மத்திய பட்ஜெட்: ஒரு பார்வை

ஒவ்வொரு மத்திய நிதிநிலை அறிக்கையும் இந்தியப் பொருளாதாரத்தை முன்னேற்றப் பாதைக்கு இட்டுச் செல்லவே முயல்கின்றன. நாடாளுமன்றத்தில் ஞாயிற்றுக்கிழமை (பிப். 1) தாக்கல் செய்யப்பட்ட 2026-27 நிதியாண்டுக்கான நிதிநிலை அறிக்கை சில தனித்துவமான அம்சங்களைக் கொண்டுள்ளது. தொடர்ந்து 9-வது முறையாக மத்திய நிதிநிலை அறிக்கையைத் தாக்கல் செய்த ஒரே பெண் நிதியமைச்சர் என்ற பெருமையை நிர்மலா சீதாராமன் பெற்றுள்ளார்.

முக்கிய அம்சங்கள்:

• நிதி ஸ்திரத்தன்மை மற்றும் மூலதனச் செலவு: பேரியல் பொருளாதாரத்திற்கு (மேக்ரோ எகானமி) ஸ்திரத்தன்மை அளிக்கும் வகையில், நாட்டின் நிதிப் பற்றாக்குறையைத் தொடர்ந்து குறைக்கும் முயற்சியாக இந்த நிதிநிலை அறிக்கை தாக்கல் செய்யப்பட்டுள்ளது. அரசின் மூலதனச் செலவினம் ரூ. 17.1 லட்சம் கோடியாக மூன்றாம் முறையாக அதிகரிக்கப்பட்டுள்ளது (நிகழ் நிதியாண்டுக்கான திருத்தப்பட்ட மதிப்பீடு ரூ. 14.03 லட்சம் கோடி). இந்த மூலதனச் செலவு அதிகரிப்பு, வளர்ச்சி வேகத்தைத் தொடர்ந்து தக்கவைக்கும்.
• புதிய தொழில்நுட்பங்களுக்கான ஆதரவு: உயிரி மருந்துகள், செயற்கை நுண்ணறிவு போன்ற புதிய தொழில்நுட்பத் துறைகளுக்குத் துணை நிற்கும் நடவடிக்கையை மத்திய அரசு இந்த அறிக்கை மூலம் முன்னெடுத்துள்ளது.
• வரி நடைமுறை சீர்திருத்தங்கள்: வரி செலுத்துவோருக்கு வசதி செய்து தரும் வகையில், பல நடைமுறை மாற்றங்கள் நிதிநிலை அறிக்கையில் செய்யப்பட்டுள்ளன.
• வேகமான வளர்ச்சித் துறைகளுக்கு முதலீடு: உயிரி மருந்து உற்பத்தி, செமிகண்டக்டர் போன்ற வேகமாக வளர்ந்துவரும் துறைகளுக்கும், மின்னணுப் பாகங்கள் உற்பத்திக்கும் பெரிய அளவில் முதலீடு செய்யப்பட்டுள்ளது. தமிழகம், கேரளம், ஒடிஸô, ஆந்திரத்தில் பிரத்யேக அரிய வகை தாதுக்களை எடுப்பதற்கான வழித்தடங்கள் அமைப்பது, சிறப்பு வேதியியல் பூங்காக்கள், உற்பத்தியாளர்களுக்குத் தேவையான உள்கட்டமைப்புத் திட்டங்களை அதிகரிப்பது, ஜவுளித் துறைக்கான பல்வேறு திட்டங்கள் போன்றவை வரவேற்கத்தக்கவை.
• உள்கட்டமைப்பு: 7 அதிவேக ரயில் தடங்கள் அமைக்கப்படும் என்ற அறிவிப்பு, அரசின் உயரிய இலக்குகளுக்குப் பெரிய அளவில் முதல்கட்ட மற்றும் தொடக்க நிலைப் பணிகள் அதிகம் தேவைப்படுகின்றன என்பதைக் காட்டுகிறது.
• சிறு, குறு, நடுத்தர நிறுவனங்களுக்கான ஒதுக்கீடு: சிறு, நடுத்தர நிறுவனங்கள் வளர்ச்சி நிதியாக ரூ. 10,000 கோடி ஒதுக்கப்பட்டுள்ளது. மேலும், குறு நிறுவனங்கள் மேம்பாட்டுக்காக ரூ. 2,000 கோடி அளிக்கப்படுகிறது.

கவலைக்குரிய அம்சங்கள்:

• வருவாய் வளர்ச்சி வேகம் குறைவு: நேரடி மற்றும் மறைமுக வரி விதிப்பில் அளிக்கப்பட்ட பெரும் வரிச் சலுகைகளின் தாக்கத்தால் வருவாய் வளர்ச்சியின் வேகம் குறைந்துள்ளது நிதிநிலை அறிக்கைமூலம் தெரிகிறது. வரி வருவாய் வளர்ச்சி குறைந்ததன் காரணமாக வருவாய் செலவினத்தில் வேகம் காட்டுவது குறைந்துள்ளது. உதாரணமாக, மத்திய அரசு ஊழியர்களுக்கு அதிகரிக்கப்படும் அகவிலைப்படி உயர்வு குறித்த அறிவிப்பை மத்திய அரசு ஒத்திவைத்துள்ளது. இத்தகைய நடவடிக்கைகள் பணவீக்கம் குறைவாக இருக்கவும், நியாயமான வளர்ச்சி விகிதத்துடன் பொருளாதாரம் ஸ்திரமாக இருக்கவும் வழிவகுக்கும்.
• வட்டிச் சுமை: கடனுக்கான வட்டி செலுத்துவதில் அதிக அளவு நிதி மத்திய அரசிடமிருந்து செல்வது வருத்தத்துக்குரிய விஷயமாக உள்ளது. அடுத்த நிதியாண்டில் (2026-27) மதிப்பிடப்பட்டுள்ள நிகர வரி வருவாய் ரூ. 28.66 லட்சம் கோடியில், கடனுக்கான வட்டியாக ரூ. 14.09 லட்சம் கோடியைச் செலுத்த வேண்டியிருக்கும்; அதாவது, கடனுக்கான வட்டி சுமார் 50 சதவீத வரி வருவாயை விழுங்கி விடுகிறது.
• செல்வந்தர்களுக்குப் பலன்: இந்த வட்டித் தொகை, அரசிடம் கடன் பெற நினைக்கும் பெரு நிறுவனங்கள் (கார்ப்பரேட் நிறுவனங்கள்) மற்றும் கோடீஸ்வரர்களுக்குச் சென்றுவிடும் விரும்பத்தகாத பின்விளைவை ஏற்படுத்துகிறது. கோடிக்கணக்கான இந்தியர்கள் செலுத்தும் வரியில் 50 சதவீத அளவுக்கு பெரும் நிறுவனங்களுக்கும், கோடீஸ்வரர்களுக்கும் செல்லும் நிலை நீடிப்பது, மக்களின் வருமானத்தில் ஏற்றத்தாழ்வை அதிகரிக்கிறது.
• ரூபாய் மதிப்பு சரிவு: அமெரிக்க டாலருக்கு நிகரான இந்திய ரூபாயின் மதிப்பு 91 ரூபாய்க்கும் அதிகமாகச் சரிந்துள்ளது. இதை மத்திய அரசு கண்டுகொள்ளவில்லை என்று கூறுவோர் இருக்கலாம். ஆனால், இந்தச் சரிவு உள்நாட்டு நிறுவனங்கள் வெளிநாடுகளில் இருந்து கடன் பெறுவதில் பெரும் சுமையை ஏற்படுத்தி, அவற்றால் அரசுக்குக் கிடைக்கும் வருவாயையும் பாதிக்கச் செய்யும். எனினும், இந்தியாவின் அந்நியச் செலாவணி கையிருப்பு முன்னெப்போதும் இல்லாத அளவாக 706 பில்லியன் டாலராக (சுமார் ரூ. 64 லட்சம் கோடி) உள்ளது. அந்நிய முதலீட்டாளர்கள் வெளியேறுவதாலும், இந்திய நிறுவனங்கள் வெளிநாடுகளில் முதலீடு செய்வதாலும் ஏற்படும் மூலதன வெளியேற்றம் இதில் குறைந்த பாதிப்பையே ஏற்படுத்தியுள்ளது. ரூபாய் மதிப்பின் சரிவு, நமது ஏற்றுமதியாளர்களுக்கு வெவ்வேறு நாடுகளுக்கு ஏற்றுமதியை அதிகரிக்கவும், அந்த நாடுகளின் சந்தைகளில் போட்டி போடவும் வாய்ப்பை ஏற்படுத்தியுள்ளது.
• சர்வதேச வரிவிதிப்பு விளைவுகள்: அமெரிக்க அதிபர் டிரம்ப்பின் இந்தியப் பொருள்கள் மீதான வரி விதிப்பு, ஜவுளி, ரத்தினங்கள், ஆபரணம், தோல் பொருள் துறைகளுக்குப் பாதிப்பை ஏற்படுத்தியிருந்தாலும், அந்தப் பாதிப்பு சொற்ப அளவில் உள்ளதாகவே தென்படுகிறது.

குறைகளும் எதிர்பார்ப்புகளும்:

• சிறு, குறு, நடுத்தர நிறுவனங்களின் சவால்கள்: ஒதுக்கப்பட்ட நிதிகள் நடைமுறையில் எந்த அளவுக்குப் பயனளிக்கும் என்பதே சிறு, குறு, நடுத்தர நிறுவனங்களின் கேள்வியாக உள்ளது. விநியோகித்த பொருள்களுக்குப் பணம் கிடைப்பதில் தாமதம், கடன் பெறுவதற்கான நீண்ட நடைமுறைகள், முத்ரா திட்டத்தில்கூட கடன் கிடைப்பதில் பிரச்னை, வரித் துறை அதிகாரிகளின் தொல்லைகள் போன்ற அன்றாடச் செயல்பாட்டுப் பிரச்னைகள் அதிகம் இருப்பதாக அவை கூறுகின்றன. இந்த நிர்வாகச் சிக்கல்களை மாநில அளவிலான அதிகாரிகள் தீர்க்க நிர்வாகச் சீரமைப்பு அவசியமாகிறது.
• சமூகப் பாதுகாப்பு மற்றும் வர்த்தக ஒப்பந்தங்கள்: வேலை இல்லாதவர்களுக்கு இஎஸ்ஐ மூலம் நிதியுதவி அளிக்கப்படும் என்ற எதிர்பார்ப்பு நிறைவேறவில்லை. மேலும், ஏற்றுமதியை அதிகரிக்கவோ, பிரிட்டன் மற்றும் ஐரோப்பிய யூனியனுடன் மேற்கொள்ளப்பட்டதைப் போல பிற நாடுகளுடன் தடையற்ற வர்த்தக ஒப்பந்தங்களை விரைந்து மேற்கொள்ளவோ எந்த நடவடிக்கையும் மேற்கொள்ளப்படவில்லை.
• தொழிலாளர் நலன் மற்றும் ஊதியம்: அதிக பணிக்கொடை, ஊதியம் ஆகிய வழிகளில் தொழிலாளர்களுக்கு கூடுதல் பணம் கிடைக்க புதிய தொழிலாளர் சட்டம் நிச்சயம் வழிவகுக்கும். அதேவேளையில், தனி நபர்களை வறுமைக் கோட்டுக்கு மேல் மட்டும் வைத்திருக்காமல், அவர்களை நியாயமான முறையில் வசதியாக வைத்திருக்கும் நோக்கில், அவர்களுக்கான குறைந்தபட்ச ஊதியத்தை மத்திய அரசு நிர்ணயிக்க வேண்டும். இது வர்த்தகத் துறையில் போட்டியாளர்களுக்கு எதிராக இந்தியாவுக்கு உள்ள சாதகமான நிலையை ஒழித்துவிடும் என்று தனியார் துறை வாதிட வாய்ப்புள்ளது.
• வரிச் சட்ட மாற்றங்களில் வெளிப்படைத்தன்மை: வருமான வரிச் சட்டத்தில் பல நடைமுறை மாற்றங்கள் முன்மொழியப்பட்டுள்ளன. புதிய வருமான வரிச் சட்டம் 2026, ஏப்ரல் 1-ஆம் தேதி அமலுக்கு வரவிருக்கும் நிலையில் இந்த மாற்றங்கள் அறிவிக்கப்பட்டுள்ளது வியப்புக்குரியதுதான். பங்குப் பரிவர்த்தனை வரி (எஸ்டிடி) அதிகரிக்கப்பட்டுள்ளதன்மூலம் அரசு மறைமுகமாக பல ஆயிரம் கோடி ரூபாய் வருவாய் ஈட்டுவதாக விமர்சகர்கள் கூறுகின்றனர். குறைந்தபட்ச மாற்று வரி (மேட்) நீக்கம் கணக்கீட்டில் உள்ள சிக்கல்களை நீக்கியுள்ளது. புதிய நிறுவனங்களுக்கு வரி விகிதம் 15 சதவீதத்தில் இருந்து 14 சதவீதமாகக் குறைக்கப்பட்டுள்ளது (22 சதவீத வரி விதிப்பு விகிதத்தில் வரும் நிறுவனங்களுக்கு இது பொருந்தாது). நேரடி, மறைமுக வரியில் செய்யப்பட்டுள்ள மாற்றங்கள் அரசின் வருவாயில் எந்த வகையிலான தாக்கத்தை ஏற்படுத்தும் என்பதை அரசு வெளிப்படையாகவே தெரிவித்திருக்கலாம்.

நடைமுறைப்படுத்துதல் சவால்கள்:

நிதிநிலை அறிக்கைகளைத் தொடர்ந்து கண்காணிப்பவர்கள், அறிவிப்புகளைச் செயல்படுத்துவதில் உள்ள மந்த நிலையையும் கவனத்தில் கொள்வார்கள். நிதிநிலை அறிக்கை அறிவிப்புகளை அமல்படுத்துவதில் பல அமைச்சகங்கள் இணைந்து ஈடுபடுவதால் ஏற்படும் நடைமுறைச் சிக்கல்களே இதற்குக் காரணம்.

முடிவுரை:

மத்திய அரசின் நிதிநிலை அறிக்கை எப்போதும் தொடர் முன்னேற்றத்துக்கானவை. நிதி ஸ்திரத்தன்மை, சீரமைப்பைக் கொண்டு வருவதுடன் மூலதனச் செலவின வேகத்தையும் தக்கவைக்க வேண்டியுள்ளது. ஒவ்வோர் ஆண்டும் புதிய அறிவிப்புகள் நம்பிக்கையையும், எதிர்பார்ப்புகளையும் உருவாக்கினாலும் அவற்றை நடைமுறைப்படுத்துவதில் ஏற்படும் தாமதங்கள் வேலைவாய்ப்பு உருவாக்கத்தையும், இறுதியில் பொருளாதார வளர்ச்சியையும் சற்று மந்தமாக்குகின்றன.