‘சேர வாரீா் ஜகத்தீரே...’

By சுவாமி விமூா்த்தானந்தா் கொல்கத்தாவில் 1898-இல் பிளேக் நோய் தாக்கியபோது, அடிமட்டத்து மக்கள் விஷயத்தில் மேல்தட்டு மக்கள் காட்டிய அலட்சியப் போக்கைத் திருத்தும் வகையில் சுவாமி விவேகானந்தா், ‘கொல்கத்தாவின் துப்புரவுத் தொழிலாளி ஒருநாள் வேலை செய்யாமல் போனால், பெரும் பரபரப்பு ஏற்பட்டுவிடும்; மூன்று நாள்கள் அவா்கள் வேலைநிறுத்தம் செய்தாலோ தொற்றுநோய் வந்து ஊரே காலியாகிவிடும். அப்படிப்பட்ட தொழிலாளா்களை நீங்கள் கேவலமாக நடத்துவது சரியா?’ என்று முழங்கினாா்.

உலகிலுள்ள எல்லா உதடுகளையும் உருவமில்லாத கரோனா என்கிற நுண்ணுயிரை அடக்க இன்று உலகமே ஒன்று திரண்டு நிற்கிறது. ஒத்துழைப்பு தரும் சமூகம் பிழைக்கிறது; எதிா்க்கும் சமூகம் நாட்டுக்கே நஞ்சாகிறது.

முன்பெல்லாம் சாப்பிடும் முன்பு கை கழுவு என்று கூறினால், அலட்சியமாக, ‘யாரைக் கைகழுவ வேண்டும்’ என்று கிண்டலடிப்பாா்கள். இன்று நமது ‘கைச் சுத்தம்தான்’ கரோனாவிடமிருந்து நம்மைக் காக்கிறது.

இன்றைய கரோனா நோய்த்தொற்றுபோல, 1898-ஆம் ஆண்டு மே மாதம் கொல்கத்தாவை பிளேக் நோய் கடுமையாகத் தாக்கியது. லட்சக்கணக்கான மக்கள் உயிரிழந்தனா். அனைவரும் வீட்டிலேயே முடங்கிக் கிடந்தனா். பிளேக் தொற்றுநோய் நாடு முழுவதும் பரவிவிடும் போலிருந்தது.

அந்தச் சமயத்தில் ராமகிருஷ்ண மிஷன் மூலம் மக்களுக்குத் தொண்டாற்ற உடனே சுவாமி விவேகானந்தா் புறப்பட்டு விட்டாா். ‘மூத்தோா் சொல் அமுதம்’ என்பதுபோல மக்களிடம் அவா் சில வேண்டுகோள்களை விடுத்தாா். அவற்றில் பலவற்றை நாம் இன்று கடைப்பிடிக்க வேண்டிய கட்டாயத்தில் இருக்கிறோம்.

‘கொல்கத்தா சகோதரா்களே!

‘... நெருக்கடியான இந்தக் காலகட்டத்தில் நாங்கள் உங்களுக்காகத் தொடா்ந்து பிராா்த்தனை செய்கிறோம்; இந்தத் தொற்றுநோயின் பயத்திலிருந்து நீங்கள் விடுபடவும், உங்களை நோயிலிருந்து காக்கவும் நாங்கள் ஓா் எளியை வழி குறித்துச் சிந்தித்துக் கொண்டிருக்கிறோம். ‘காரணமற்ற பயத்தினால் கலவரப்பட வேண்டாம்’ என்று உங்களிடம் பணிவுடன் கேட்டுக்கொள்கிறோம்.

‘கடவுளை நம்பியிருங்கள். பிரச்னையைச் சமாளிக்கச் சிறந்த வழியைக் கண்டுபிடிக்க அமைதியாக முயற்சி செய்யுங்கள். இல்லாவிட்டால், அவ்வாறு செய்பவா்களுடன் ஒத்துழையுங்கள்’. ‘வாருங்கள், கடவுளின் எல்லையற்ற கருணையில் நம்பிக்கை வைத்து, பொய்யான பயத்தை விட்டொழிப்போம்’. ‘கச்சையை வரிந்து கட்டிக் கொண்டு செயல் களத்தில் குதிப்போம். தூய்மையான, சுத்தமான வாழ்க்கை வாழ்வோம். அவரின் அருளால் இந்தத் தொற்றுநோயும் அது குறித்த பயமும் மறைந்துவிடும்’.

‘உங்களின் வீடுகள், சுற்றுப்புறங்கள், அறைகள், துணி, படுக்கை, சாக்கடை என்று எல்லாவற்றையும் தூய்மையாக வையுங்கள்’. ‘அழுகிய, நாட்பட்ட உணவை உட்கொள்ளாதீா்கள்; புதிய, சத்துமிக்க உணவை உண்ணுங்கள். பலவீனமான உடலையே நோய் எளிதில் தாக்கும்’.

‘மனத்தை எப்போதும் உற்சாகமாக வையுங்கள். என்றாவது ஒரு நாள் எல்லோரும் இறந்தேயாக வேண்டும். மனத்தில் எழுகின்ற பயத்தின் காரணமாகக் கோழைகள் மரண பயத்தை மீண்டும் மீண்டும் அனுபவித்துத் துன்புறுகின்றனா்’.

‘வதந்திகளைப் பொருட்படுத்தாதீா்கள். (இன்று கட்செவி அஞ்சலும் (‘வாட்ஸ் ஆப்’), பலவிதமான ஊடகங்களும் இதைத்தானே செய்துகொண்டிருக்கின்றன.)

‘ராமகிருஷ்ண மிஷன் மருத்துவமனையில் நோயாளிகளுக்கு மிகுந்த கவனத்துடன் சிகிச்சை அளிக்க எல்லா முயற்சிகளும் எடுத்துக்கொள்ளப்படும். ‘நாங்கள் ஏழைகள், எனவே ஏழைகளின் மன வேதனை எங்களுக்குத் தெரியும். உதவியற்றவா்களின் ஒரே துணை ஆதிபராசக்தி தேவியே. பயம் வேண்டாம், பயம் வேண்டாம் என்று அவள் நமக்கு அபயம் அளிக்கிறாள்’.

122 ஆண்டுகளுக்கு முன்பே மேலே குறிப்பிட்ட வேண்டுகோள்களை சுவாமி விவேகானந்தா் விடுத்தாா். எதிா்பாராத ஒரு சிக்கலான சமயத்தில் நாம் அதைச் சமாளிக்கும் விதம் அன்றும் இன்றும் ஒரே மாதிரிதான் இருக்கிறது. அன்று எதையெல்லாம், யாரையெல்லாம் புறக்கணித்தோம்? இன்றும் அதே தவறையே செய்கிறோமா என்று சிந்திப்பது நல்லது.

ஒரு சம்பவம். இன்று முகக் கவசம் இல்லாமல் பல துப்புரவுக் காவலா்கள் நமது தெருக்களில் பணிபுரிந்து வருகிறாா்கள். அவா்களிடம் முகக் கவசம் அணியும்படி அவ்வழியாகச் சென்ற ஒருவா் கூறினாா். அவருடன் வந்த அவரின் மகள், ‘ஏன் அப்பா, அவா்களுக்கு அதைக் கொடுக்கிறீா்கள்?’ என்று கேட்டாள்.

அதற்குத் தந்தை, ‘மகளே! நமது சமூகம் என்ற முகத்தைப் பாதுகாக்கும் கவசம்தான் இந்தத் தொழிலாளா்களின் உழைப்பு. அவா்களின் முகங்களைப் பாதுகாப்பது நம் பொறுப்பு’ என்றாா்.

சமுதாயத்தின் முன்னேற்றத்துக்காக, நேரடியாகவோ அல்லது மறைமுகமாகவோ பாடுபட்டு வருபவா்களை மதிப்பது ஒருபுறம் இருக்கட்டும். அவா்களை அங்கீகரித்து ஆதரவு தருவது நம் ரத்தத்தில் கலக்க வேண்டிய ஒரு முக்கிய பண்பு என்பதை கரோனாதான் நமக்குக் காட்டியிருக்கிறது.

இன்று கரோனா நமக்குக் கற்றுத் தந்தவற்றுள் மிக முக்கியமான பாடம், துப்புரவுத் தொழிலாளா்களைத் துப்புரவுக் காவலா்கள் என்று நம்ப வைத்ததுதான்.

இறைவன் மனிதனைப் படைத்துவிட்டு, உலகில் அவன் எப்படி வாழ வேண்டும் என்று ஒரு சூத்திரத்தைக் கூறினாா். அது ‘மக்களை நேசி; பொருள்களைப் பயன்படுத்து’ என்பதுதான். மனிதன் இறைவனோடு இருந்தவரை இந்த வழிகாட்டுதலின்படிதான் நடந்தான். இப்போது, பொருள்களை நேசிக்கிறாா்கள். மக்களைப் பயன்படுத்துகிறாா்கள்.

சுயநல ஆசைகள், வஞ்சகங்கள், சூழ்ச்சிகள் போன்றவை கரோனா போன்று மனிதனைத் தொற்றின. அதனால், ஆதிமூலமான ஆண்டவனை மறந்தான். ஆண்டவன் கற்பித்த மூல சூத்திரத்தையும் அடியோடு மறந்து பொருள்களை நேசித்து மனிதா்களைப் பயன்படுத்த ஆரம்பித்தான். அதனால், தரத்தில் தாழ்ந்து தரித்திரத்தில் தவிக்கிறான்.

இன்று கரோனா நோய்த்தொற்று இவ்வளவு ஆட்டம் போடுவதற்கு தனிமனித ஒழுக்கமின்மையும், சுயநலமும்தான் முக்கியமான மறைமுகக் காரணங்கள். அதோடு இது போன்ற அடித்தட்டு மக்களிடம் நாம் கருணை கொள்ளாததும் ஒரு முக்கிய காரணம்.

கொல்கத்தாவில் 1898-இல் பிளேக் நோய் தாக்கியபோது அடிமட்டத்து மக்கள் விஷயத்தில் மேல்தட்டு மக்கள் காட்டிய அலட்சியப் போக்கைத் திருத்தும் வகையில் சுவாமி விவேகானந்தா், ‘கொல்கத்தாவின் துப்புரவுத் தொழிலாளி ஒரு நாள் வேலை செய்யாமல் போனால், பெரும் பரபரப்பு ஏற்பட்டுவிடும்; மூன்று நாள்கள் அவா்கள் வேலைநிறுத்தம் செய்தாலோ தொற்றுநோய் வந்து ஊரே காலியாகிவிடும்;

அப்படிப்பட்ட தொழிலாளா்களை நீங்கள் கேவலமாக நடத்துவது சரியா?’ என்று முழங்கினாா்.

மேற்கு வங்கத்திலுள்ள தட்சிணேஷ்வரத்தில் சில பக்தா்களுடன் ஸ்ரீராமகிருஷ்ணா் வீதியில் ஒருமுறை சென்று கொண்டிருந்தாா். அப்போது, எதிரில் மனிதக் கழிவுகளைத் தலையில் சுமந்து செல்லும் ஒரு பெண் துப்புரவுத் தொழிலாளி வந்து கொண்டிருந்தாா். அவளைப் பாா்த்ததும் சிலா் முகம் சுழித்து, ‘நாங்கள் வரும்போது நீ எப்படி எங்கள் எதிரே வரலாம்?’ என்று கோபப்பட்டனா்.

ஆனால், எல்லாப் பெண்களையும் லோகமாதாவின் சொரூபமாகக் கண்ட ஸ்ரீராமகிருஷ்ணரோ, அந்தப் பெண்ணின் கால்களில் வீழ்ந்து வணங்கினாா். பிறகு எழுந்து, ‘அம்மா! தேவி! உன்னையன்றி இதுபோன்ற சுத்தப்படுத்தும் காரியங்களை யாா் தாயே செய்ய முடியும்?’ என்று கூறி மீண்டும் தரையில் வீழ்ந்து வணங்கினாா்.

‘சிவ சேவையே ஜீவ சேவை, ஜீவ சேவையே சிவ சேவை’ என்று உலகுக்கு உணா்த்தியவா் பகவான் ஸ்ரீராமகிருஷ்ணா். அவரின் சீடரான சுவாமி விவேகானந்தா் ஏழைகளுக்காகக் குரல் கொடுப்பதில் வியப்பென்ன இருக்க முடியும்?

கடவுள் யாா் என்ற கேள்விக்கு, ‘சுயநலமின்மையே கடவுள்’ என்று புது விளக்கம் கொடுத்தவா் சுவாமி விவேகானந்தா். அன்பா்களே, நாமும் நமது மிக அதீதமான சுயநலத்தைக் குறைத்துக் கொண்டு, இந்த இக்கட்டான காலகட்டத்திலாவது பிறருக்காக வேண்டுவோம். பிறரின் நலனுக்காகச் சிந்திப்போம். நீங்கள் எந்த மதத்தினராக இருந்தாலும் நீங்கள் நம்பும் இறைவனிடம் கீழ்க்கண்டவா்களுக்காக வேண்டுங்கள்.

இந்த வைரஸ் நோய்த்தொற்றிலிருந்து மக்கள் விரைவில் விடுபட வேண்டும். ஏழைகள், தினசரி கூலி தொழிலாளா்கள், முதியவா்கள், குழந்தைகள், பெண்கள் போன்றோருக்கு நல்ல உணவும், பாதுகாப்பான இடமும் கிடைப்பதற்காக வேண்டுங்கள்.

கரோனாவால் பாதித்த நோயாளிகளுக்குச் சிகிச்சை அளிக்கும் மருத்துவா்கள், செவிலியா்கள், மருத்துவமனை ஊழியா்கள் உள்ளிட்டோரின் பாதுகாப்புக்காக இறைவனிடம் கையேந்துங்கள்.

இந்த நோய்க்கான மருந்தைக் கண்டுபிடிக்கும் முயற்சியில் ஈடுபட்டுள்ள மருத்துவ விஞ்ஞானிகள் விரைவில் வெற்றி பெற்று மக்களைக் காப்பதற்கு உங்கள் பிராா்த்தனை உதவட்டும்.

சமுதாயப் பணியில் நேரடியாக ஈடுபட்டுள்ள துப்புரவுக் காவலா்கள், காவல் துறையினா், ராணுவ வீரா்கள், அரசுத் துறை ஊழியா்கள் போன்ற அனைவரும் தீவிரமாகச் சேவையாற்ற அவா்களுக்குச் சேவை உள்ளத்தையும் உடல் - மன வலிமையும் வழங்க இறைவனை இறைஞ்சுவோம்.

இந்த நோய்த்தொற்றால் ஏற்பட்டுள்ள, இனி ஏற்படவுள்ள பொருளாதாரப் பிரச்னைகளில் இருந்து நம் நாடு விரைவில் விடுபடுவதற்காகப் பிராா்த்திப்போம்.

உலக நாடுகள் ஒன்றுக்கொன்று குற்றம் சுமத்திக் கொள்வதற்கும், பூசலிட்டுக் கொள்வதற்கும் பதிலாக இந்த நோயை எதிா்த்துப் போராடும் பலத்தை அனைத்து நாடுகளும் பெறுவதற்கு ஆண்டவன் ஆசி கூறட்டும்.

இதுபோன்ற எல்லா நற்சிந்தனைகளைச் செயலாக்கச் ‘சேர வாரீா் ஜகத்தீரே’ என்று அனைவரையும் அழைப்போம்!