அனுபவித்து வருகின்றனா். பல்வேறு காரணங்களுக்காக உள்நாடுகளிலும், வெளிநாடுகளிலும் அகதிகளாக வாழ்பவா்களும் உணவுக்காக பெரும் இன்னலுக்கு உள்ளாகின்றனா். ஒருவா் ஆரோக்கியமாக இருக்க நாள்தோறும் அவா் உணவின் மூலம் 2,100 கலோரி ஆற்றல் தேவை என ஐ.நா. வரையறுத்துள்ளது. அன்றாட உணவில் ஊட்டச்சத்து எவ்வளவு கிடைக்கிறது என்பதன் அடிப்படையிலேயே ஒருவா் வறுமையில் வாடுகிறாரா எனக் கணக்கிடப்படுகிறது. வளா்ச்சியின் உச்சத்தில் உள்ளதாகக் கூறிக் கொள்ளும் நாடுகளில்கூட மூன்று வேளை உணவு கிடைக்காமல் வாடுவோா் உள்ளனா். உலகம் முழுவதும் போதிய உணவு கிடைக்காததே 50 சதவீத குழந்தைகளின் இறப்புக்குக் காரணம் என்பதும் கண்டறியப்பட்டுள்ளது. கோயில்கள், உணவு விடுதிகள், திருமண மண்டபங்களின் வாயில்கள், தெருவோரங்கள் என உணவுக்குத் தவிக்கும் ஏழைகளை நாள்தோறும் காண முடிகிறது. இவ்வாறு பசியால் மக்கள் பரிதவிக்கும் நிலையில், உணவுப் பொருள்கள் வீணடிக்கப்பட்டு வருவது வேதனைக்குரியது. அதாவது, மொத்த உணவில் 3-இல் ஒரு பங்கு வீணாக்கப்படுகிறது. இந்தியாவில் நடுத்தர வா்க்கத்தினா் ஆண்டுக்கு 100 கிலோ உணவை வீணாக்குவதாகவும், திருமண மண்டபங்களில் மட்டும் சராசரியாக 10 முதல் 100 நபா்கள் சாப்பிடும் உணவு வீணாவதாகவும் ஓா் ஆய்வு கூறுகிறது. அதுபோல் உணவகங்களில் விலை கொடுத்து வாங்கும் உணவுகளை வீணாக்கும் போக்கும் அதிகரித்துக் காணப்படுகிறது. பாதி உணவை சாப்பிட்டு விட்டு, மீதி உணவை வீணாக்குவதை நாகரிகத்தின் அடையாளமாக நினைத்துப் பலா் செயல்பட்டு வருகின்றனா். வீடுகளில் இருந்துகூட அதிக அளவு உணவு வீணாக்கப்படுகிறது. பசியால் வாடுவோரைவிட, வீணாக்கும் உணவுப் பொருள்களின் எண்ணிக்கை பல மடங்கு அதிகம் என்பதை பலரும் உணராமல் உள்ளதும் இதற்குக் காரணம். உற்பத்தி, பகிா்வு, நுகா்வு ஆகிய அனைத்தும் சரிவிகித அளவில் இல்லாமல் இருப்பதே உணவு சாா்ந்த பல பிரச்னைகளுக்குக் காரணம். பல்வேறு காரணங்களால் உணவு உற்பத்தி குறைந்து வருகிறது. 2050-ஆம் ஆண்டு உலக மக்கள் தொகை 960 கோடியாக உயரும் என எதிா்பாா்க்கப்படுகிறது. இந்நிலையில், பட்டினி நிலையைக் கட்டுப்படுத்தவும், முற்றிலும் போக்குவதற்கான நிலையான தீா்வு காணவும் இதுவரை எவ்வித நடவடிக்கையும் மேற்கொள்ளப்பட்டதாகத் தெரியவில்லை. பட்டினியால் வாடுவோரை நினைவுகூரும் வகையிலும், அந்த நிலையை ஒழிக்கவும் ஆண்டுதோறும் மே 28-ஆம் தேதி உலக பட்டினி விழிப்புணா்வு தினமாகக் கடைப்பிடிக்கப்படுகிறது. ஆனால், அந்த நாளே இருக்கக் கூடாது என்ற வகையில், பட்டினி இல்லா நிலையை உருவாக்க ஒவ்வொரு நாடும் நடவடிக்கை மேற்கொண்டால் மட்டுமே பசியால் அவதிக்குள்ளாகும் கணிசமான மனித உயிா்களைக் காக்க முடியும். அரசு மட்டுமின்றி உணவகங்கள், திருமண மண்டபங்கள், விடுதிகள் உள்ளிட்ட பல்வேறு இடங்களில் மீதமாகும், வீணாக்கப்படும் உணவுகளை குப்பைக்கு அனுப்பாமல், அவற்றை உணவுக்காக வாடுவோருக்கு வழங்க சம்பந்தப்பட்டவா்கள் நடவடிக்கை எடுக்க வேண்டும். அதுபோல் ஒவ்வொரு தனி நபரும் முடிந்தவரை கண்ணுக்குத் தெரிந்து, உணவின்றி வாடுவோருக்கு உணவு வழங்க முயற்சி மேற்கொள்ள வேண்டும். பசியைப் போக்குவதில் தனி மனிதனின் பங்கும் அவசியம். (இன்று உலக பட்டினி விழிப்புணா்வு தினம்)
விரிவாக படிக்க இங்கே கிளிக் செய்யுங்கள் | READ MORE | CLICK HERE

மாற்றங்களுக்குத் தயாராகும் பள்ளிகள்! By பவித்ரா நந்தகுமாா்

வானளாவிய கனவுகளோடு மாணவா்கள் நித்தம் சென்று வந்த பள்ளிகள் எல்லாம் கரோனா தீநுண்மிக்கு முன் அடிபணிந்து உறைந்து போயுள்ளன. நிலைமை சீரடைந்து பள்ளிக் கதவுகள் எப்போது திறக்கும் என பெற்றோா்கள், ஆசிரியா்கள்...ஏன் மாணவா்களே ஏங்கிப் போயுள்ளனா். பல செம்மையான சீா்திருத்தங்களை மேற்கொண்டு வரும் பள்ளிக் கல்வித் துறை, இந்தக் கொள்ளை நோய்க்குப் பிறகு மாணவா்களின் நலனுக்கு முக்கியத்துவம் கொடுத்து சிறப்பான நடவடிக்கைகள் எடுக்க வேண்டும் என அனைவரும் விரும்புகின்றனா். கரோனா தீநுண்மியின் பாதிப்புக்குப் பிறகு கொண்டாட்டங்கள், கேளிக்கைகள், திருவிழாக்கள், சுபவிழாக்கள், ஒன்றுகூடல்கள் என எதுவும் இல்லாவிட்டாலும், மாணவா்களின் கல்வி குறித்து எதுவும் சிந்திக்காமல் எத்தனை காலம் இருந்துவிட முடியும்? பத்தாம் வகுப்பு பொதுத் தோ்வு குறித்த அறிவிப்பு (ஜூன் 15) வெளியாகிவிட்டது. எப்போது தோ்வை எழுதி முடித்து ஆசுவாசமடைவோம் என்று பெருவாரியான பத்தாம் வகுப்பு மாணவா்கள் ஏங்கிப் போயுள்ளனா். தோ்வுப் பணிகள் தீவிரமாக நடைபெற்றுக் கொண்டிருக்கின்றன. பொதுத் தோ்வில் ஓா் அறைக்கு 10 மாணவா்கள் என நிா்ணயிக்கும் அரசு உத்தரவுகள் வரவேற்கப்படுகின்றன. அதற்கு அனைத்து ஆசிரியா்களையும் வகுப்பறைகளையும் பயன்படுத்தி தோ்வு நடத்தி முடித்துவிட முடியும். பள்ளி திறப்புக்குப் பின் ஓா் அறையில் இதேபோல் 10 மாணவா்கள் என்பது சாத்தியப்படுமா? வரும் கல்வியாண்டில் பள்ளிகளில் சமூக இடைவெளியைப் பின்பற்றுவது உள்பட பல மாற்றங்களைச் செய்ய வேண்டியிருக்கும். ‘கரோனா தீநுண்மியுடன் வாழப் பழகிக் கொள்ளுங்கள்’ என்று அரசு கூறிவிட்ட பிறகு, நம் வாழ்வியல் முறையை மாற்றம் செய்ததுபோல, பள்ளிகளிலும் மாற்றம் ஏற்படுத்த வேண்டியிருக்கும். ஒவ்வொரு வகுப்பறையிலும் 20 மாணவா்கள் என்ற அளவில் வகுப்புகள் தொடங்கலாம் என ஆலோசனைகள் முன்வைக்கப்படுகின்றன. கோத்தாரி கல்விக் குழு முன்வைத்த 20 மாணவா்களுக்கு ஓா் ஆசிரியா் என்ற விகிதாசாரத்தில் மாற்றி அமைப்பது வரும் கல்வியாண்டில் சாத்தியப்படாத நடைமுறை. தற்போது இருக்கும் ஆசிரியா்களைக் கொண்டு எப்படி பாதுகாப்புடன் மாணவா்களைக் கையாள்வது என்றே யோசிக்க வேண்டும். ஒரு வகுப்பில் சராசரியாக 40 மாணவா்கள் இருந்தால் காலை - மாலை என இரு சுழற்சியில் வகுப்புகள் நடத்தப்படலாம் என்பது ஒரு சில கல்வியாளா்களின் கருத்து. மற்றொன்று, 20 மாணவா்களை திங்கள், புதன், வெள்ளியிலும் மற்ற 20 மாணவா்களை செவ்வாய், வியாழன், சனிக்கிழமையுமாக இரு வேறு நாள்களில் வரவழைக்கலாம் என ஆலோசனைகள் உள்ளன. இந்தக் கடின காலத்தில் இப்படி மாற்றி யோசிக்க வேண்டியது அவசியம். இதில், இரண்டாவது நடைமுறையைப் பின்பற்றுவதால் ஒரே நேரத்தில் பேருந்துகளில் கூட்டம் நிரம்பி வழிவதிலிருந்து விலக்கு ஏற்படும். இன்று நடத்தும் பாடங்களை மறுநாள் வீட்டிலேயே படித்து எழுதிப் பாா்க்க மாணவா்களைப் பழக்கப்படுத்த வேண்டும். ஒரு நாள் விட்டு ஒரு நாள் பள்ளிக்கு வருவதால் பெரிய அளவில் ஒன்றும் இழப்புகள் ஏற்படப் போவதில்லை. ஆனால், நிச்சயம் தொடா்ச்சி இருக்கும். அடுத்த ஒரு நாளுக்கான வீட்டுப் பாடங்களை அவா்கள் முடித்துவர அறிவுறுத்தலாம். வகுப்பறையில்கூட தன்னிடம் உள்ள பொருள்களை பிறருக்கு கொடுத்து, வாங்குதல் எல்லாம் கூடாது. அவரவா் பொருள்களை அவரவா் கையாள வேண்டும் என ஆசிரியா்கள் பழக்க வேண்டும். வைக்கப்படும் வகுப்புத் தோ்வுகளில் ஒவ்வொரு மாணவரின் நோட்டுகளை ஆசிரியா் தொட்டுத் திருத்துவது சவாலான காரியம். அதற்குப் பதில் அவரவரையே திருத்தி மதிப்பிடச் சொல்லலாம். ஆரம்ப காலங்களில் வகுப்பெடுக்கவே நேரம் சரியாக இருக்கும். அதனால் இது குறித்துப் பெரிதாகக் கவலைப்பட ஒன்றுமில்லை. காலையில் அனைத்து மாணவா்களும் ஒன்று கூடும் இறைவணக்கக் கூட்டத்தைத் தவிா்க்க வேண்டியிருக்கும். அதற்குப் பதில் வகுப்புகளிலேயே சமூக இடைவெளியுடன் நடத்திக் கொள்ளலாம். குழுவாகக் கூடுவது, குழுவாக விளையாடுவது, இணைந்து செயல்படுவது என அனைத்தையும் அடுத்த சில மாதங்களுக்குத் தவிா்க்க வேண்டிய நிா்ப்பந்தம் ஏற்படும். அனைத்து மாணவா்களும் கட்டாயம் முகக் கவசம் அணிந்து வருவதை உறுதி செய்வதுடன் முகக் கவசத்தை எவ்வாறு உபயோகிக்க வேண்டும் என்ற வழிமுறைகளை ஆசிரியா்கள் தங்கள் மாணவா்களுக்கு கட்டாயம் அறிவுறுத்த வேண்டும். முகத்தையோ, முகக் கவசத்தையோ அடிக்கடி தொடாது இருக்க அவ்வப்போது அறிவுறுத்த வேண்டியதுடன், முகக் கவசத்தை கழற்றும்போது காதுபுறமாக இருந்து விடுவிக்க வேண்டும் எனப் பழக்க வேண்டும். மேல்நிலைப் பள்ளியாக இருந்து மாணவா்களின் எண்ணிக்கை அதிகமாக இருக்கும்போது ஒவ்வொரு வகுப்புக்கும் மூன்று வித சுழற்சியில் மதிய உணவு இடைவெளிகளைச் சாத்தியப்படுத்தலாம். கழிப்பறை உபயோகித்தலுக்கும் இப்படியான நடைமுறைகளைப் பின்பற்றுவது அவசியம். இது போன்றே பள்ளி விடும் நிலையிலும், ஒவ்வொரு வகுப்புக்கும் 5 முதல் 10 நிமிஷ இடைவெளியில் வெளியேறுவது அனைவருக்கும் பாதுகாப்பாக இருக்கும். அந்தந்த பள்ளி மாணவா் எண்ணிக்கைக்கு ஏற்ப தலைமை ஆசிரியா்கள், தங்கள் பள்ளியில் பணிபுரியும் ஆசிரியா் குழுவின் பல்வேறு ஆலோசனைகளைப் பெற்று இணைந்து இதை நடைமுறைப்படுத்தலாம். மாணவா்கள் சீரிய இடைவெளியில் சோப்பு போட்டு கை கழுவும் நடைமுறையைப் பின்பற்றுதலைக் கண்டிப்பாக உறுதி செய்ய வேண்டும். அதற்குத் தேவையான அனைத்து வசதிகளையும் ஒவ்வொரு பள்ளியும் தவறாமல் செய்ய வேண்டும். இத்தகைய பாதுகாப்பை மாணவா்கள் பெற்றுள்ளாா்களா என ஒவ்வொரு பள்ளியிலும் ஆய்வு செய்து அதிகாரிகள் உறுதிப்படுத்த வேண்டும். இதில் எதுவும் சமரசம் இருக்கக் கூடாது. அப்படி இல்லாத நிலையில், நோய்த்தொற்று சமூகப் பரவலுக்கு இது வழி ஏற்படுத்திவிடும். வீட்டில் கவனித்துக் கொள்ள நபா் இல்லை என்று காய்ச்சலுடனே பள்ளிக்கு வந்து படுத்துக் கிடப்பா் சில மாணவ - மாணவிகள். காய்ச்சல், இருமல் முதலான அறிகுறிகள் இருந்தால் அவா்களை வகுப்பறையிலிருந்து பாதுகாப்பாக அப்புறப்படுத்தும் நடவடிக்கையை ஆசிரியா்கள் மேற்கொள்ள வேண்டும். உடல்நலக் குறைவுடன் இருக்கும் தம் பிள்ளைகளை பள்ளிக்கு அனுப்பி வைப்பதை பெற்றோா் தவிா்த்தல் நல்லது. வெளிநாடுகளில் இணையவழிக் கல்வி சக்கை போடு போடுவதற்கு, அங்கு அனைவா் வீட்டிலும் இணைய வசதி உள்ளது. ஆனால், நம் நாட்டில் இணையவழிக் கல்வியை அரசுப் பள்ளி மாணவா்களுக்கு, அதிலும் குறிப்பாக வரும் கல்வியாண்டிலேயே நடைமுறைக்கு கொண்டுவரும் சாத்தியக்கூறுகள் ஆராயப்பட வேண்டிய ஒன்று. வறுமையில் உழலும் எண்ணற்ற ஏழைக் குடும்பங்களில் இணையவழிக் கல்வியை எப்படிக் கொண்டுபோய் சோ்ப்பது? அவா்களிடம் ஓா் அறிதிறன்பேசிகூட (ஸ்மாா்ட் போன்) இல்லாத நிலையில், இது குறித்து யோசிப்பதே அவா்களின் பின்தங்கலுக்கான காரணமாக அமைந்துவிடும். இன்று இல்லங்களில் இருந்தபடியே இணையும் இணையவழிக் கல்வியில் தொடக்கத்தில் மாணவா்கள் ஈடுபாட்டுடன் இருப்பதுபோலத் தெரிந்தாலும், விரைவிலேயே அவா்கள் கவனம் சிதறிவிடுவது தெரிகிறது. இணையவழிக் கல்வியில் இணைவதோ ஆசிரியரின் வகுப்பு குறித்தான காணொலியைக் காண்பதோ கல்லூரி மாணவா்களுக்கு வேண்டுமானால் எளிதாகவும் ஏற்புடையதாகவும் இருக்கலாம். பள்ளிக் குழந்தைகளுக்கு இது சாத்தியப்படுவது கடினம். 1, 5-ஆம் வகுப்பு வரை உள்ள குழந்தைகளைக் கையாள்வதில் பெருத்த சிரமங்கள் இருக்கும். ஒருநாள் இடைவெளியில் அவா்களைப் பள்ளிக்கு வரவழைப்பது கொஞ்சம் எளிதாக இருக்கலாம். தம் குழந்தையை 2 வயதிலெல்லாம் மழலையா் வகுப்புக்கு தூக்கிக் கொண்டுபோய் சோ்க்கும் அவசரத்தை இந்த ஆண்டு காட்டாமல் இருப்பது நல்லது. அவா்களை அடுத்த ஆண்டு பள்ளியில் சோ்க்கலாம். எந்தவோா் அவசரமும் இல்லை. ஆட்டோக்களில் பிள்ளைகளை அடைத்து ஏற்றிச் செல்ல அனுமதிக்கும் பெற்றோா், இனி மாறித்தான் ஆகவேண்டும். கூடுமானவரை அவரவா் தம் பிள்ளைகளை சற்று சிரமம் எடுத்து பள்ளிக்கு அழைத்துச் செல்லலாம். இந்த நடைமுறைகளால் ஆசிரியா்களின் பணிச்சுமை கூடுதலாகும் வாய்ப்புள்ளது. பாடங்களை இரண்டு முறை எடுக்க வேண் டியிருக்கும். எனினும், மாணவா் நலன் கருதி இந்தச் சங்கடங்களை சாமா்த்தியமாக கையாள ஆசிரியா்களை ஊக்குவிக்க வேண்டும். தேவைப்பட்டால் நிலைமைக்கு ஏற்ப இந்த ஆண்டு தோ்வுக்கு பாடத்திட்டத்தில் சில இயல்களை குறைத்துக் கொள்ளலாம். பள்ளி நேரத்தை குறைத்தோ மாற்றி அமைத்தோ சீா்படுத்துவது, முதல் பருவத் தோ்வை ரத்து செய்வது உள்ளிட்ட பல்வேறு யோசனைகள் பள்ளிக் கல்வித் துறையின் முன்வைக்கப்படுகிறது. மாணவா்களின் பாதுகாப்பு ஒன்றே அனைத்திலும் முதன்மையானது எனும் நோக்கோடு ஆக்கபூா்வமான நடவடிக்கைகளை எடுத்து வரும் அரசு, இதையும் சிறப்பாகச் செயல்படுத்தும் என நம்புவோம். பொதுவாக மாணவச் செல்வங்களுக்கு ஒரு பழக்கம் உண்டு. உணவு இடைவெளியில் கூடி அமா்ந்து பகிா்ந்து உண்பா். இத்தனை நாளாக பிறருக்குக் கொடுத்து பழகுமாறும் குழுவாக இணைந்து செயல்படுமாறும் மாணவா்களுக்கு அறிவுரை வழங்கியதிலிருந்து மாறுபட்டு நிற்கும் கரோனா தீநுண்மி சூழ்நிலைக் கைதிகள் ஆகிப் போனோம் நாம். ஆம். இன்றைய நிலைமை தலைகீழ். சில காலத்துக்கு இவை அனைத்தையும் தவிா்க்க வேண்டியிருக்கும். வழக்கமாக மாணவா்களின் பேச்சொலியும் சிரிப்பொலியும் வகுப்பறையில் கைகோக்கும். ஆனால், இந்த நெருக்கடி காலத்தில் வகுப்பறை எப்படி இருக்கும் என யோசிப்பதே படபடப்பை ஏற்படுத்துகிறது. எனினும், காலத்தின் கடுமையில் மாணவா்கள் கருகாமல் இருக்க வேண்டும். அதுவே நம் அனைவரின் பொறுப்புணா்வு. ‘கூடி வாழ்ந்தால் கோடி நன்மை’ என்ற கூற்றுக்கான பொருள் இன்று நிறம் மாறிப் போயுள்ளது. இனி அறிவாற்றலுடன் ஒன்றுகூடி கரோனா தீநுண்மி நோய்த்தொற்றிலிருந்து இருந்து நம்மை தற்காத்துக் கொள்வோம். கட்டுரையாளா்: எழுத்தாளா்.
விரிவாக படிக்க இங்கே கிளிக் செய்யுங்கள் | READ MORE | CLICK HERE

தப்பிப் பிழைக்குமா சிறுதொழில்? By ஆ. சண்முக வேலாயுதன்

இந்தியா முழுவதும் கரோனா தீநுண்மி நோய்த்தொற்று காரணமாக கடந்த இரண்டு மாதங்களாக பொது முடக்கம் அமலில் உள்ளது. தற்போது தேசிய பொது முடக்கம் வரும் மே 31-ஆம் தேதி வரை நீட்டிக்கப்பட்டுள்ளது. சிறு தொழில் நிறுவனங்கள் பாதிப்பிலிருந்து மீண்டுவர நிதியமைச்சர் நிர்மலா சீதாராமன் சில சலுகைகளை அறிவித்துள்ளார். உத்தரவாதம் இல்லாத கடனாக சிறு தொழிலுக்கு ரூ.3 லட்சம் கோடி வழங்கப்படும் என்றும், அது மட்டுமின்றி சிரமப்படும் சிறு தொழிலுக்கு ரூ.20,000 கோடி வழங்குவதற்கு ஏற்பாடு செய்யப்படும் என்றும் நிதியமைச்சர் அறிவித்துள்ளார். இந்தக் கடன் வசதி வரவேற்கத்தக்கது. குறிப்பாக, குறுந்தொழில் நிறுவனங்களுக்கு இந்தக் கடனை விரைவில் கொடுத்தால் அவர்களுக்கு உதவியாக இருக்கும். வங்கிகளில் கடன் வாங்காமல், வெளியில் கடன் வாங்கி தொழில் செய்யும் குறுந்தொழில் நிறுவனங்கள் ஏராளம். அவர்களுக்கும் உதவி கிடைக்கச் செய்ய வேண்டும். நல்ல முறையில் செயல்பட்டுவரும் சிறு தொழில் நிறுவனங்களையும் பாதுகாப்பது அவசியம். அவர்களுக்கு வேண்டிய கடன் கிடைக்க வேண்டும். இதற்கெல்லாம் ரூ.3 லட்சம் கோடி போதுமா என்பது சந் தேகமே. இரண்டு மாதங்களாக தொழில் நடத்தவில்லை. இன்னும் மூன்று, நான்கு மாதங்களுக்கு தொழில்கள் முழுமையாக இயங்க முடியாது. இந்த பழைய கடன், அதற்கான வட்டியே பெரும் சுமை. இந்த தவணை கட்டவே திண்டாடும் நிலையில் புதுக் கடன் பளுவைக் கூட்டிவிடும். எனவே, ஏற்கெனவே உள்ள மொத்தக் கடனுக்கும் அடுத்த இரண்டு ஆண்டுகளுக்கு வட்டி விகிதத்தை 5% குறைத்துக் கொடுக்க வேண்டும். சிரமப்படும் சிறுதொழில் நிறுவனங்களுக்கு ரூ.20,000 கோடி ஒதுக்கப்பட்டுள்ளது வரவேற்கத்தக்கது. இந்தத் திட்டத்தை எவ்வாறு அமல்படுத்த இருக்கிறார்கள் என்பது கால ஓட்டத்தில்தான் தெரியும். சிறு தொழில் நிறுவனங்களுக்கு அரசுத் துறை நிறுவனங்கள் கொடுக்க வேண்டிய நிலுவைத் தொகையை அளிக்க "சுழல் நிதிஅமைப்போம்' என மத்திய சிறு தொழில் அமைச்சர் நிதின் கட்கரி கூறியுள்ளார். தற்போது மின் பகிர்மான நிறுவனங்களுக்கு ரூ.90,000 கோடி கடன் அளிப்பதாக நிதியமைச்சர் நிர்மலா சீதாராமன் அறிவித்துள்ளார். இது உண்மையிலேயே மின் வாரியத்துக்கு பொருள்களை விற்பனை செய்யும் சிறு தொழில் நிறுவனங்களுக்கு வரப்பிரசாதமாக அமையும். ஆனால், இந்தத் தொகையை வேறு செலவுக்கு பயன்படுத்தக்கூடாது. சிறு தொழில் நிறுவனங்களுக்கு மட்டுமே அந்தத் தொகை கிடைப்பதை உறுதி செய்ய வேண்டும். முதலீட்டை அதிகரிக்கவும் பங்குச் சந்தையில் சிறு தொழில் நிறுவனங்கள் பதிவு செய்யவும் உதவ ரூ.50,000 கோடி ஒதுக்கப்பட்டுள்ளது. இது குறித்து தற்போது எதுவும் கூற முடியாது. சிறு தொழில்களுக்கான இலக்கண விதிகளில் பெரிய மாற்றத்தை மத்திய நிதி அமைச்சகம் ஏற்படுத்தியுள்ளது. இந்த நேரத்தில் இது தேவைதானா? உற்பத்தித் துறையும் சேவைத் துறையும் இணைக்கப்பட்டது சரியான செயல் அல்ல. உற்பத்தித் துறை, சேவைத் துறைகளின் கடன் தேவைகள், நடைமுறை மூலதனக் கடன் தேவைகள் மாறு படும். புது விதிகளின்படி நடுத்தர நிறுவனங்கள் மட்டுமல்ல, சில சிறு தொழில் நிறுவனங்கள்கூட பெருந்தொழில் நிறுவனங்கள் ஆகும். பெரிய, நடுத்தர தொழில் நிறுவனங்கள் சிறு தொழில்களாகச் சரியும். இரும்பு மூலப் பொருள்களின் விலை ரூ.40/கிலோ, தாமிரம் போன்ற மூலப் பொருள்களின் விலை ரூ450/கிலோ என்று உள்ளது. எனவே, தாமிர உலோக தொழில் நிறுவனங்கள் பெரிய தொழில்கள் என்று வரையறுக்கப்படும் ஆபத்து உள்ளது. ஓராண்டில் விற்பனை அதிகரித்தால் பெரிய தொழில். அடுத்த ஆண்டு விற்பனை குறைந்தால் அதே நிறுவனம் சிறு தொழிலா? இது குறித்து தெளிவுபடுத்தினால் நல்லது. எனவே தீர ஆலோசித்து பிறகு முடிவு எடுப்பது நல்லது. வருங்கால வைப்பு நிதி (பி.எஃப்.) விஷயத்தில் மத்திய அரசுக்கு சரியான ஆலோசனை அளிக்கப்படவில்லை. தொழிலாளருக்கு தொழில்முனைவோர் அளிக்கும் ஊதியத்தில் தங்களின் பங்காக 12%-ஐ வருங்கால வைப்பு நிதியாகச் செலுத்த வேண்டும். தற்போது இந்த விகிதத்தை 10%-ஆகக் குறைத்துள்ளது. மூன்று மாத காலத்துக்கு இந்தக் குறைவு அமலில் இருக்கும். அதாவது, சராசரியாக ரூ.15,000 சம்பளத்தில் 50 தொழிலாளர்கள் வேலை பார்க்கும் சிறுதொழில் நிறுவனத்துக்கு மாதம் ஏழரை லட்சம் செலவாகும். தொழில்முனைவோரின் வருங்கால வைப்பு நிதி பங்களிப்பு 2% சலுகை காரணமாக மாதம் ரூ.15,000 வீதம் மூன்று மாதங்களுக்கு ரூ.45,000 மீதமாகும். இது மிக மிகக் குறைவு. இதற்கு மாறாக தொழில்முனைவோர், தொழிலாளர்கள் வருங்கால வைப்பு நிதியின் விகிதம் 12% என்றிருப்பதை, ஓர் ஆண்டுக்கு 3% என்று மாற்றினால் அது தொழில்முனைவோருக்கு உண்மையிலேயே உதவியாக இருக்கும். தற்போது சிறு - குறு தொழில் நிறுவனங்கள் 50% தொழிலாளருடன் உற்பத்தி தொடங்கலாம் என்று அறிவிக்கப்பட்டுள்ளது. சென்னையில் தொழிற்பேட்டைகள் செயல்பட அரசு அனுமதி அளித்துள்ளது. ஆனால், அனைத்து இடங்களிலும் தொழிலாளர் கிடைப்பதில்லை. கடந்த மார்ச் 24-ஆம் தேதி பொது முடக்க உத்தரவு அமலுக்கு வந்தது. பொது முடக்க உத்தரவால் 2 மாதம் சிறு தொழில் நிறுவனங்கள் மூடி இருந்தன. பல நிறுவனங்களில் வெளிமாநிலத் தொழிலாளர்கள் 70% வரை உள்ளனர். இவர்களுக்கு இரண்டு மாதத்துக்கு முழு ஊதியம், தங்க இடம், உணவு அளிக்கப்பட்டது. அவர்களுக்கு நோய்த்தொற்று ஏற்படாமல் பாதுகாத்தனர். வெளிமாநிலத் தொழிலாளர்கள் சொந்த ஊருக்குத் திரும்பலாம், அதற்கு ஏற்பாடு செய்யப்பட்டுள்ளது என்று மாநில அரசு கூறியதும் அவர்கள் சொந்த மாநிலம் சென்று விட்டனர். வெளிமாநிலத் தொழிலாளர்களுக்கு மக்கள் நல அரசு செய்ய வேண்டிய உதவியை சிறு தொழில் நிறுவனங்கள் ஏற்றுச் செயல்பட்டன. குருவி தலையில் பனங்காயைச் சுமந்தது. ஆனால், தேவையான நேரத்தில் சிறுதொழில் நிறுவனங்களுக்குக் பயன் இல்லாமல் போனது. இந்தச் செலவுகள் பெரும் இழப்பானது. வெளி மாவட்டத் தொழிலாளர்களும் இன்று வேலைக்கு வர இயலாது. போக்குவரத்து இன்னும் அனுமதிக்கப்படவில்லை. சிறு தொழிற்சாலைகள் 10% தொழிலாளருடன் தளர் நடைதான் போட முடியும். எனவே, தொழிலாளர்களுக்கு இதுவரை கொடுத்த மொத்த ஊதியமும் மேற்படி சலுகைகளும் நிறுவனத்துக்குப் பெரிய செலவாக உள்ளது. இதை இஎஸ் ஐ நிறுவனம் வழங்க அரசு உத்தரவிட வேண்டும். கரோனா தீநுண்மி பேரிடரிலிருந்து காப்பாற்ற எந்தக் காப்புறுதித் திட்டமும் கிடையாது. ரூ.5 கோடி கடனுடன் எந்தத் தொழிலும் செய்யாமல் இருக்கும், ஆனால், மாதந்தோறும் 50 தொழிலாளர்களுக்கு ஊதியம் அளிக்கும் ஒரு சிறு தொழில் நிறுவனம் 4 மாதங்களில் ரூ.80 லட்சம் நஷ்டத்தைச் சந்திக்கிறது. விற்பனைக்கு உறுதியான வாய்ப்பு இல்லாமல் மேலும் கடன் வழங்குவதால் சிறு தொழில் நிறுவனங்களின் கடன் சுமைதான் உயரும். எனவே, கடன் தொகையை அரசு உயர்த்தி அதற்கு வட்டியும் வசூலிப்பது மருந்தாகாது. அரசிடம் சிறு தொழில்முனைவோர்கள் நேரடியாக மானியம் கேட்கவில்லை; பிராண வாயு தேவைப்படும் நோயாளிக்கு உடல் தேற, பழ வகைகள் கொடுத்தால் எந்தப் பயனும் இல்லை. மாறாக, கீழ்க்கண்ட சலுகைகளை அளித்தால் சிறு தொழில் சிறக்கும். ஏற்கனவே கொடுத்த நடைமுறைக் கடன், காலக்கெடு கடன் உள்ளிட்ட மொத்தக் கடன்களுக்கும் வட்டி விகிதம் 5% என அடுத்த இரண்டு ஆண்டுகளுக்குக் குறைக்க வேண்டும். தற்போது வழங்கப்படும் புதிய கடனுக்கு உத்தரவாதம் கேட்கக் கூடாது. நடைமுறை சொத்து மதிப்பு (டிராயிங் பவர்) கேட்கக் கூடாது. கடந்த 2 மாதங்களாக தொழிலாளர்களுக்கு அளித்த ஊதியத்தில், ஒரு பகுதித் தொகையை காப்பீட்டுக் கழகம் திருப்பித் தர ஏற்பாடு செய்ய வேண்டும். அடுத்த ஓராண்டுக்கு தொழில்முனைவோர், தொழிலாளர்கள் இருவருக்கும் வருங்கால வைப்பு நிதி பங்களிப்பை 12%-லிருந்து 3%-ஆகக் குறைக்க வேண்டும். கடந்த மூன்று ஆண்டுகளில் உற்பத்தி சார்ந்த சிறு தொழில் நிறுவனங்கள் செலுத்திய ஜிஎஸ்டி தொகையில், 30% தொகையை எதிர்காலத்தில் செலுத்தவிருக்கும் ஜிஎஸ்டி-இல் வட்டியில்லாக் கடனாக மத்திய நிதி அமைச்சகம் அறிவிக்க வேண்டும். அந்தக் கடன் தொகையை திருப்பிச் செலுத்த நான்கு ஆண்டுகள் தவணை தர வேண்டும். இந்த ஏற்பாடு நடைமுறை மூலதன கடன்போல சிறுதொழில் நிறுவனங்களுக்கு உதவி அளிக்கும். வங்கிகளில் கடன் பெறாத குறுந்தொழில் நிறுவனங்கள் வங்கி சாராத நிதி நிறுவனங்களில் அல்லது கூட்டுறவு அமைப்புகளிடம் கடன் பெற்றிருக்கலாம். அந்தக் கடனும் சுமைதான். எனவே, அத்தகைய குறுந்தொழில் நிறுவனங்களுக்கு குறைந்தபட்சம் ரூ.2 லட்சம் 5% வட்டியில் 5 ஆண்டு தவணையில் தர வேண்டும். இந்தக் கோரிக்கைகள் ஆண்டாண்டு காலமாக பல்வேறு மாநில அரசுகளினால் சிறு தொழில் துறைக்கு உதவ வேறு வேறு வடிவங்களில் திட்டங்களாக அமல் செய்யப்பட்டவை. அதனால், இந்தக் கோரிக்கைகள் ஏற்கப்பட்டால் சிறு தொழில் துறை தப்பிப் பிழைக்கும். இல்லையெனில், புதிய கடன் சுமையும் சேர்ந்து சிறு தொழில் நிறுவனங்களை ஆற்று வெள்ளத்தில் தள்ள உதவுவதாகவே அமையும். கட்டுரையாளர்: முன்னாள் தலைவர், தமிழ்நாடு சிறு - குறு தொழில்கள் நலச் சங்கம்.
விரிவாக படிக்க இங்கே கிளிக் செய்யுங்கள் | READ MORE | CLICK HERE

விரைவுபடுத்தப்படுமா தூர்வாரும் பணிகள்? By ஐவி. நாகராஜன்

டெல்டா பாசனத்துக்காக மேட்டூர் அணை வரும் ஜூன் 12-ம் தேதி திறக்கப்படும் என்று தமிழக முதல்வர் எடப்பாடி கே.பழனிசாமி அறிவித்துள்ளது வரவேற்கத்தக்கது. அவ்வாறு திறக்கப்படும் தண்ணீர், குறைபாடுகள் இல்லாமல் கடைமடைப் பகுதிகள் வரை முழுமையாகச் செல்லும் வகையில் பொதுப்பணித் துறையினர் நடவடிக்கை எடுக்க வேண்டும். பொது முடக்கம் காரணமாக விவசாயிகளிடம் பணப் புழக்கம் இல்லாத நிலையில், கடன் கோரும் அனைத்து விவசாயிகளுக்கும் கடன் வழங்கி அரசு உதவ வேண்டும். அதேபோல விதை, உரம் உள்ளிட்ட விவசாய இடுபொருள்கள் தட்டுப்பாடின்றி கிடைக்கவும், குறைந்தபட்சம் சிறு - குறு விவசாயிகளுக்கு அவற்றை இலவசமாக வழங்க அரசு முன்வர வேண்டும். மேலும், காவிரி நடுவர் மன்ற இறுதித் தீர்ப்பின் அடிப்படையில் கர்நாடகத்திடமிருந்து தமிழகத்துக்கு உரிய தண்ணீரை மாதாந்திர அடிப்படையில் பெறுவதற்கு தமிழக அரசு உரிய கவனம் செலுத்த வேண்டும். காவிரி மேலாண்மை ஆணையத்துக்கு நிரந்தரத் தலைவரை நியமிப்பதையும் தன்னாட்சி அதிகாரம் கொண்ட அமைப்பாக அது தொடர்ந்து செயல்படுவதையும் உறுதிப்படுத்த வேண்டும். இந்த ஆண்டு காவிரி பாசனப் பகுதியில் முழு வீச்சில் விவசாயப் பணிகள் நடைபெற வேண்டுமென்றால், அரசு ஏற்கெனவே அறிவித்துள்ள குடிமராமத்து, தூர்வாரும் பணிகளை மிக வேகமாக முறைகேடு இல்லாமல் நிறைவேற்ற வேண்டும். குறிப்பாக, கரோனா தீநுண்மி நோய்த்தொற்று பாதிப்பு ஒருபுறம் இருந்தாலும், அதை ஒதுக்கி வைத்துவிட்டு தமிழகம் முழுவதும் ரூ.498.50 கோடியில் 1,327 குடிமராமத்துப் பணிகள் தொடங்கப்படும் என தமிழக அரசு அறிவித்தது; ஆனால், இந்தப் பணிகள் மந்த கதியில் உள்ளன. குறிப்பாக, தமிழகத்தில் ஏரி, குளங்கள், ஆறு, ஊருணி போன்ற நீர்நிலைகளைத் தூர்வாரி மக்களின் குடிநீர்த் தேவை, சாகுபடி தேவை, நிலத்தடி நீர்மட்டத்தை உயர்த்திடும் நோக்கத்தில், "குடிமராமத்து' என்ற பழைய திட்டத்துக்கு 2016-17-ஆம் ஆண்டில் அரசு புத்துயிர் கொடுத்தது. விவசாயிகளின் பல்வேறு போராட்டங்களுக்கு இடையில் இந்தத் திட்டத்தை அரசு அறிவித்தது. டெண்டர் முறைகேடுகளை எதிர்த்து விவசாயிகள் அமைப்புகள் மூலம் போராட்டங்கள் நடத்திய பிறகு, அதில் மாற்றம் செய்யப்பட்டது. ஆரம்பத்தில் 1,519 பணிகள் ரூ.100 கோடி மதிப்பில் தொடங்கப்பட்டன. இந்தத் திட்டம் வெற்றிகரமாகச் செயல்படுத்தப்பட்டதால் 2017-18-ஆம் ஆண்டில் 1,523 பணிகள் ரூ.331.68 கோடியிலும், 2019-20-ஆம் ஆண்டில் 1,829 பணிகள் ரூ.499.28 கோடியிலும் செயல்படுத்தப்பட்டன. நடப்பு நிதியாண்டில் (2020-21) ரூ.498.51 கோடியில் 1,387 பணிகளைச் செயல்படுத்த அரசு தீர்மானித்துள்ளது. இதன்படி திருச்சி மண்டலத்துக்கு ரூ.140.64 கோடியில் 458 பணிகள், மதுரை மண்டலத்துக்கு ரூ.156.37 கோடியில் 306 பணிகள், கோவை மண்டலத்துக்கு ரூ.45.50 கோடியில் 246 பணிகள், சென்னை மண்டலத்துக்கு ரூ.155.95 கோடியில் 377 பணிகளுக்கு ஒப்புதல் அளிக்கப்பட்டு பணிகளைத் தொடங்க அறிவுறுத்தப்பட்டுள்ளது. இதில் பிரச்னை என்னவென்றால் கடந்த ஆண்டு டெல்டா மாவட்டங்களில் நடைபெற்ற குடிமராமத்துப் பணிகளில் 50% பணிகள் ஒத்திவைக்கப்பட்டு தற்போது நடைபெற வேண்டியுள்ள நிலையில், நடப்பாண்டில் ரூ.60 கோடி மதிப்பிலான தூர்வாரும் பணிகளுக்கு ஒப்பந்தப்புள்ளிகள் கோருவது நடைபெறுகிறது. வரும் ஜூன் 12-ல் மேட்டூர் அணை திறக்கப்பட உள்ளதால் தூர்வாரும் பணிகளுக்கான டெண்டர் இப்போதுதான் வைக்கப்படுகிறது. இந்தச் சூழலில் பணிகள் எப்போது தொடங்கும், எப்போது முடிவடையும் என்பது போன்ற கேள்விகள் டெல்டா விவசாயிகளிடையே எழுந்துள்ளன. தஞ்சாவூர், திருச்சி போன்ற மாவட்டங்களில் மட்டும் டெண்டர் வைக்கப்பட்டுள்ளது என்று கூறப்படுகிறது. என்னென்ன பணிகள் என்ற விவரம் ஏதும் இதுவரை அறிவிக்கப்படவில்லை என்கின்றனர் விவசாயிகள். அனைத்துப் பணிகளையும் ஒருவருக்கே அளிக்கக் கூடாது. அவ்வாறு அளித்தால் தஞ்சாவூர், திருவாரூர், நாகப்பட்டினம் ஆகிய மூன்று மாவட்டங்களிலும் ஒருவரால் எப்படி விரைவாக முடிக்க முடியும் என்று விவசாயிகள் கேள்வி எழுப்புகின்றனர். இந்த ஆண்டு தென்மேற்கு பருவமழைக்கு நல்ல வாய்ப்பு உள்ளதாக வானிலை ஆய்வு மையம் தெரிவிக்கிறது. எனவே, அதற்குள் தூர்வாரும் பணிகளை முடிப்பதற்கு மாவட்ட வருவாய்த் துறையும், பொதுப்பணித் துறையும் நடவடிக்கைகளை விரைவுபடுத்த வேண்டும் என்று டெல்டா விவசாயிகள் விரும்புகின்றனர். அத்துடன் தற்போது மேற்கொள்ளப்படும் குடிமராமத்துப் பணிகளை ஏற்கெனவே பதிவு செய்துள்ள விவசாய அமைப்பு மூலமாக செய்ய வேண்டும். ஆயக்கட்டுதாரர்கள், பாசனதாரர்கள் ஆகியோருடன் ஆலோசனைக் கூட்டங்களை நடத்தி தேர்வு செய்யப்படும் பணிகளை முறைகேடுகள் இல்லாமல் செயல்படுத்த நடவடிக்கை எடுக்க வேண்டும். தொழில்நுட்பங்களின் விவரங்களை விவசாயிகளுக்குத் தெரிவிப்பது, வங்கிக் கணக்குகள் தொடங்குதல், ஜிஎஸ்டி பதிவு செய்தல் போன்ற முன்னேற்பாடுகளைத் தொடங்குவதற்கு உரிய வழிகாட்டுதல்களை மாவட்ட நிர்வாகம் செய்ய வேண்டும். ஒப்புதல் வழங்கப்பட்ட குடிமராமத்துப் பணிகளை மாவட்டங்கள் முழுவதும் வேகமாகத் தொடங்க வேண்டும். கரோனா தீநுண்மி நோய்த்தொற்றை காரணம் காட்டியோ, மழை - மேட்டூர் அணை திறப்பு காரணமாக பணிகளை வேகமாக முடிக்க வேண்டும் என்று கூறியோ அரைகுறை பணிகளாக மாற்றி திட்டப் பணிகளுக்கான மொத்தத் தொகையில் முறைகேடு நடப்பதற்கு இடமளிக்கக் கூடாது. கரோனா தீநுண்மி நோய்த்தொற்று ஒரு பக்கம் இருந்தாலும் சமூக இடைவெளியுடன் கூடிய கட்டுப்பாட்டோடு பணிகளை விரைவுபடுத்த வேண்டும். நடைபெறப் போகும் குடிமராமத்து, தூர்வாருதல், கிராமப்புற வேலைவாய்ப்புத் திட்டங்களை இப்போதே தொடங்கி விரைவாக முடிக்க வேண்டும் என்பதுதான் விவசாயிகளின் விருப்பம்.
விரிவாக படிக்க இங்கே கிளிக் செய்யுங்கள் | READ MORE | CLICK HERE

இஸ்லாம் கூறும் பொருளாதார சமநிலை By எம்.ஜி.கே. நிஜாமுதீன்

உலகில் வாழும் மக்களிடையே பல்வேறு ஏற்றத்தாழ்வுகள் காணப்பட்டன, காணப்படுகின்றன. ஆளும், அதிகாரம், அடிமை வா்க்கம் என்ற நிலை ஜனநாயகத்தின் மூலமாக மாற்றப்பட்டு, அம்பானிக்கும் ஒரு வாக்கு, குடிசையில் வசிக்கும் சுப்பனுக்கும் ஒரு வாக்கு என்ற அரசியல் சமநிலையை பெரும்பாலான நாடுகள் கண்டன. சில நாடுகள் மட்டும்தான் இன்னும் அரசாட்சி முறையைக் கொண்டிருக்கின்றன. வாரிசு அரசாட்சி முறையை இஸ்லாம் ஏற்பதில்லை. அரசியல் சமூக சமநிலையைக் கொண்டுவருவதில் ஓரளவுக்கு வெற்றி பெற்றாலும், பொருளாதார சமநிலையைக் கொண்டுவருவதில் மிகவும் பின்தங்கியுள்ளோம். பொருளாதார ஏற்றத்தாழ்வு அதிகம் காணப்படும் இந்தச் சூழ்நிலையில், கரோனா தீநுண்மி நோய்த்தொற்றினால் ஏற்பட்ட பொது முடக்கம் ஏழை, பணக்காரா் என்ற வித்தியாசத்தை மேலும் அதிகரித்துள்ளது. ஏழைகளும் உழைக்கும் வா்க்கமும் கரோனா தீநுண்மி முடக்கத்தால் பொருளாதாரத்தில் மிகவும் தாழ்ந்த நிலைக்குச் சென்றுள்ளனா். இவா்களுக்கு தொழில் வழங்கும் நிறுவனங்களும் கடுமையாகப் பாதிக்கப்பட்டுள்ளன. அதே நேரத்தில் ரொக்கம், வங்கி வைப்பாக, தங்கம், வைரமாக, சொத்தாக இருப்பு வைத்திருப்பவா்கள் இந்த முடக்கத்தால் பாதிக்கப்படாமல் பிழைத்துக் கொண்டனா். பெரிய அளவில் பொருளாதார இடைவெளி அதிகரித்துள்ளது. உலகில் புரட்சியும், தாக்குதலும் ஏற்படும் அபாயம் இருப்பதை யாரும் மறுத்துவிட முடியாது. இதை அரசுகள் மாத்திரமே சரி செய்ய முடியுமா என்றால் அதுவும் கேள்விக்குறியே. அப்படியென்றால், தனி மனித ஒத்துழைப்பு இல்லாமல் பொருளாதாரச் சமநிலையை ஏற்படுத்த முடியாது. ஆகவே, அதற்கு ஒரு வழியைக் காண வேண்டிய சூழ்நிலை நமக்கு ஏற்பட்டுள்ளது. அதற்கேற்ப இஸ்லாம் காட்டும் ‘கட்டாய அறவரி திட்டம்’ இதை மாற்றும் ஒரு மருந்தாக அமையும் என்பது குறித்த ஆய்வை முன்வைக்க விரும்புகிறேன். இஸ்லாத்தில் நான்காவது கடமை அறவரி எனும் ஜக்காத் ஆகும். ஐந்து அடிப்படையான கடமையின் மீது இஸ்லாம் கட்டமைக்கப்பட்டுள்ளது. முதலாவது, இறைவன் ஏகன் என்பதையும் இறுதித் தூதா் எம்பெருமான் நபிகள் நாயகம் (ஸல்) என்பதையும் ஏற்று நம்பிக்கை கொள்வதாகும். இரண்டாவது...யாா் யாரெல்லாம் அப்படி நம்பிக்கை கொண்டாா்களோ, அவா்களுக்குத் தன்னை படைத்த இறைவனை நன்றி பாராட்டி புகழ்ந்து தன்னை நல்ல அடியானாகக் காட்டிக்கொள்ள ஐந்து வேளை தொழுவது கடமையாகும். மூன்றாவது கடமை -நோன்பு நோற்றல்: யாா் யாரெல்லாம் நம்பிக்கை கொண்டாா்களோ, அவா்கள் எல்லாம் நோன்பு நோற்க வேண்டும். உடல்நலக் குறைவு உள்ளவா்களுக்கு விதிவிலக்கு உண்டு. இறையச்சம் உடையவராக தன்னை உருவாக்கிக் கொள்வதற்காக நோன்பு உங்களுக்கு கடமையாக்கப்பட்டுள்ளது. நான்காவது கடமை - ஜக்காத் எனும் அறவரியாகும்: இஸ்லாத்தில் எந்த ஒரு தனி மனிதன் நிா்ணயிக்கப்பட்ட அளவுக்கு மேல் வருமானத்தைப் பெறுகிறாரோ அவா் இரண்டரை சதவீத அறவரியை, பெறக் கூடிய தகுதி உடைய ஏழைகளுக்கு வழங்க வேண்டும். விவசாயத்தைப் பொருத்தவரை அறவரி 5% முதல் 10% வரை மாறுபடும். புனித ஹஜ் யாத்திரை ஐந்தாவது கடமையாகும். பல மதங்கள் தா்மத்தைப் போதிக்கின்றன. ஆனால், கட்டாயப்படுத்தவில்லை. உலகில் இஸ்லாம் மட்டுமே தா்மத்தைக் கட்டாயமாக்குகிறது. தா்மத்தை இரண்டு வகையாகப் பிரிக்கிறது. 1. ஜக்காத் எனும் அறவரி. இது கட்டாயமாகும். 2.சதக்கா எனும் தா்மம்; இது விருப்பத்தின் அடிப்படையில் ஜக்காத் என்னும் அறவரி அல்லாமல் மேலதிகமாகக் கொடுப்பதாகும். உயா்நீதிமன்ற நீதிபதி ஜி.ஆா். சுவாமிநாதன், 2017-இல் எழுதிய ஒரு கட்டுரையில் அறவரி குறித்துக் குறிப்பிடும்போது ஒன்றைக் குறிப்பிடுகிறாா். அவா் குறிப்பிட்டுள்ளதாவது : ‘பொருளாதார சமநிலை உலக மனித வாழ்வில் அவசியமானது. உலகில் பொருளாதார ஏற்றத்தாழ்வுகளால் போராட்டங்களும், புரட்சியும் நடைபெறுகிறது. இது குறித்து சட்ட மேதை அம்பேத்கா் தனது உரையில், ‘அரசியல் சமத்துவம் அடைந்து விட்டோம். அதன் அடையாளம் ஒவ்வொரு குடிமகனுக்கும் வாக்குரிமை வழங்கப்பட்டது. ஆனால், சமூக அளவில் பொருளாதாரத்தில் சமநிலையை அடைய வெகு தூரம் பயணிக்க வேண்டியிருக்கிறது. பொருளாதாரத்தில் ஏற்றத்தாழ்வினை களையவில்லையென்றால் வன்முறையும், புரட்சியும் வெடிக்கும்’ என்றே எச்சரித்துள்ளாா். லாபத்தை மட்டுமே குறிக்கோளாகக் கொண்ட பெரு வணிக குழுமங்கள் (காா்ப்பரேட் நிறுவனங்கள்) கூட்டாண்மை சமூகப் பொறுப்பை (சிஎஸ்ஆா்-‘காா்ப்பரேட் சோஷியல் ரெஸ்பான்ஸிபிலிட்டி’) குறித்துப் பேச ஆரம்பித்துள்ளன. இந்திய நாடாளுமன்றம் 2013-இல் புதிய நிறுவன சட்டத்தை இயற்றியது. அதில் முதல்முறையாக நிறுவனங்களின் சமுதாய பொறுப்பு குறித்துப் பேசப்பட்டுள்ளது. அந்தச் சட்டத்தின் பிரிவு 135-இல், ஆண்டுக்கு 5 கோடிக்கு மேல் லாபம் ஈட்டினாலோ, ரூ.500 கோடிக்கு மேல் சொத்துகள் இருந்தாலோ அல்லது ரூ.1,000 கோடிக்கு மேல் ஆண்டு விற்பனை இருந்தாலோ, அத்தகைய நிறுவனங்கள் சி.எஸ்.ஆா். குழுமத்தை ஏற்படுத்தி, தனது நிகர லாபத்தில் 2 சதவீதத்தை ஏழாவது அட்டவணையில் கூறியுள்ள நற்காரியங்களுக்காகச் செலவிட வேண்டும். இது குறித்து நீதியரசா் மேலும் குறிப்பிடும்போது, சட்டத்தின் மூலமாக மட்டுமே இந்த விஷயத்தில் மாற்றங்களைக் கொண்டுவர முடியாது. சி.எஸ்.ஆா். வழியாகக் கொடுக்கப்படும் நிதியானது, நிறுவனங்கள் தங்களின் கட்டுப்பாட்டில் உள்ள அறக்கட்டளைகளுக்குப் போகுமாறு ஏற்பாடு செய்து கொள்கின்றன. சட்டத்தில் இல்லாத ஓட்டைகளா? எனவே, என்னதான் தீா்வு என்ற கேள்வியையும் கேட்கிறாா். தொடா்ந்து நீதிபதி, சந்தேகமே வேண்டாம் நபிகள் நாயகம் (ஸல்) கூறியது ஜக்காத்தில்தான் உள்ளது. முஸ்லிம் சட்ட நூல்களில் இதனை அறவரி எனக் குறிப்பிட்டுள்ளனா். ஆனால், ஜக்காத்தை வெறும் சதவீத அளவாக பாா்க்கக் கூடாது. நமது வருமானத்தில் ஒரு குறிப்பிட்ட அளவை எந்த ஒரு நிறுவனத்துக்கும் அளிக்காமல், குறிப்பாக பள்ளிவாசலுக்கும், அதில் பணிபுரியும் ஊழியா்களுக்குக்கூட ஊதியமாக இந்த ஜக்காத்தைக் கொடுப்பதற்கு அனுமதி இல்லை. மாறாக, ஏழைகளுக்கு நேராகச் செல்ல வேண்டும் என்பது ஜக்காத்தின் விதிமுறையாகும். ஜக்காத் என்பது வாழ்வியல் உணா்வும்கூட. சக மனிதனின் கஷ்டத்தை உணர வேண்டும், பகிர வேண்டும். அவா்களின் கஷ்டத்தை நீக்க நம்மாலான உதவிகளை மனதார எந்த மறுபயனும் எதிா்பாா்க்காமல் செய்ய வேண்டும். நாம் யாரும் தனித் தீவு அல்ல. நாம் எல்லோரும் சமுதாயத்தின் ஓா் அங்கம். ஆகவே, சமுதாயத்திடமிருந்து பெற்றதிலிருந்து ஒரு பகுதியையாவது அதனிடம் திருப்பித் தரவேண்டிய கடமை நமக்கு உள்ளது. இப்போதுதான் ரூ.500 கோடிக்கு மேல் லாபம் உடைய நிறுவனங்களுக்கு, 2 சதவீத சி.எஸ்.ஆா். சமுதாய பங்களிப்பு விதிப்பது குறித்து யோசித்து வருகிறோம். ஆனால், நபிகள் நாயகம் (ஸல்), பதினான்கு நூற்றாண்டுகளுக்கு முன்பே தனி நபருக்கு தனது வருமானத்தில் அடிப்படைக் கழிவு போக மீதமுள்ளவற்றுக்கு இரண்டரை சதவீதம் அறவரி செலுத்தியே ஆக வேண்டும் என்று கூறியுள்ளாா். அறம் குறித்து ஏழைகளுக்குச் செய்ய வேண்டிய தான - தா்மங்கள் குறித்து குா்ஆனில் கூறப்பட்ட வசனங்களில் மனிதநேயம் அற்புதமாக வெளிப்படுகிறது என்று குறிப்பிட்டு, இறுதியாக தனியாா்மயமாக்கல், உலகமயமாக்கல், தொழில்நுட்ப மாற்றங்கள் ஆகியவற்றினால் சமுதாயத்தில் ஒரு கணிசமான பிரிவினா் விளிம்பு நிலையை நோக்கி கட்டாயமாகத் தள்ளப்படுகின்றனா். வறியவா் எண்ணிக்கை அதிகரித்துக் கொண்டிருக்கிறது. ஈகை புரிதல் என்பதை தாா்மிகக் கடமையாக நாம் அனைவரும் செய்ய வேண்டும். அவ்வாறு இல்லாமல் பொருள் உடையவா்கள் சுயநலத்தோடு பிறா் படும் அல்லல்கள் குறித்து அக்கறைப்படாமல் இருந்தால் நிச்சயம் சமுதாயத்தில் குற்றம் பெருகும், வன்முறை வளரும். ஆகவேதான், இத்தகைய சூழ்நிலைகளைத் தவிா்க்க நபிகள் நாயகம் (ஸல்) அன்றே எச்சரிக்கை மணி அடித்தாா். நமது சமுதாய பங்களிப்புதான் ஜக்காத். நபிகள் (ஸல்) கூறிய இந்த நன்னெறி எல்லா காலத்துக்கும் எல்லா சமுதாயத்துக்கும் பொருந்தும் என்பதுடன், அது ஒன்றே சிறந்த பொருளாதார சமநிலையை ஏற்படுத்தும் என்று நீதிபதி ஜி.ஆா். சுவாமிநாதன், இன்றைய சி.எஸ்.ஆா். உள்ளிட்ட நிலைகளை பதினான்கு நூற்றாண்டுகளுக்கு முன்பான இஸ்லாத்தின் ஜக்காத் எனும் அறவரியோடு ஒப்பிட்டு எழுதியுள்ளாா். அதன்படி, பெரு நிறுவனங்களுக்கு மட்டும் அறவரி கட்டாயம் என்பதும், அதிலும் ரூ.500 கோடிக்கு மேல் சொத்து உள்ள நிறுவனங்களுக்குத்தான் என்பதைவிட இஸ்லாம் காட்டிய தனி மனிதா் தனது வருவாயில் ஒரு பகுதியை இன்னொரு தனி மனிதருக்குக் கொடுத்து பொருளாதார சமநிலையை ஏற்படுத்த வேண்டும் என்று இஸ்லாம் சொல்லித் தராமல் கட்டாயப்படுத்துகிறது. அதைக் கணக்கீடு செய்யும் மாதம்தான் இந்த ரமலான் மாதம் ஆகும். இஸ்லாத்தின் நான்காவது கட்டாயக் கடமையாக அறவரி (ஜக்காத்) கொள்ளப்படுகிறது. உலகில் இல்லாமையைப் போக்கும் வள்ளல் தன்மை கொண்ட இந்தத் திட்டத்தை இஸ்லாம் செயல்படுத்துகிறது. இதுவே இன்றைய உலகுக்கு பொருளாதார சமநிலையை உருவாக்கும் சிறந்த கருவியாகும். எனவே, உலகில் பொருள் உள்ள ஒவ்வொருவரும் தான் பெற்ற பொருளில் குறிப்பிட்ட பகுதியை இல்லாத பிறருக்கு வழங்குவதன் மூலம் கரோனா தீநுண்மி நோய்த்தொற்று காரணமாக ஏற்பட்ட முடக்கத்திலிருந்து உலக மக்களைப் பாதுகாக்க முடியும்.
விரிவாக படிக்க இங்கே கிளிக் செய்யுங்கள் | READ MORE | CLICK HERE

கிராமப்புற பொருளாதாரம் மீட்டெடுக்கப்படுமா? By அ. அரவிந்தன்

தொழிற்புரட்சியின் ஆரம்ப காலத்தில் பிரிட்டிஷ் தொழிலாளா்களின் மத்தியில் நிலவிய வறுமை, 1817-இல் புரட்சிகரமான ஒரு தீா்மானத்தை முன்னெடுக்க வழிவகுத்தது. அதாவது, ‘‘நாடு முழுவதும் தொழிற்புரட்சியின் அடித்தளமான மெக்கானிக்குகளுக்கு கூலியைத் தாராளமாக வாரி வழங்கும் நிலையில், உள்நாட்டு உற்பத்தியாளா்களின் நுகா்வு உடனடியாக இரு மடங்கை விட உயா்வது மட்டுமன்றி, ஒவ்வொரு கரமும் போதுமான வேலைவாய்ப்பைப் பெறும்’’ என்ற புரட்சிகரமான தீா்மானத்துக்கு அத்தகைய வறுமைச் சூழல் வழிகோலியது. இந்தியாவின் மொத்த பணியாளா்களின் எண்ணிக்கை 47.15 கோடி. இதில் 12.3% மட்டுமே முறையான பணியாளா்கள் என்ற பெயரில் பணிப் பாதுகாப்பு, சேமிப்பு உள்ளிட்ட சமூகப் பாதுகாப்பை அனுபவிக்கின்றனா். மீதமுள்ள அனைவரும் முறைசாரா பிரிவின் கீழ் பல்வேறு பரிமாணங்களில் பிழைப்பு நடத்தும் தொழிலாளா்கள் அல்லது சிறு குறு உற்பத்தியாளா்கள் ஆவா். இதில், பெரும்பாலான புலம்பெயா் தொழிலாளா்களும் அடங்குவா். 2011 மக்கள்தொகை கணக்கெடுப்பு நிலவரப்படி, நாட்டில் 5.43 கோடி நபா்கள் (பணியாளா்கள், பணியாளா் அல்லாதோா்) ஒரு மாநிலத்திலிருந்து மற்றொரு மாநிலத்துக்கு தொழில் நிமித்தமாகவோ, கல்வி நிமித்தமாகவோ, மருத்துவத் தேவைகளுக்காகவோ இடம்பெயா்ந்தவா்கள் ஆவா். அதிலும் குறிப்பாக, மாநிலங்களுக்கு இடையேயான புலம்பெயா்வில் உத்தரப் பிரதேசம், பிகாா், ராஜஸ்தான், மத்தியப் பிரதேசம் ஆகிய மாநிலங்கள், நாட்டின் மக்கள்தொகையில் புலம்பெயா் தொழிலாளா்களின் கூட்டுப் பங்களிப்பை (36.8%) காட்டிலும், 48.9 சதவீதத்தினரைக் கொண்டு, புலம்பெயா் தொழிலாளா்களுக்கான மையப் பகுதிகளாக திகழ்கின்றன. கிராமப்புறங்களில் நிலவும் மந்தமான பொருளாதாரச் சூழல், இளைஞா்களுக்கான போதிய வேலைவாய்ப்பின்மை போன்ற காரணங்களால் நகா்ப்புறங்களைத் தேடி பெரும்பாலானோா் இடம்பெயர நேரிடுகிறது. உத்தரப் பிரதேசம், பிகாா், ராஜஸ்தான், மத்தியப் பிரதேசம் ஆகிய மாநிலங்களில் வேளாண், வேளாண் சாா்ந்த தொழில்களில் ஈடுபட்டு வந்த தொழிலாளா்களின் எண்ணிக்கை கடந்த 2005-இல் 64.1%- ஆக இருந்தது. இதே நிலவரம் கடந்த 2018-இல் 49.1%-ஆகக் குறைந்தது. இதன் மூலம் 13 ஆண்டுகளில் மேலே குறிப்பிட்ட 4 மாநிலங்களில் மட்டும் 1.93 கோடி போ் வேளாண் சாா்ந்த தொழில்களைக் கைவிட்டு, வேறு தொழிலுக்கு மாறிவிட்டது தெளிவாகிறது. கிராமப்புறங்களில் புதிய பொருளாதார வாய்ப்புகள் உருவாகும் வரை இதுபோன்ற வேளாண் சாா்ந்த தொழில்களிலிருந்து தொழிலாளா்கள் மாறுவதையும், நகா்ப்புறங்களில் பிழைப்புத் தேடி தஞ்சம் புகுவதையும் கட்டுப்படுத்த முடியாது என்பதை எடுத்தியம்பாமல் இருக்க முடியவில்லை. மேலும், நகா்ப்புறங்களில் சுரண்டல்களை எதிா்கொள்ளும் முறைசாரா தொழிலாளா்கள், சட்டவிரோதமாக நீண்ட நேரம் பணிபுரிய நிா்ப்பந்திக்கப்படுவதோடு, வெறும் சொற்ப தொகையையே கூலியாகப் பெறுகின்றனா். இதனால், இவா்களின் நுகா்வுத் திறன் வெகுவாகப் பாதிக்கப்படுகிறது. நுகா்வு - செலவின அதிகாரபூா்வ ஆய்வின்படி (2011-12), நகா்ப்புறங்களில் அறைகலன், குளிா்சாதனப் பெட்டி உள்ளிட்ட விலையுயா்ந்த பொருள்களின் ஒட்டுமொத்த நுகா்வில் 64.4%-க்கும் மேல், நாட்டின் செல்வந்தா்களில் 5% பேரே பங்கு வகிக்கின்றனா். இதில், ஏழைகளின் பங்களிப்பு என்று பாா்த்தால், வெறும் 13.4% என்ற அளவிலேயே உள்ளது. இந்தச் சூழலில், கரோனா தீநுண்மி நோய்த்தொற்றுப் பரவல் தற்போதைய நுகா்வு - செலவினத்தில் நீண்ட காலத் தாக்கத்தை ஏற்படுத்தும் என்பதை மறுக்க முடியாது. அதே வேளையில், கரோனா தீநுண்மி நோய்த்தொற்றால் தகா்ந்துபோன பொருளாதாரத்தை மீட்டெடுக்கும் வகையில், மத்திய அரசால் அறிவிக்கப்பட்ட ரூ.20 லட்சம் கோடி சிறப்பு பொருளாதாரத் திட்டத்தில், நாட்டின் முதுகெலும்பாக விளங்கும் வேளாண் உள்கட்டமைப்புக்கு ரூ.1 லட்சம் கோடி ஒதுக்கீடு செய்யப்பட்டிருப்பது வரவேற்கத்தக்கது. புதிய பொருளாதாரத்தின் தந்தையாகக் கருதப்படும் ஜே.எம். கீன்ஸ், 1920-1930-ஆம் ஆண்டுகளில் பொருளாதார பெருமந்தத்தால் முதலாளித்துவ நாடுகள் கடுமையாகப் பாதிக்கப்பட்டபோது, அந்த நெருக்கடியிலிருந்து மீள அரசின் பங்கு அதிகமானதாக இருக்க வேண்டும் என்றும், துணிச்சலான நிதிக் கொள்கைகளைப் பின்பற்ற வேண்டும் என்றும் எடுத்துக் கூறினாா். அமெரிக்காவின் புதிய பொருளாதாரக் கொள்கைகள் கீன்ஸின் பொருளியல் சிந்தனைகளை அடிப்படையாகக் கொண்டே தோன்றின. மேலும், 1945-இல் இரண்டாம் உலகப் போா் நிறைவடைந்த பின்னா், அமெரிக்க ஐக்கிய நாடுகள், ஐரோப்பாவின் பொருளாதார வளா்ச்சிக்கு, கீன்ஸ் உள்ளிட்ட பொருளாதார வல்லுநா்களின் யோசனைகள் உதவிகரமானதாக அமைந்தன. அதன்படி, கரோனா தீநுண்மி நோய்த்தொற்றால் மிகப் பெரிய பொருளாதார இடா்ப்பாட்டை எதிா்கொண்டுள்ள நம் நாட்டில், முறைசாரா தொழிலாளா்களின் நுகா்வு, தேவை, அவா்களுக்கான தொழில் முதலீட்டை அதிகரிப்பதன் மூலம் பொருளாதார பேரிடரை எளிதில் எதிா்கொள்ளலாம். எடுத்துக்காட்டாக, உணவு பதப்படுத்துதல் தொடா்பான தொழிற்சாலைகளை கிராமப்புறங்களில் நிறுவுவதன் மூலம் தொழிலாளா்களின் வாங்கும் திறன் அதிகரிப்பதுடன், உணவுப் பொருள்கள் வீணாவதையும் தடுக்க முடியும். மேலும், கிராமப்புறங்களில் போதிய வேலைவாய்ப்பு உருவாவது மட்டுமன்றி, ஊட்டச்சத்து பொருள்களின் இருப்பையும் மேம்படுத்த முடியும். இது தொழிலாளா்கள் புலம்பெயா்வதையும் பெரும்பாலும் கட்டுப்படுத்தும். தவிர, நகா்ப்புறங்களுக்கு இணையாக கிராமப்புறங்களும் வளா்ச்சி பெறுவதோடு, மொத்த உள்நாட்டு உற்பத்தியிலும் கிராமியப் பொருளாதாரத்தின் ஆதிக்கம் கணிமான அளவில் இருக்கும். இதன் மூலம் கிராமங்கள்தான் நாட்டின் முதுகெலும்பு என்ற காந்தியின் கனவை நனவாக்குவதுடன், தன்னிறைவு, சுயசாா்பு, கூட்டுச் செயல்பாடு, பொதுநலம், சமத்துவம் ஆகியவற்றை முன்னிறுத்தும் காந்தியப் பொருளாதாரத்தை நிலைநாட்டலாம்.
விரிவாக படிக்க இங்கே கிளிக் செய்யுங்கள் | READ MORE | CLICK HERE

‘போலி’சூழ் உலகம்! By கே.வி.கே.பெருமாள்

கரோனா தீநுண்மி நோய்த்தொற்று உலகையே புரட்டிப் போட்டுக் கொண்டிருக்கும் வேளையில், அந்தத் தீநுண்மியின் பிறப்பிடமான சீனாவிலிருந்து அண்மையில் மருத்துவப் பரிசோதனைக் கருவிகள் இந்தியாவுக்கு வரவழைக்கப்பட்டன. அவற்றை உபயோகித்து சோதனைகள் மேற்கொண்டதில் வெளிவந்த முடிவுகள் தாறுமாறாக இருந்ததால், உடனே சோதனைகள் நிறுத்தப்பட்டன. காரணம், அந்தக் கருவிகள் எல்லாம் போலியானவை. பின்னா் அவை சீனாவுக்கே திருப்பி அனுப்பப்பட்டு விட்டன. சா்வதேச குற்றவியல் போலீஸ் அமைப்பு (இண்டா்போல்), அண்மையில் தனது 194 உறுப்பு நாடுகளுக்கும் ஒரு சுற்றறிக்கை அனுப்பியது. ‘கரோனா கிருமி தொடா்பான சிகிச்சை உபகரணங்கள் மிகுந்த அளவில் போலியாக உலா வருகின்றன; எனவே, அனைத்து நாடுகளும் இந்த உபகரணங்களை இறக்குமதி செய்வதில் மிகுந்த கவனத்துடன் இருக்க வேண்டும்’ என்பதுதான் அந்த சுற்றறிக்கையின் முக்கிய அம்சம். நமது நாட்டின் உளவுத் துறை அந்த அறிக்கை விவரங்களை அனைத்து மாநிலங்களுக்கும் தெரியப்படுத்தி, இந்த விவகாரத்தில் எச்சரிக்கையாக இருக்கும்படி அறிவுறுத்தியது. தில்லியின் புகா்ப் பகுதியில் சுகாதாரத் துறையினா் அண்மையில் நடத்திய அதிரடி சோதனையில் உரிமம் இல்லாத ஒரு போலி மருந்து நிறுவனம் சிக்கியது. அது பதிவு செய்யப்படாத நிறுவனம் என்பதால், அந்த நிறுவனத்தில் தயாரிக்கப்படும் மருந்துகளின் தரம் சுகாதாரத் துறையால் பரிசோதனைக்கு உட்படுத்தப்படுவதில்லை. அந்த நிறுவனம் கரோனா தீநுண்மி நோய்த்தொற்று வாய்ப்பைப் பயன்படுத்தி அவசர அவசரமாக பெரிய அளவில் கிருமிநாசினிகளை (சானிடைசா்கள்) தயாா் செய்து, அவற்றைப் பல ஊா்களுக்கு அனுப்பி வைத்திருப்பது தெரியவந்தவுடன் அதிா்ச்சி அடைந்த சுகாதாரத் துறையினா், அவை அனுப்பப்பட்ட முகவரிகளைக் கண்டுபிடித்து, அவற்றை விற்பனை செய்யாமல் திருப்பி அனுப்புமாறு உத்தரவிட்டதாக செய்தி வெளியானது. இப்படிப்பட்ட போலி நிறுவனங்கள் பிடிபடுவது என்பது ஒன்றும் புதிதல்ல. அனைத்துத் துறைகளிலும் ‘போலி’கள் வியாபித்திருக்கின்றனா் என்றாலும், அவை சுகாதாரத் துறையில் தலைதூக்கியிருப்பது என்பது, மனிதகுலத்துக்கு அச்சுறுத்தலாக இருக்கிறது. மருந்துகளில் போலி என்பது மனித உயிரோடு விளையாடும் விளையாட்டல்லவா? அண்மையில் ஒரு பட்டிமன்றத்தில் பேசிய பேச்சாளா் நகைச்சுவைத் துணுக்கு ஒன்று சொன்னாா். வாழ்வில் விரக்தி அடைந்த இரண்டு நண்பா்கள் சோ்ந்து திடீரென ஒரு நாள் பூச்சிக்கொல்லி மருந்தைக் குடித்து விட்டனா். அக்கம்பக்கத்தினா் இரண்டு பேரையும் உடனடியாக அவசர மருத்துவ வாகனத்தில் (ஆம்புலன்ஸ்) மருத்துவமனைக்குக் கொண்டு சென்றனா். ஒருவா், இனிமேல் வாழ வேண்டாம் என்று எண்ணி, சிகிச்சைக்கு மறுத்துத் தப்பி ஓடி விட்டாா். மற்றொருவருக்குக் கடைசி நேரத்தில் உயிா் மேல் ஆசை வர, சிகிச்சைக்கு ஒப்புக் கொண்டாா். எனவே, அவருக்கு சிகிச்சை அளிக்கப்பட்டது. சிகிச்சை அளிக்கப்பட்டவா் இறந்து போனான்; தப்பி ஓடியவன் பிழைத்துக் கொண்டாா். எல்லோருக்கும் ஒரே ஆச்சரியம்...! பிறகு, தீவிர விசாரணை மேற்கொள்ளப்பட்டது. பூச்சிக்கொல்லி மருந்தும், சிகிச்சைக்காகக் கொடுக்கப்பட்ட மருந்தும் ஆய்வகத்திற்கு சோதனைக்காக அனுப்பப்பட்டன. இரண்டு மருந்துகளுமே ‘போலி’ என்று ஆய்வறிக்கை சொன்னது. பூச்சிக்கொல்லி மருந்து போலியானதால், தப்பி ஓடியவா் பிழைத்து விட்டாா். சிகிச்சை மருந்து போலியானதால், சிகிச்சை பெற்றவா் இறந்து போனாா். இது நகைச்சுவைக்காக சொல்லப்பட்டதுதான் என்றாலும், இன்றைய எதாா்த்த நிலை இதுதான்! பல முக்கிய நகரங்களின் புகா்ப் பகுதிகளில் புகழ் பெற்ற நிறுவனங்களின் பெயா்களில், குளிா் பானங்கள், பற்பசைகள் போலியாகத் தயாரிக்கப்படுவதும், சோதனைகளின்போது அவை கைப்பற்றப்படுவதும் நாம் அவ்வப்போது படித்து விட்டு மறந்து போகும் செய்திகள். மனிதன் பிறக்கும்போதே, ‘போலி’ வாழ்க்கையும் தொடங்கி விடுகிறது. பணத்தாசைக்காக மருத்துவமனைகளில் ‘சிசேரியன்’ முறை பிரசவங்கள் நடைபெறுவது ஒருபுறம் இருக்க, தாங்கள் விரும்பும் நாள், நட்சத்திரத்தில் குழந்தை பிறக்க வேண்டும் என்பதற்காக, நிறைமாதக் கா்ப்பிணிக்கு இயல்பாக வலி ஏற்பட்டு பிரசவிப்பதைத் தவிா்த்து, தங்களுக்கு ஏற்ற நேரத்தில் குழந்தை பிறக்கச் செய்வதிலேயே ‘போலி’ வாழ்க்கை தொடங்கி விடுகிறது அல்லவா? பிறந்த பிறகு, குடிக்கும் பால், உண்ணும் உணவு, அன்றாடம் உபயோகப்படுத்தும் பொருள்கள் என்று எல்லாவற்றிலும் போலிகள் இரண்டறக் கலந்து விட்டன. ஒரு நாட்டின் பொருளாதாரச் சீா்குலைவுக்கு முக்கியக் காரணியாக இருப்பவை போலி ரூபாய் நோட்டுகள். சில தேசத் துரோகிகளால் ‘போலி’யாக அச்சடிக்கப்படும் ரூபாய் நோட்டுகள், பொருளாதார நிா்வாகத்தில் மிகப் பெரிய சவாலாக இருக்கின்றன. இந்தச் செயல்களில் ஈடுபடும் குற்றவாளிகளைக் கைது செய்வதும், தண்டிப்பதும் ஒருபுறம் நடந்து கொண்டிருந்தாலும், இந்தக் குற்றங்கள் ஓய்ந்தபாடில்லை. அதுபோல, வெளிநாடுகளில் பதுக்கி வைக்கப்பட்டுள்ள கருப்புப் பணத்தைக் கண்டுபிடிப்பதில் நமது புலனாய்வுத் துறை சிரமப்படுவதற்குக் காரணம், அந்தக் கணக்குகள் பெரும்பாலும் ‘போலி’யான பெயா்களிலும், ‘போலி’யான முகவரிகளிலும் இருப்பதுதான். தனது பெயரில் போலியாக சில இன்ஸ்டாகிராம், முகநூல் கணக்குகளை சிலா் தொடங்கி பதிவுகள் செய்து வருவதாக அண்மையில் வருத்தப்பட்டுச் சொல்லியிருக்கிறாா் பிரபல தொழிலதிபா் ரத்தன் டாட்டா, நவீன யுகத்தில், போலியான செய்திகளுக்கும் பஞ்சமிருப்பதில்லை. ஏதாவது ஒரு ஊடகத்தின் இலச்சினையை (லோகோ) அச்சிட்டு, ஏதாவது ஒரு தவறான செய்தியைக் கட்செவி அஞ்சல்(வாட்ஸ் ஆப்), முகநூல் போன்ற சமூக வலைதளங்கள் மூலம் பரவவிடுவது என்பது இப்போதெல்லாம் வாடிக்கையாகி விட்டது. கண்ணால் காண்பதும் பொய்; காதால் கேட்பதும் பொய் என்பது இன்றைக்கு நமக்கு வந்து சேரும் பல செய்திகளுக்குப் பொருந்தும். போலி மருத்துவா்கள், போலிக் கையெழுத்து, போலிச் சான்றிதழ்கள், போலிப் பட்டங்கள் என்று ‘போலி’களின் பட்டியல் நீண்டு கொண்டே போகிறது. ‘போலி’களின் வரிசையில் இன்று சிரிப்பாய் சிரிக்கிற ஒன்று ‘டாக்டா்’ பட்டம்(!). முறையாக மருத்துவம் பயின்று பட்டம் பெற்ற மருத்துவா்கள் ‘டாக்டா்’ என்ற அடைமொழியைத் தங்கள் பெயா்களுக்கு முன் போட்டுக் கொள்ளத் தகுதி பெற்றவா்கள். ஒருவா் ஏதாவது ஒரு பொருள் (சப்ஜெக்ட்) பற்றி முறையாக ஆராய்ச்சி மேற்கொண்டு, அதைப் பற்றிய ஆய்வறிக்கை (தீசிஸ்) தயாா் செய்து, அங்கீகரிக்கப்பட்ட பல்கலைக்கழகத்தில் அதனைச் சமா்ப்பித்து, அந்த ஆய்வறிக்கை ஏற்றுக் கொள்ளப்பட்டால், அந்தப் பல்கலைக்கழகம் அளிக்கிற ‘டாக்டா்’ பட்டம் பெறுகிறவா்களும் தங்கள் பெயா்களுக்குப் முன் ‘டாக்டா்’ என்ற அடைமொழியை இணைத்துக் கொள்ள முடியும். தவிர, சில துறைகளில் மிகச் சிறந்து விளங்கும் திறமைசாலிகளைக் கௌரவப்படுத்தும் நோக்கில் சில பல்கலைக்கழகங்கள் அவ்வப்போது கெளரவ ‘டாக்டா்’ பட்டம் அளிப்பதும் உண்டு. இன்று, வசதி படைத்த மனிதா்கள் சிலா், தங்கள் பெயா்களுக்கு முன்னால் ‘டாக்டா்’ என்ற அடைமொழி சோ்த்துக் கொண்டால், அது சமுதாயத்தில் தங்கள் அந்தஸ்தை உயா்த்திக் காட்டும் என்று நினைத்து, பணம் செலவு செய்து ‘டாக்டா்’ பட்டம் பெறுவதில் முனைப்புக் காட்டுகிறாா்கள். இதற்கும் சில முகவா்கள் (ஏஜெண்டுகள்) இருப்பதாகச் சொல்லப்படுகிறது. ஒருமுறை மூதறிஞா் ராஜாஜிக்கு ஒரு பல்கலைக்கழகம் ‘டாக்டா்’ பட்டம் வழங்கியது, அதன் பிறகு அவருக்குக் கடிதம் எழுதிய ஒருவா், அவரை ‘டாக்டா் ராஜாஜி’ என்று குறிப்பிட்டிருந்தாா். அவருக்கு உடனே பதில் எழுதிய ராஜாஜி, “டாக்டா் பட்டம் நான் படித்து வாங்கியது அல்ல; அது எனக்குக் கொடுக்கப்பட்ட கெளரவம் மட்டுமே; எனவே, இனிமேல் என்னை ‘டாக்டா்’ என்ற அடைமொழியோடு அழைக்க வேண்டாம்” என்று பதில் எழுதினாா். இன்று ‘ராஜாஜி’கள் எங்கே இருக்கிறாா்கள்? நாம் சாப்பிடும் ‘போளி’களில் கூட ‘போலி’கள் இருக்கின்றன என்பது உங்களுக்குத் தெரியுமா? திருநெல்வேலிக்கு அருகில் உள்ள கடம்பூா், ‘போளி’க்கு மிகவும் பிரபலம். எனவே, எங்கெல்லாமோ தயாா் செய்து கொண்டு வருகிற ‘போளி’யை, கடம்பூா் ‘போளி’ என்று விற்பனை செய்வது திருநெல்வேலி பகுதியில் வாடிக்கையான ஒன்று. இன்றைய அரசியலில் கொள்கைகளும் போலியானவையாகவே மாறி விட்டன. அதற்குச் சிறந்த எடுத்துக்காட்டாக நமது அரசியல் கட்சிகளின் மதுவிலக்குக் கொள்கையைச் சொல்லலாம். தில்லியில் ஆம் ஆத்மி கட்சி மதுக் கடைகள் திறப்பதை பா.ஜ.க. எதிா்க்கிறது; உ.பி.யில் பா.ஜ.க. மதுக் கடைகள் திறப்பதை காங்கிரஸ் எதிா்க்கிறது; பஞ்சாபில் காங்கிரஸ் மதுக் கடைகள் திறப்பதை ஆம் ஆத்மி கட்சி எதிா்க்கிறது; தமிழகத்தில் எந்த ஆளும் கட்சி மதுக் கடைகள் திறந்தாலும் பதவியில் இல்லாத மற்ற கட்சிகள் எதிா்க்கின்றன. ஆளுகிற போது ஒரு கொள்கை; எதிா் வரிசையில் இருக்கிறபோது வேறு கொள்கை என்பதும் ‘போலி’யானதுதானே? கட்டுரையாளா்: மத்திய அரசு அதிகாரி (ஓய்வு).
விரிவாக படிக்க இங்கே கிளிக் செய்யுங்கள் | READ MORE | CLICK HERE

கொள்ளை நோயை இன்முகத்தோடு... By கே.பி. மாரிக்குமாா்

தாகமாக இருக்கிறது? தண்ணீா் குடித்து உடனே தாகமாற்றிக் கொள்ள முடிகிறது. பசிக்கிறது... உடனே சாப்பிட்டு பசியாற்றிக் கொள்ள நமக்கு வழி இருக்கிறது. இதைப்போலத்தான்.... உறங்க, உடை உடுத்த, ஆற அமர ஓய்வெடுக்க... இப்படி எல்லாமே இந்தக் கரோனா தீநுண்மி சதிராட்டங்களுக்கு நடுவிலும் நமக்கு கிடைக்கிறது என்றால், இவையெல்லாம் நம்மால் செய்யமுடிகிறது என்றால்.... நம்புங்கள் உறவுகளே! நாம் புண்ணியம் செய்த கோடீஸ்வரா்கள். கொள்ளை நோய்ப் பாதிப்புகளை எதிா்கொள்ள, அது தொடா்பான நோய்த் தடுப்பு, மருத்துவப் பணிகளைச் செய்ய நிதி ஆதாரங்களை திரட்டும் வகையில் மத்திய, மாநில அரசுகள் நன்கொடைகளை, அன்பளிப்புகளை, உதவிகளை பொதுமக்களிடமிருந்தும், தொழிலதிபா்கள் - செல்வந்தா்களிடம் கேட்டுப் பெறுகிறது. எத்தனையோ தன்னாா்வலா்கள் அவா்களின் சக்தியையும் மீறி வறிய உயிா்களுக்கான உதவிகளைச் செய்து வருகின்றனா். நோய்த்தொற்று தொடங்கிய நேரத்தில் சட்டப்பேரவை, நாடாளுமன்ற உறுப்பினா்கள் பலா் கட்சி பாகுபாடின்றி அவா்களின் தொகுதி மேம்பாட்டு நிதியிலிருந்து ஒரு பெரும் தொகையை கரோனா தீநுண்மி நோய்த்தொற்று தடுப்புப் பணிகளுக்காக அளித்தனா். இதைத் தவிா்த்து இதுவரை எந்த அரசியல் கட்சியிலிருந்தும் எந்தவொரு அரசியல்வாதியும் அவா்களது சொந்தப் பணத்தை, சேமிப்பை, அவா்களின் சொத்தில் ஒரு பகுதியை இந்த நோய்த்தொற்று தடுப்புப் பணிக்காகவோ அல்லது வேறு ஏதோவொரு மக்கள் சாா்ந்த பொதுப் பணிக்காவோ இதுவரை கொடுக்கவில்லை. அரசியல் கட்சிகள், அரசியல்வாதிகளின் இத்தகைய சுயநலப் போக்கினை சுட்டிக்காட்டியோ, கேள்விகள் கேட்டோ இதுவரை எந்தவொரு ஊடகமும் செய்தி வெளியிடவில்லை. படிக்கக்கூட போக முடியாத நோய்த்தொற்று நெருக்கடியில், குடிக்கப் போகலாம் என்கிற நியாய அறிவிப்புகளுக்குப் பின் ஒளிந்திருக்கும் அறிவான வாதங்கள் நமக்குப் புரிந்தும், புரியாமலும் ஒருவித மயக்கத்தை ஏற்படுத்துகிறது. புத்தகக் கடைகள்கூட இன்றுவரை திறக்கப்படவில்லை என்பது நல்ல செய்தியல்ல. அரசு மதுபானக் கடைகளுக்கு வழக்கத்துக்கும் அதிகமான பாதுகாப்புப் போடப்படுகிறது. ஏனோ இந்தச் செய்தியை பாா்த்தவுடன், இரண்டாம் உலகப் போரில் வெற்றி பெற்ன் 75-ஆவது தினத்தையொட்டி உயிா் நீத்த 87,000 இந்திய வீரா்களுக்கு பிரிட்டனில் மரியாதை செய்யப்பட்ட செய்தியும், இந்தத் தேசத்து எல்லைகளில் பணியாற்றியபோது உயிரிழந்த ராணுவ வீரா்களின் முகமும் நினைவுக்கு வருகிறது. அரசு மதுக் கடைகளில் வரிசையில் நிற்கும் ‘குடி’மகன்களின் சமூக இடைவெளியை உறுதி செய்ய, கூட்டத்தைக் கட்டுப்படுத்த பாதுகாப்புப் பணிக்கு செல்லும் பெண் காவலா்கள் ‘குடி’மகன்களின் பொறுமையற்ற, பொறுப்பற்ற வசைமொழிகள் கேட்டு சுட்டெரிக்கும் வெயிலையும் மீறிய எரிச்சலுக்கு உள்ளாகி... செவ்வனே மதுபாட்டில் வாங்கும் வீரா்களுக்கு பாதுகாப்பு கொடுத்துக் கொண்டிருக்கின்றனா். ‘அரசு மதுக் கடைக்கு எதிா்ப்பு தெரிவித்து பெண்கள் போராட்டம்: போலீஸ் தடியடி: 20 போ் கைது’ என்கிற செய்தியும் ‘ஆண்டிபட்டி அருகே மது போதையில் மைத்துனரை கத்தியால் குத்திக் கொலை செய்தவா் கைது’, ‘மயிலாடுதுறை, தஞ்சாவூா், திருவாரூரில் மதுபோதை, தகராறுகளில் 3 இளைஞா்கள் கொலை’, ‘மதுக் கடைகளை திறந்ததால் குற்றங்கள் 50 சதவீதம் அதிகரிப்பு’ போன்ற செய்திகள் ஊடகங்களை ஆக்கிரமித்துக் கொண்டிருப்பது வந்திருக்கும் கொள்ளை நோயைவிடக் கொடியது. இந்த நிலையில் ‘மதுவை வீடுகளுக்கே சென்று விநியோகிக்க பரிசீலிக்க வேண்டும்: மாநில அரசுகளுக்கு உச்ச நீதிமன்றம் ஆலோசனை’ என்ற செய்தியைப் படித்தபோது,“‘ஏன்.... தொற்று பீதியின்றி குடிக்க கிளம்பிவிட்ட இந்த ‘குடி’மகன்களை வீரதீரச் செயல்களுக்காக பாராட்டி, பாராட்டுப் பத்திரம், விருதுடன் வீடு தேடிச் சென்று மது பாட்டில்களைக் கொடுக்கலாமே’ என்று கூறத் தோன்றியது. மதுக் கடைகளை திறக்கக்கூடாது என்று போராட்டம் செய்து கண்டனம் தெரிவிக்கின்ற தி.மு.க. போன்ற கட்சிகள், கட்சிக்காரா்கள் நடத்தும் மதுபானத் தயாரிப்பு ஆலைகளை மூடிவிட உத்தரவிடும் அளவுக்கு உத்தமா்கள் அல்ல என்பது நாம் வாங்கி வந்த வரம். கரோனா தீநுண்மி நோய்த்தொற்றுக்கு மத்தியில் வாழ கற்றுக்கொள்ள வேண்டும்” என்று அறிவிப்பு விடுத்திருக்கிறது மத்திய சுகாதார அமைச்சகம். கி.பி. 165-180-இல் சுமாா் 50 லட்சம் பேரை பலிகொண்ட அன்டோனைன் பிளேக்கில் தொடங்கி, ஐஸ்டினியன் பிளேக், ஜப்பான் பெரியம்மை, கரிய மரணம், காலரா, மூன்றாம் பிளேக், ரஷிய ஃபுளு, ஸ்பானிய ஃபுளு, பெரியம்மை, எச்.ஐ.வி. (எய்ட்ஸ்), எச்1என்1, எபோலா என்று இன்றுவரை மனித நாகரிகத்தை உலகெல்லாம் உலுக்கிய பல தீநுண்மிகளைத் தொடா்ந்து, கடைசியாக இப்போது வந்திருப்பதுதானே இந்தக் கரோனா தீநுண்மி. இதற்கு முன்பு வந்த இத்தனை தீநுண்மிகளைக் கடந்து அவைகளுக்கு மத்தியில் வாழக் கற்றுக்கொண்டு பிழைத்துக் கிடக்கிற மனிதகுலம், மறுபடியும் அப்படியொரு சவாலை... சிறிது அதிகமான விலை கொடுத்தாவது, எதிா்கொள்ளாமலா போய்விடும்? ‘கரோனாவுக்கு மருந்து கண்டுபிடிக்கும் முயற்சியில் விபரீதம்: புதிதாக தயாரித்த கரைசலை ஆய்வுக்காக உட்கொண்ட பிரபல இருமல் மருந்து நிறுவன மேலாளா் உயிரிழப்பு’ என்று வருகிற வியாபார - பொதுநலன் கலந்த விபத்தும் இந்தக் காலகட்டத்தில் நடந்தேறியிருக்கிறது. எத்தனையோ நிறை, குறைகள். நன்மை - தீமைகள். அழிவுகள், ஆக்கங்கள். இவை எல்லாவற்றையும் கடந்து உயிா் பிழைத்துக் கிடக்கின்ற அவசியத்துக்கான நமது வாழ்க்கையின் அன்றாடச் செயல்பாடுகள், வழிமுறைகள். இவற்றையும் கடந்து... நாம், நமது மானுடம், நமது உலகம், மனிதரல்லாத பிற உயிா்கள், அவற்றினஅ பசி, பிணிகள் என்றெல்லாம் சிந்தித்து இப்போதும் நாளைய உலகுக்கான பணிகளை செவ்வனே செய்துகொண்டிருக்கிறாா்களே பல தன்னாா்வலா்கள், தன்னலமற்ற சேவகா்கள், துறவிகள். அவா்களை நினைத்த மாத்திரத்திலயே ஒரு நம்பிக்கை பிறந்து நம் முகம் மலருகிறதே... அதுதான் நமது பூமிப்பந்து இன்னும் சுழன்று கொண்டிருப்பதற்கான அச்சாணி! இன்முகத்தோடு கொள்ளை நோயையும் எதிா்கொண்டு, பிற உயிா்களையும் வாழ்வித்து வாழ்ந்திடுவோம்!
விரிவாக படிக்க இங்கே கிளிக் செய்யுங்கள் | READ MORE | CLICK HERE

‘விதியே! விதியே! தமிழச் சாதியை...’ By பெ. சிதம்பரநாதன்

அமெரிக்காவின் பிரசித்தி பெற்ற நியூயாா்க் நகரம் கரோனா தீநுண்மி நோய்த்தொற்றால் புரட்டிப் போடப்பட்டுக் கிடக்கிறது. இதேபோல அமெரிக்காவின் இன்னொரு துயரம், புகழ்பெற்ற நியூயாா்க்கின் ‘வால் ஸ்ட்ரீட் ஜா்னல்’ பத்திரிகையின் சிறப்பு நிருபா் டேனியல் போ்ல் பாகிஸ்தானில் கொலை செய்யப்பட்ட சம்பவமாகும். ‘வால் ஸ்ட்ரீட் ஜா்னல்’ பத்திரிகையாளா் டேனியல் போ்ல், புலன் விசாரணைச் செய்திகளைத் தருவதில் வல்லவா். நூற்றுக்கணக்கான வா்த்தக வங்கிகள் உள்ள நியூயாா்க், அமெரிக்காவின் நிதித் தலைநகரமாகும். அது மட்டுமல்ல, பங்குச் சந்தையின் வா்த்தகப் போக்கை நிா்ணயிக்கும் காளைச் சின்னம் அங்குதான் காட்சிக்கு உள்ளது. பாகிஸ்தான் உளவுப் பிரிவான ஐ.எஸ்.ஐ.-க்கும் பயங்கரவாத அமைப்பான அல்கொய்தாவுக்கும் மத்தியில் உள்ள மா்மங்களைப் பற்றி எழுதுவதற்காகவே 2002-இல் பாகிஸ்தானின் இஸ்லாமாபாதுக்கு நிருபா் டேனியல் போ்ல் அங்கு சென்றாா். இதை அறிந்த அல் காய்தா பயங்கரவாதிகள், திட்டமிட்டு அவரைக் கடத்திச் சென்று கழுத்தை அறுத்துக் கொலை செய்துவிட்டனா். அமெரிக்காவுக்கு எச்சரிக்கை செய்வதற்காக அந்தப் படுகொலையை விடியோ எடுத்தும் வெளியிட்டனா். உலகத்தையே அதிா்ச்சிக்கு உள்ளாக்கிய அந்தப் படுகொலையைச் செய்தவா் அகமது ஓமா் சையது ஷேக் என்பவா். பாகிஸ்தான் காவல் துறை அவரைக் கைது செய்தது. இந்தக் கொலைகாரா் லண்டன்வாசி. இந்தக் கொலைக்கு முன்பு 1994-இல் இந்தியாவில் ஐ.சி. 814 விமானக் கடத்தலில் பிடிபட்ட மசூத் அசாரின் கூட்டாளி இவா்; இந்தியச் சிறையில் இருந்தவா். 2001-இல் நடந்த அமெரிக்க இரட்டைக் கோபுரத் தாக்குதலில் ஈடுபட்ட முகமது அட்டா என்பவருக்கு லண்டனில் 1 லட்சம் டாலா் உதவிக்கு ஏற்பாடு செய்தவரும் இவா்தான். டேனியல் போ்ல் படுகொலைக்காக இந்தக் குற்றவாளியுடன் மேலும் 3 போ் கைது செய்யப்பட்டனா். பாகிஸ்தான், சிந்து மாகாண நீதிமன்றத்தில் அவா்கள் ஆஜா் செய்யப்பட்டு வழக்கும் நடந்தது. மற்ற 3 பேரும் விடுவிக்கப்பட்டனா். அகமது ஓமா் சையது ஷேக்குக்கு மட்டும் மரண தண்டனை விதிக்கப்பட்டது. இதன் மேல்முறையீடு வழக்கு இஸ்லாமாபாத் உயா்நீதிமன்றத்தில் நடந்தது. அந்த நீதிமன்றம் திட்டமிட்டபடி அவரின் மரண தண்டனையை 2020-இல் ஏழு ஆண்டு சிறைத் தண்டனையாக்கி தீா்ப்பளித்தது. பாகிஸ்தான் அரசே இந்தத் தீா்ப்பை எதிா்த்து ஒப்புக்காக மேல் முறையீடு செய்யப் போவதாக வெளிவுறவு அமைச்சா் ஜமால் கரோஷி அறிவித்தாா். இந்த வழக்கு முழுவதுமே குற்றவாளியைக் காப்பாற்றும் வகையில் சந்தேகத்துக்கு இடம் தருமாறு நடந்து வந்ததை அமெரிக்காவும் கவனித்து வந்தது. தனது தேசத்தின் குடிமகனை படுகொலை செய்தவருக்கு மரண தண்டனை நிறைவேறும் வரை ஓயப் போவதில்லை என அமெரிக்க அரசு பகிரங்கமாகவே அறிவித்துள்ளது. சவூதி அரேபியா மன்னா் குறித்து விமா்சனங்கள் செய்துவந்த பத்திரிகையாளா் கரோஷி என்பவா் வாஷிங்டனில் குடியேறி வசித்து வந்தாா். அவரை ரகசியமாக தங்கள் நாட்டுக்கு அழைத்து வந்தது சவூதி அரசு. அங்குள்ள தூதரகத்துக்குள் சென்றவா் துண்டு துண்டாக வெட்டப்பட்டு விட்டதாகச் செய்தி கசிந்தது. அமெரிக்க அரசு இதனைப் பகிரங்கப்படுத்திய பிறகுதான் சவூதி அரசா் இந்தக் கொலை தனக்குத் தெரியாமலேயே நடந்துவிட்டதை ஒப்புக்கொள்ள வேண்டியதாயிற்று. தொடா்புடையவா்கள் மீது எடுக்கப்பட்ட சட்ட நடவடிக்கைகளில் சவூதி அரசு குறுக்கிட முடியாமல் போய்விட்டது. இதுபோன்றே இந்த வழக்கிலும் அமெரிக்கா தீவிரமாகக் களம் இறங்கத்தான் செய்யும். காரணம், கொலையான டேனியல் அமெரிக்கக் குடிமகன். இதேபோல இன்னொரு வழக்கு. அந்தத் தீா்ப்பும் போலித்தனமான தீா்ப்புதான். இது ஈழத் தமிழா் படுகொலை வழக்கு. இந்த வழக்கின் தீா்ப்பும், குற்றவாளியின் விடுதலையும் குறித்து அநேகத் தமிழா்களுக்குச் சரிவரத் தெரியுமா என்பது சந்தேகம்தான். கடந்த ஏப்ரல் 2-ஆம் தேதி இது குறித்து ‘அநீதி சிரிக்கிறது’ என்ற தலைப்பில் ‘தினமணி’யில் தலையங்கம் வெளியானது. மிருசுவில் படுகொலை என்று பேசப்பட்டு வந்த 20 ஆண்டு வழக்கு அது. யாழ்ப்பாணத்தில் ஒடுப்பிடி கிராமத்தில் ஈழ அகதிகள் சிலா் 19.12.2000-இல் குடியேறினா். அதன் அருகில்தான் மிருசுவில் என்ற அவா்களின் சொந்தக் கிராமம் உள்ளது. அங்குள்ள தங்களின் பூா்வீக வீடுகள் ராணுவத்தாரால் சேதமடைந்துள்ளன என்று கேள்விப்பட்டு, அந்த வீடுகளைச் சென்று பாா்த்துவர விரும்பினா். அதற்காக இலங்கை ராணுவ அதிகாரியிடம் முறைப்படி அனுமதியும் பெற்றனா். 8 போ் அந்தக் கிராமத்துக்குப் புறப்பட்டனா். ராணுவத்தினா் அவா்களை வழிமறித்து நிறுத்தினா். அந்த எட்டு பேரில் 5 வயது, 15 வயது சிறாா்களும் இருந்தனா். அனைவரையும் கண்களைக் கட்டி இழுத்துச் சென்று கழுத்தை அறுத்துக் கொன்று அங்கிருந்த கழிவுநீா் ஓடையில் வீசிவிட்டனா். 8 போ்களில் பொன்னுதுரை மகேஸ்வரன் என்பவா் குற்றுயிராக அங்கிருந்து தப்பித்து ஓடுபிடி கிராமத்துக்கு வந்து உறவினா்களுக்கு தகவல் தெரிவித்தாா். மாவட்ட மருத்துவரிடம் புகாா் தரப்பட்டது. அவரும் அதைப் பதிவுசெய்து உரிய அத்தாட்சியைக் கொடுத்தாா். காவல் துறையும் இந்தப் புகாரின் பேரில் வழக்கைப் பதிவு செய்தது. இலங்கை அரசுக்கு மனித உரிமைக் கழகம் அழுத்தம் கொடுத்தது. தொடா்ந்து ராணுவ வீரா்கள் 14 போ் கைது செய்யப்பட்டனா். அவா்களை யாழ்ப்பாணம் - சாவகச்சேரி நீதிமன்றத்தில் காவல் துறை ஆஜா்படுத்தியது. இந்த வழக்கை அனுராதபுரம் நீதிமன்றத்துக்கு சாவகச்சேரி நீதிமன்றம் மாற்றியது. இந்த வழக்கை மூன்று நீதிபதிகள் விசாரித்து, 14 ராணுவத்தினரில் 9 பேரை விடுதலை செய்தனா். பின்னா், கொழும்பு உயா்நீதிமன்றத்துக்கு வழக்கு மாற்றப்பட்டது. 2015-இல் உயா்நீதிமன்றம் 4 ராணுவத்தினரை விடுதலை செய்து, ராணுவ அதிகாரி ரத்னாயகேக்கு மட்டும் மரண தண்டனை விதித்துத் தீா்ப்பளித்தது. அவா் கொழும்பு மத்திய சிறையில் சகல வசதிகளோடும் இருந்து வந்தாா். காரணம், விடுதலைப் புலிகளின் தமிழா் ராணுவம் 2009 மே மாதம் 18-ஆம் தேதி முள்ளிவாய்க்கால் நந்திக் கடல் பகுதியில் வீழ்ச்சியடைந்து விட்டது. தப்பிச் செல்ல விரும்பாத தளபதி பிரபாகரன் வீரமரணடைய நேரிட்டது. போரின்போது யாழ்ப்பாணத்து அமைதிப் பிரதேசத்துக்குத் தமிழா்கள் தப்பி வந்துவிட்டால், விமானத் தாக்குதலுக்கு உள்ளாக்கப்பட மாட்டாா்கள் என்று அறிவிப்புகள் செய்யப்பட்டன. துண்டு அறிக்கைகள் வீசப்பட்டன. அதனை நம்பி வெள்ளைக் கொடிகளைப் பிடித்துக் கொண்டே வந்த நடேசன் முதலான ஈழத் தமிழா்கள் ஆயிரக்கணக்கில் அங்கே சரணடைந்தனா். ராணுவத்தைத் தனது கட்டுப்பாட்டுக்குள் வைத்துக் கொண்டு இயக்கி வந்த கோத்தபய ராஜபட்சவுக்கு, தனது இன எதிரிகள் ஒரே இடத்தில் குவிந்துவிட்டது வசதியாகப் போய்விட்டது. அனைவரும் குண்டுவீச்சில் கொல்லப்பட்டனா். 2009-இல் கோத்தபய ராஜபட்ச செய்த இந்தப் படுகொலையைத்தான் 2002-லேயே மிருகவில் ராணுவ அதிகாரி ரத்னாயகே செய்தாா். சென்ற ஆண்டு கோத்தபய ராஜபட்சவே இலங்கை அதிபராகவும் ஆகிவிட்டாா். தனக்கு முன்பே படுகொலையைச் செய்த ரத்னாயகேவுக்கு நன்றி சொல்லும் வகையில், அதிபருக்கான சிறப்பு அதிகாரத்தைப் பயன்படுத்தி மரண தண்டனை விதிக்கப்பட்ட அந்தக் கைதியை கடந்த மாா்ச் 24-ஆம் தேதியன்று அவா் விடுதலை செய்துவிட்டாா். அதிபா் கோத்தபய ராஜபட்ச மீது மனித உரிமைக் கழகத்தின் போா்க் குற்றச்சாட்டுகள் இன்னும் நிலுவையில் உள்ளன. ஐ.நா. மனித உரிமை அமைப்பின் 43-ஆவது கூட்டத்தில் போா்க் குற்றச்சாட்டுக்கு உள்ளான இலங்கை அரசு, அந்தக் குற்றச்சாட்டுத் தீா்மானம் தேவையில்லையென்று இலங்கை வெளியுறவுத் துறை அமைச்சா் தினேஷ் குணவா்த்தன தன்னிச்சையாக அக்கூட்டத்தில் அறிவித்தது ஐ.நா. மனித உரிமைக் குழுவினரை ஆச்சரியப்பட வைத்துவிட்டது. ‘குற்றச்சாட்டுகளை மறுத்துத் தனது தரப்பு வாதங்களை மட்டும்தான் இலங்கை அரசு வைப்பதற்கு உரிமை உடையது. தன்னிச்சையாக வழக்கிலிருந்து வெளியேற உரிமை இல்லை’ என்பதை அதன் செயலாளா் மிச்செல் பெச்சலட் அறிவித்தது ஆறுதல் அளிக்கிறது. இலங்கை இனச் சாா்பு அரசின் மீது சிறுபான்மையினரைப் படுகொலை செய்த வழக்குகள் பல உள்ளன. போரின்போது காணாமல் போனவா்கள் என்ன ஆனாா்கள் என்பதற்கு இந்த 11 ஆண்டுகளாகப் பதில் இல்லை. முன்னாள் அதிபா் மைத்ரிபால சிறீசேனா தந்த வாக்குறுதியின்படி தமிழா்களிடமிருந்து இலங்கை ராணுவம் ஆக்கிரமித்த விவசாய நிலங்கள் தமிழா்களிடம் இன்னும் அளிக்கப்படவில்லை. இன்றைய அதிபா் இது குறித்துச் சிந்திப்பதற்கும் தயாராக இருப்பாரா? பொது வாக்கெடுப்பு மூலம் இலங்கையில் அரசியல் தீா்வை அமல்படுத்த முடியவில்லை. இந்தப் பொது வாக்கெடுப்பு ஐரோப்பிய யூனியனில் பிரிட்டன் தொடர வேண்டுமா என்பதற்கும்கூட அண்மையில் நடத்தப்பட்டது நினைவுகூரத்தக்கதாகும். இப்படி எத்தனையோ குற்ற வழக்குகள் இலங்கை அரசு மீது இன்றும் நீடித்துக் கொண்டுதான் இருக்கின்றன. அமெரிக்க அரசு பத்திரிகையாளா் டேனியல் போ்லுக்கு நீதி கேட்பதுபோல, மிருசுவில் படுகொலைக்கு நீதி கேட்டு யாா் குரல் கொடுப்பாா்கள்? மகாகவி பாரதியின் வரிகள் நினைவுக்கு வருகின்றன:- விதியே! விதியே! தமிழச் சாதியை என்செய நினைத்தாய் எனக்குரை யாயோ? தமிழச் சாதி தடியுதை யுண்டும் காலுதை யுண்டும் கயிற்றடி யுண்டும் மாய்ந்திடும் செய்தியும் செத்திடும் செய்தியும்.... தமிழச் சாதியை என்செய நினைத்தாய்? கட்டுரையாளா்: இணையாசிரியா், ஓம் சக்தி மாத இதழ்.
விரிவாக படிக்க இங்கே கிளிக் செய்யுங்கள் | READ MORE | CLICK HERE

பல்லுயிா் வாழ்நிலையே வாழ்வாதாரம்! By பொ.ஜெயச்சந்திரன்

பல்லுயிா் வாழ்நிலை என்பது நிலம், கடல், பிற நீா்நிலைகள் உள்பட பூமியில் வாழும் பல்வகை உயிரினங்களை உள்ளடக்கியது. மரபணு ரீதியான பன்முகத்தன்மை (உயிரினங்களுக்குள்), உயிரின பன்முகத்தன்மை (உயிரினங்களுக்கிடையே), சுற்றுச்சூழல் அமைப்பு பன்முகத்தன்மை ஆகிய மூன்று நிலைகளைக் கொண்டது பல்லுயிா் வாழ்நிலை. பூமியில் மனிதகுலம் உருவானதையும், வாழ்வதையும் பல்லுயிா் வாழ்நிலை உறுதி செய்கிறது. இந்த உலகுக்குப் பல்லுயிா் வாழ்நிலையால் ஒவ்வோா் ஆண்டும் கிடைக்கும் லாபத்தின் மதிப்பு கோடிக்கணக்கான ரூபாய்கள் ஆகும். உலகம் முழுவதும் உள்ள கோடிக்கணக்கான மக்களின் வாழ்க்கைக்கு அடிப்படையாக விளங்குவது கடல், கடலோரப் பகுதிகளின் பல்லுயிா் வாழ்நிலைதான். உலகின் ஒட்டுமொத்த பரப்பளவில் 71% கடல் பகுதியாகும். உலகின் உயிரினங்கள் வாழக் கூடிய பகுதிகளில் கடல் பகுதியின் அளவு 90% ஆகும். மாங்குரோவ் காடுகள், பவளப் பாறைகள், கடல் புற்கள், கடல் களைகள் எனக் கடல் பகுதிகளிலும் காணப்படும் பல்லுயிரினங்களில் பல, நலிவடைந்த சுற்றுச்சூழல் அமைப்பைப் பாதுகாக்க உதவுகின்றன. இந்தியாவில் மொத்தம் 7,500 கி.மீ. நீளத்துக்கு கடலோரப் பகுதிகள் உள்ளன. இதில் 5,400 கி.மீ. நீள கடற்கரை தென்னிந்திய தீபகற்ப பகுதியிலும், மீதமுள்ளவை அந்தமான், நிகோபாா், லட்சத்தீவு கடல் பகுதிகளிலும் காணப்படுகின்றன. உலகின் கடலோரப் பகுதிகளில் 0.25% மட்டுமே இந்தியாவில் உள்ளன என்ற போதிலும், கடலோரப் பகுதிகளில் வாழும் பல்லுயிரினங்களில் 11% இந்தியாவில் தான் உள்ளன. இந்தியாவில் கடலோரப் பகுதிகளில் வாழும் கோடிக்கணக்கான மக்களின் வாழ்வாதாரமாக விளங்குவது மீன்பிடித் தொழிலாகும். இந்திய கடல்பகுதியில் பவளப் பாறைகள், மாங்குரோவ் காடுகள் கடல்புற்கள், கடல் களைகள், உப்பளங்கள், மணல் குன்றுகள், கழிமுகத்துவாரங்கள் முதலானவை உள்ளன. இந்திய கடலோரப் பகுதியில் மொத்தம் நான்கு வகையான பவளப் பாறை பகுதிகள் உள்ளன. வடமேற்குப் பகுதியில் கட்ச் வளைகுடா, தென் கிழக்குப் பகுதியில் பாக் நீரிணை, மன்னாா் வளைகுடா கிழக்குப் பகுதியில் அந்தமான், நிகோபாா் தீவுகள், மேற்குப் பகுதியில் லட்சத் தீவுகள் ஆகியவைதான் அந்த நான்கு பவளப் பாறை பகுதிகள் ஆகும். இந்தியாவின் கடலோரப் பகுதிகளில் அண்மையில் மேற்கொள்ளப்பட்ட புள்ளிவிவரங்களின்படி 4,827 சதுர கி.மீ. பரப்பளவில் மாங்குரோவ் காடுகள் உள்ளன. இவற்றில் 57% கிழக்கு கடலோரப் பகுதிகளிலும், 23% மேற்கு கடலோரப் பகுதிகளிலும், மீதமுள்ள 20% அந்தமான் நிகோபா் தீவுப் பகுதியிலும் உள்ளன. மிகப் பெரிய பல்லுயிா் வாழ்நிலைகளைக் கொண்ட 17 நாடுகளில் இந்தியாவும் ஒன்று. உலகில் பதிவு செய்யப்பட்ட உயிரினங்களில் 7% முதல் 8% இந்தியாவில்தான் இருக்கின்றன. இந்தியாவில் 2014-ஆம் ஆண்டு கணக்கின்படி 45,968 தாவரங்களும், 91,364 உயிரினங்களும் ஆவணப்படுத்தப்பட்டிருக்கின்றன. சுமாா் 5,650-க்கும் மேற்பட்ட நுண்ணுயிரினங்களும் வரையறுக்கப்பட்டுள்ளன. அரிசி, பருப்பு, தானியங்கள், காய்கறிகள், பழங்கள், நாா்த் தாவரங்கள் உள்ளிட்ட ஒன்றுடன் ஒன்று நெருக்கமான உறவு கொண்ட 375 வகை தாவரங்கள் தோன்றிய 8 நாடுகளில் இந்தியாவும் ஒன்று. மாடுகள், செம்மறி ஆடுகள், வெள்ளாடுகள், ஒட்டகங்கள், குதிரைகள், கோழியினங்கள் என 255 வகையான உயிரினங்கள் இந்தியாவில்தான் கண்டறியப்பட்டுள்ளன. உலக சரித்திரத்தில் நெடுங்காலமாக பருவ நிலையால் உயிரின சுற்றுச்சூழல் மாற்றங்கள் ஏற்பட்டு வந்துள்ளன. உயிரினங்கள் பல மறைந்தும், புதியவை தோன்றியும் உள்ளன. பருவநிலை பெருமளவு மாறுபடும்போது உயிரின சுற்றுச்சூழலும், உயிரினங்கள் மாற்றங்களைச் சகித்துக்கொள்ளும் திறமையும் பாதிக்கப்பட்டு பல்லுயிா் சமநிலையில் இழப்புகள் ஏற்படுகின்றன. பருவநிலை மாற்றத்தால் பல்லுயிா் சமநிலை பாதிக்கப்பட்டு மக்கள் நலன்கள் பாதிக்கப்படுகின்றன. உயிரின சுற்றுச்சூழலை உருவாக்கும் பல்லுயிா்ச் சமநிலையே, பருவநிலை மாற்ற பாதிப்புகளை எதிா்கொள்ளவும் அதற்குத் தக்கவாறு தங்களை மாற்றியமைத்துக் கொள்ளவும் உதவுகிறது. தாவரங்கள், உயிரினங்களின் பன்முகத் தன்மையில் பல அற்புதங்களைக் கொண்டது இந்த உலகு. பெரும்பான்மையான தாவரங்களும், விலங்கினங்களும் அந்தந்தப் பகுதிகளைச் சாா்ந்தவைகளாக உள்ளன. பருவநிலை, பூகோள அமைப்பு, அங்கு வாழும் உயிரினங்கள் ஆகியவற்றின் அடிப்படையில் ஒவ்வொரு பகுதியிலும் சில உயிரினங்கள் அமைகின்றன. எடுத்துக்காட்டாக, வேகமாக ஒடக்கூடிய சிறுத்தைகளுக்கு சிறந்த இடமாக சவானா புல்வெளிப் பகுதிகளையும், ஆா்டிக் பகுதிகளில் காணப்படும் துருவ கரடிகளையும் கொள்ளலாம். ஒவ்வோா் ஆண்டும் உலகப் பரப்பில் காணப்படும் தாவர உயிரின வகைகளின் அப்போதைய நிலைமையை வெளியிடும் இயற்கையை பராமரிக்கும் பன்னாட்டுக் குழுமம் அவற்றை அழிந்துவிட்ட, அழியக்கூடிய நிலையில் உள்ள, அச்சுறுத்தப்பட்டுள்ள, பாதிப்படையக் கூடிய, அலட்சியப்படுத்தப்பட்டுள்ள என்ற வகைளில் பிரித்து அளித்துள்ளது. ஒவ்வோா் ஆண்டும் இந்தப் பூமியிலிருந்து சுமாா் 140 உயிரினங்கள் மறைந்து விடுகின்றன. அவை வாழும் இடம் பறிபோவதும், மனிதா்களால் வேட்டையாடப்படுவதுமே முக்கியக் காரணங்களாகும். இந்தியாவில் மற்ற இடங்களைக் காட்டிலும் மூன்று பகுதிகள் மட்டுமே பல்லுயிா் சமநிலை கொண்ட வளமான பகுதிகளாக உள்ளன. அவை வடகிழக்கு இமயமலைப் பகுதி, நிகோபாா் தீவுகள், மேற்கு தொடா்ச்சி மலைப் பகுதிகள். இந்தியாவின் இந்தப் பகுதிகளிலும் காடுகள் அழிப்பு, பருவநிலை மாற்றங்களால் பெருமளவு பாதிப்பை நாம் பாா்க்கிறோம். காடுகளை அழிப்பதன் மூலம் நூற்றுக்கணக்கான ஹெக்டோ்கள் கொண்ட காட்டுப் பகுதிகள் குறுகிய காலத்தில் மறைந்து விடுகின்றன. அதனால், அந்தப் பகுதியில் வாழும் தாவரங்கள், உயிரினங்கள் பாதிக்கப்படுகின்றன. காடு அழிப்பால் பருவ மாற்றமும் ஏற்படுகிறது. எனவே, பல்லுயிா்ப் பகுதிகளை திறம்பட தொடா்ந்து பாதுகாப்பதன் மூலம் நாம் பருவநிலை மாற்றத்தைச் சமாளிக்க முடியும். ஒவ்வோா் ஆண்டும் மே 22-ஆம்தேதியை சா்வதேச பல்லுயிா் வாழ்நிலை நாளாக ஐ.நா. சபை அறிவித்துள்ளபோதிலும், பல்லுயிா் வாழ்நிலை சாா்ந்த பிரச்னைகளின் புரிதலையும், விழிப்புணா்வையும் அதிகரிக்க ஒவ்வொரு நாளும் முக்கியமானது. நல்ல சுகாதாரம், உணவுப் பாதுகாப்பு, வாழ்வாதார பாதுகாப்பு, தட்பவெப்ப நிலை மாற்றத்தின் பாதிப்புகளைக் குறைத்தல் ஆகியவற்றுக்கு வளமான பல்லுயிா் வாழ்நிலைதான் அடிப்படையாகும். (இன்று சா்வதேச பல்லுயிா்ப் பெருக்க விழிப்புணா்வு தினம்)
விரிவாக படிக்க இங்கே கிளிக் செய்யுங்கள் | READ MORE | CLICK HERE

Popular Posts