வானொலி, கண்களுக்கு ஓய்வளித்து செவிகளுக்கு விருந்தளிக்கும் ஒரு பாரம்பரிய மற்றும் புகழ்பெற்ற ஊடகமாகும். இது நீண்ட காலமாகத் தகவல் தொடர்புத் துறையில் முக்கியப் பங்காற்றி வருகிறது. உலகம் முழுவதிலுமிருந்து தகவல்களைப் பெறவும், கல்வி மற்றும் கலாசாரங்களை வெளிப்படுத்தவும், விரும்பிய இசையைக் கேட்கவும் வானொலி ஒரு சிறந்த தளமாக விளங்குகிறது.
வானொலியின் தனிச்சிறப்புகள்
- கட்டணமில்லா சேவை: தொலைக்காட்சி நிகழ்ச்சிகளுக்குக் கட்டணம் வசூலிப்பதுபோல் அல்லாமல், வானொலி தகவல்களுக்கு எவ்விதக் கட்டணமும் வசூலிப்பதில்லை.
- எளிதில் எடுத்துச் செல்லக்கூடியது: விரும்பிய இடத்துக்கு கொண்டு செல்லக்கூடிய சாதனமாகவும் இது உள்ளது.
- வரலாற்றுச் சிறப்பு: முற்காலத்தில் மின்காந்த அலைகள் மூலம் தகவலை ஓரிடத்தில் இருந்து மற்றொரு இடத்துக்குக் கொண்டு சேர்த்த முதல் ஊடகம் வானொலியாகும். கடந்த நூற்றாண்டில், வானொலி ஒவ்வொரு வீட்டிலும் ஓர் அந்தஸ்தின் அடையாளமாகக் கருதப்பட்டது.
- மலிவானது மற்றும் எளிமையானது: வானொலியின் விலை மலிவானது. நிகழ்ச்சிகளைக் கேட்கத் தனியாக நேரம் ஒதுக்க வேண்டிய அவசியமும் குறைவு.
- அனைவருக்கும் பயனுள்ளது: பார்வை மாற்றுத் திறனாளிகள், கல்வியறிவு அதிகம் இல்லாதவர்கள், முதியோர்கள், விவசாயத் தொழிலாளர்கள், பயணிகள் என அனைத்துத் தரப்பினருக்கும் இது ஒரு சிறந்த தகவல் சாதனமாக, உற்ற தோழனாக இன்றளவும் திகழ்கிறது.
அகில இந்திய வானொலி நிலையமும், சென்னை வானொலி நிலையமும் மக்களுக்குப் பயனுள்ள பல்வேறு தகவல்களை அளித்து வந்துள்ளன. உலக, மாநில, வட்டாரச் செய்திகள், வானிலை அறிக்கைகள், இலக்கியம், கல்விச் சேவை, இசை நிகழ்ச்சிகள் (திரைப்படப் பாடல்கள், கிராமிய கலை, கர்நாடக இசை, கிராமப்புற இசை, நாட்டுப்புறப் பாடல்கள்), உரைச்சித்திரம், ஒலிச்சித்திரம், நாட்டு நடப்பு, நாடகங்கள், விநாடி வினா, பெண்களுக்கான நிகழ்ச்சிகள், குழந்தைகளுக்கான சிறுவர் சோலை, அறிவியல் தகவல்கள், இன்று ஒரு தகவல், விவசாயிகளுக்கான வீடும் வயலும், பண்ணை இல்லம், நேயர் விருப்பம், கிராமப்புற மேம்பாடு, பொதுப் பயன்பாட்டு நிகழ்ச்சிகள், விளையாட்டுச் செய்திகள், கிரிக்கெட் நேரடி வர்ணனை போன்ற பல்வேறு நிகழ்ச்சிகள் வானொலியில் நேர்த்தியாக ஒலிபரப்பப்பட்டன.
ஒலிபரப்பின் சிறப்பு
வானொலி நிகழ்ச்சிகள் பேசும் வார்த்தையில் அமைகின்றன. நிகழ்ச்சியில் பங்கு பெறுவோரை நேயர்களால் காண முடியாது. இருப்பினும், அதன் ஒலிபரப்பு உத்திகளால், பங்குபெறுவோரை நேரில் காண்பது போன்ற உணர்வு உருவாக்கப்படுகிறது. வானொலி நிகழ்ச்சித் தொகுப்பாளர்கள் அனைவரும் எளிதில் புரிந்து கொள்ளும் வகையில், சிறந்த நடையுடன் எளிய சொற்களைக் கொண்டு, தங்கள் குரல் திறனுடன் மிக நேர்த்தியாகப் பணியாற்றி நிகழ்ச்சிகளை வழங்குகின்றனர்.
கல்வி ஒலிபரப்பின்போது, மாணவர்கள் எளிதில் புரிந்து கொள்ளும் வகையில் அமையும் நிகழ்ச்சிகள் பள்ளி மற்றும் பல்கலைக்கழக மாணவர்கள் பலரையும் பயனடையச் செய்துள்ளன.
கிரிக்கெட் நேரடி வர்ணனையின்போது, வர்ணனையாளர்கள் தங்கள் குரல் வளத்தை ஏற்ற இறக்கத்துடன் பயன்படுத்தி, கேட்பவர்களை விளையாட்டு மைதானத்தில் இருப்பது போன்ற உணர்வை ஏற்படுத்துவர்.
படைப்பாற்றலைக் கொண்டாடும் ஊடகம்
'நேயர் விருப்பம்' போன்ற நிகழ்ச்சிகளில், நேயர்கள் தங்கள் விருப்பப் பாடல்களைக் கடிதம் மூலம் அனுப்பி பிரபலமானவர்களும் உண்டு. இவ்வாறு படைப்பாற்றலைக் கொண்டாடும் சக்தி வாய்ந்த ஊடகமாகவும் வானொலி விளங்குகிறது.
வானொலியின் கண்டுபிடிப்பு மற்றும் உலக வானொலி தினம்
இத்தாலி நாட்டைச் சேர்ந்த குக்லீல்மோ மார்க்கோனி 1895-1896 ஆம் ஆண்டு காலகட்டங்களில் வானொலியைக் கண்டுபிடித்தார். நோபல் பரிசு பெற்ற இவர், 'வானொலியின் தந்தை' என்று அழைக்கப்படுகிறார்.
வானொலியின் முக்கியத்துவத்தை வலியுறுத்தும் வகையிலும், அதன் உலகளாவிய பங்கை கௌரவிக்கும் வகையிலும் யுனெஸ்கோ அமைப்பால் பிப்ரவரி 13 ஆம் தேதி உலக வானொலி தினமாக 2011 ஆம் ஆண்டு அறிவிக்கப்பட்டு, 2012 ஆம் ஆண்டு முதல் இந்த நாள் கடைப்பிடிக்கப்பட்டு வருகிறது.
வானொலியின் தற்போதைய நிலை
இன்றும் உலக அளவில் அதிகம் ஒலிபரப்பப்படும் ஊடகங்களில் வானொலியே முதலிடத்தில் உள்ளது. தொலைக்காட்சி, அறிதிறன் பேசி, இணையதளம், சமூக ஊடகங்கள் அதிகரித்துவிட்ட போதிலும், வானொலிதான் செய்தி ஊடகத்தின் முன்னோடியாகத் திகழ்கிறது. தகவல்களை மக்களிடம் கொண்டு சேர்ப்பதில் இதன் பங்கு அளவிட முடியாதது.
தொழில்நுட்ப வளர்ச்சியால் பல்வேறு தகவல் தொடர்பு சாதனங்கள் வந்ததால் வானொலியின் பயன்பாடு குறைந்ததாகக் கூறப்பட்டாலும், மனிதனின் வாழ்வில் மறக்க முடியாத, பிரிக்க முடியாத ஓர் உறவாகவே வானொலி விளங்குகிறது. பண்பலை ஒலிபரப்புகள், இணையதள வானொலி என காலத்துக்கேற்பத் தன்னை உருமாற்றிக் கொண்டு, தனது செயல்பாட்டைத் தொடர்கிறது. இன்றும் தொலைக்க முடியாத வகையில் நிலைத்து நிற்கக் கூடிய சக்தியாக வானொலி திகழ்கிறது.
0 Comments