அரசு-மக்கள் இணைவது எப்படி?

குடிமக்கள் தயாரிப்பு: ஒரு தேசத்தின் உண்மையான அடித்தளம்

ஒரு நாட்டின் சமூக, அரசியல், பொருளாதாரச் செயல்பாடுகளின் வடிவமைப்பு, அந்த நாட்டு அரசு தன் குடிமக்களை எப்படிக் காண்கிறது, எந்த மனப்பான்மையுடன் அவர்களை நடத்துகிறது, மற்றும் குடிமக்கள் தங்களைத் தாங்களே எப்படிப் பார்த்துக் கொள்கிறார்கள் என்பதைப் பொறுத்தே அமைகிறது. குடிமக்களின் உழைப்பு இல்லாமல் எந்த ஒரு தேசமும் நிலையான முன்னேற்றம் கண்டதாக வரலாறு இல்லை. எனவே, ஓர் அரசாங்கம் அதன் குடிமக்களை வெறும் வளங்களாகப் பார்க்காமல், குழந்தைகளைத் தாய் பராமரிப்பது போல், பாசத்துடனும் அக்கறையுடனும் அணுகி, அவர்களைத் தயார் செய்ய வேண்டும்.

அரசின் கடமை: தயார் செய்தல், நிதியளித்தல், நிறுவனமயமாக்கல்

அரசானது, மக்களின் மேம்பாட்டிற்காகத் தேவையான சட்டங்களையும், கொள்கைகளையும் உருவாக்குவதுடன் மட்டும் நின்றுவிடக் கூடாது. மக்களின் செயல்பாடுகளுக்கு ஆதரவாக, மக்கள் நிறுவனங்களையும், அமைப்புகளையும் உருவாக்கி, அவற்றின் மூலம் மக்களின் பொருளாதாரச் செயல்பாடுகளுக்குத் தேவையான நிதியையும் ஏற்பாடு செய்து தர வேண்டும்.

ஆனால், பொருளாதார மேம்பாடு என்பது இலவசங்களால் வருவதில்லை. மக்களுக்கு நேரடியாக ஒரு தொகையை வழங்கும் இலவசங்கள், தற்காலிகமான நிவாரணத்தை மட்டுமே தரும்; அவை ஒருபோதும் நிலையான பொருளாதார மேம்பாட்டைக் கொண்டுவர முடியாது. உண்மையான பொருளாதார மேம்பாடு வருவது, மக்களின் குடும்ப மேம்பாட்டுத் திட்டங்களுக்குத் தேவையான நிதியைத் திட்டமிட்டுத் தரும்போதுதான். ஒரு குடும்பம் மேம்பாடு அடைய வேண்டுமானால், அதற்குத் துல்லியமான பொருளாதாரத் திட்டம் இருக்க வேண்டும். இத்தகைய திட்டங்களுக்கு நிதியுதவி அளிக்கவே, நிதியங்களும் அமைப்புகளும் தேவைப்படுகின்றன. இவைதான் உண்மையான 'மக்கள் மேம்பாட்டுச் செயல்பாடுகள்' ஆகும்.

குடிமக்களை மேம்பாட்டுக்குத் தயார் செய்தல்

இந்த மேம்பாட்டு நிலைக்கு மக்களைக் கொண்டுவர, முதலில் அவர்களுக்குச் சரியான வழிகாட்டுதல் தேவை. மக்களை மேம்பாட்டுக்கு ஆசைப்பட வைத்தல் மிக அவசியம். ஒவ்வொரு குடும்பமும் தேவையான அடிப்படை வசதிகளைப் பெற்று, வளமான, மதிக்கத்தக்க வாழ்க்கையை வாழ வேண்டும் என்ற உத்வேகத்தைத் தூண்டி, அந்த இலக்கை நோக்கி அவர்களைக் கொண்டுவந்து நிறுத்த வேண்டும்.

இந்த ஆசைகள் நிறைவேற, மக்களுக்குத் திறன், ஆற்றல், அறிவு ஆகியவற்றை வளர்க்கும் நிறுவனங்களை அரசு நிறுவ வேண்டும். அரசு உருவாக்கும் இந்த அமைப்புகளையும், நிறுவனங்களையும் குடிமக்கள் தங்கள் சொந்த நிறுவனங்களாக மாற்றிக்கொண்டு, அவற்றைத் தங்களின் மேம்பாட்டுக்காகப் பயன்படுத்தும் நிலைக்கு அவர்களை உயர்த்த வேண்டும். இந்த நிலை, குடிமக்களுக்குத் தன்னெழுச்சியாக வருவதில்லை; அதற்கு ஒரு முறையான குடிமக்கள் தயாரிப்பு அவசியம்.

குடிமக்கள் தயாரிப்பின் முதல் நிலை: அரசின் மீதான நம்பிக்கை

குடிமக்கள் தயாரிப்பின் முதல் மற்றும் மிக முக்கியமான நிலை, அவர்கள் அரசின் மீது முழு நம்பிக்கை வைப்பதுதான். "என் குடும்பத்தையும் என்னையும் என் அரசு பாதுகாக்கும், மேம்படுத்தும்; அதற்கு நான் உழைக்கத் தயாராக இருக்கிறேன்" என்ற ஆழமான மனப்பக்குவத்துக்கு குடிமக்கள் வர வேண்டும். இத்தகைய நம்பிக்கைக்குரிய சிந்தனைச் சூழலை உருவாக்குவது ஓர் அரசின் அடிப்படைப் பணியாகும்.

குடிமக்கள் முறையாகத் தயார் செய்யப்பட்டுவிட்டால், எந்த ஒரு சூழ்நிலையிலும் மக்களை அரசு ஒரு பயனாளியாகவோ (Beneficiary) அல்லது மனுதாரராகவோ (Applicant) பார்க்காது. அரசு அதிகாரிகள் தங்கள் முன் வந்து நிற்கும் குடிமக்களை, "இவர்களுக்காகத்தான் இந்த இடத்தில் நான் பணி செய்ய நியமிக்கப்பட்டுள்ளேன்; இவர்களுக்கு வழிகாட்டுவது என் பொறுப்பு" என்று எண்ணி, அவர்களை மரியாதையுடன் நடத்துவார்கள். இவ்வாறு அதிகாரிகள் மரியாதையுடன் நடத்தும்போது, குடிமக்கள் தங்கள் அரசின் மீது நம்பிக்கை வைப்பதுடன், தாங்களும் தன்னம்பிக்கை பெறுவார்கள்.

புதிய உளவியலுக்கான தேவை: அரசுக்கும் மக்களுக்கும் மாற்றம்

இந்த நிலையை ஒரு நாடு அடைய, அரசுப் பணியாளர்களுக்கும் மக்களுக்கும் ஒரு புதிய உளவியலை உருவாக்க வேண்டும். சுதந்திர நாட்டில், அரசானது தன்னைச் சுதந்திர நாட்டுக்கானதாக மாற்றிக்கொள்ள, ஆளுகை மற்றும் நிர்வாகக் கட்டமைப்புகளைப் புனரமைத்துச் சீர்திருத்த வேண்டும். மக்களை அடிமை மனநிலையில் இருந்து குடிமக்கள் மனநிலைக்கு மாற்ற வேண்டும்.

அதேபோல், அரசுப் பணியாளர்கள், நிர்வாகத்தையும் உயர் அதிகாரிகளையும் எஜமானர்களாகப் பார்த்துப் பணி செய்வதை விடுத்து, "மக்களுக்குப் பொறுப்புடன் பணி செய்வதுதான் என் பணி, சட்டத்தைச் சரியாகச் செயல்படுத்துவதுதான் என் பொறுப்பு" என்று அச்சமற்று, மக்கள் மீது நம்பிக்கை வைத்து, நாட்டின் மீது பற்றுக்கொண்டு செயல்படும் மனநிலைக்கு மாற வேண்டும். மக்களும், அரசும் இவ்வாறு தயாராக்கப்படும்போதுதான், அரசு இயந்திரம் ஒளிவுமறைவற்று வெளிப்படைத்தன்மையுடன் செயல்படும் தன்மையுடையதாக மாறிவிடும்.

இந்த நிலையில், அரசை மக்களால் எளிதாகப் புரிந்துகொள்ள முடியும். அரசு அதிகாரிகளால் தவறுகள் செய்ய இயலாது. அவர்கள் தன்மானம் மிக்கவர்களாகச் செயல்படுவார்கள், தங்கள் பணியில் ஒரு பெருமிதம் அடைவார்கள். மக்களும் தாங்கள் ஏழையாக இருந்தாலும், மரியாதைக்குரிய வாழ்வை வாழ்வதில் பெருமிதம் கொள்வார்கள்.

சவால்களும் சாத்தியக்கூறுகளும்

இந்த இலக்கை அடைய, அரசும் மக்களும் ஒரு பெரிய கனவை மனதில் வைத்து, கடுமையாகச் செயல்பட்டாலன்றி, ஏழைகள் அதிக எண்ணிக்கையில் வறுமையிலும், எல்லை இல்லாத ஏற்றத்தாழ்வுகளுடனும் வாழும் சூழலில், இத்தகைய மாற்றத்திற்கான சாத்தியக்கூறு மிகவும் குறைவு என்பதே உலக அளவில் நிரூபிக்கப்பட்ட உண்மை.

இந்தச் சூழலை ஒரு நாட்டில் உருவாக்க இரண்டு சாத்தியக்கூறுகள் உள்ளன:

1. அசுர பலத்தால் உழைக்க வைத்தல்: ஓர் அரசு தன் அசுர பலத்தால், தான் சொல்வது மக்களுக்கு நன்மை பயக்கும் என்று மக்களை நம்பவைத்து, அவர்களைக் கடுமையாக உழைக்க வைக்க வேண்டும். ஆனால், இந்த வழியில், மக்களாட்சியின் பெரும்பாலான அடிப்படைக் கூறுகளை இழக்க நேரிடும். (உதாரணம்: சீனா, சிங்கப்பூர் - நெறிமுறைப்படுத்தப்பட்ட மக்களாட்சி)
2. நம்பிக்கையின் மூலம் கைகோர்த்தல்: அரசு தன் கரங்களுடன் குடிமக்களின் கரங்களைக் கோக்க, குடிமக்களுக்கு அரசின் மீது நம்பிக்கையை உருவாக்க வேண்டும். அதற்கான அரசுக் கட்டமைப்புகளை மக்கள் வாழும் இடங்கள்வரை உருவாக்கி, மக்களை மேம்பாட்டுச் செயல்பாடுகளுக்குள் கொண்டுவர வேண்டும்.

இரண்டாவது நிலை வெற்றிபெற, அரசின் தலைமைப் பதவிகளில் இருப்போரும், நிர்வாகத்தில் இருப்போரும் நாட்டின் மீது பற்று வைத்து, மக்களின் மீது பற்று வைத்து, நேர்மையாக நடந்தால் மட்டுமே வாய்ப்பு சாத்தியமாகும். அவர்கள் நேர்மையுடன் செயல்பட்டாலும், மக்களின் மீது நம்பிக்கையும், அவர்களை மதித்து நடத்தும் மனநிலையும் இருக்க வேண்டும்.

மேலும், மக்களுக்கு இலவசங்கள் தருவதற்குப் பதிலாக, அவர்களின் குடும்ப வருமானத்தைப் பெருக்கத் தேவையான வழிமுறைகளை, உயர்நிலையில் இருந்து சிந்தித்துத் திணிக்காமல், மக்களிடம் இருக்கும் அறிவு, திறன், ஆற்றலின் அடிப்படையில், மக்களின் திட்டங்களில் செயல்படக் கொள்கையும் நிதி ஒதுக்கீடும் அந்த இடத்தில் நடைபெற வேண்டும். இது ஒட்டுமொத்த அதிகாரப் பகிர்வின் மூலம் நடைபெற்று, அந்த நாடு உயரும். (உதாரணம்: ஸ்விட்சர்லாந்து)

இந்தியாவில் நிலவும் எதிர்மறைச் சூழல்

இந்தியா, மேம்பாட்டுக் கோட்பாட்டுக்கு நேர் எதிர்மறையாகச் செயல்பட்டுக் கொண்டிருக்கிறது. அரசுக் கட்டமைப்புகள் மக்களுக்கு வெகு தொலைவில் இருக்கின்றன. மக்களை அந்நியப்படுத்தி, அவர்களைத் தொலைவில் வைத்துக்கொள்கிறது. மக்களுக்குத் தேவை இருக்கிறதோ இல்லையோ, குடும்ப வருமானத்தைப் பெருக்குவதைவிட, ஏதேனும் ஒரு பொருளாதாரச் சலுகையைக் கொடுத்துக்கொண்டே இருக்கிறது. மக்களும் பயனாளியாகவும், மனுதாரராகவும் இருக்கப் பழகி, அதிலேயே சுகம் கண்டுகொண்டுவிட்டனர்.

அரசைப் பிடிக்கத் தெரிந்தவர்களுக்கு அரசு வேலை செய்கிறது. பதவிகளைப் பிடித்தவர்களுக்கும், திட்டங்களைப் பிடித்தவர்களுக்கும் மட்டுமே மேம்பாடு சாத்தியமானது. இந்தியாவில் ஏழைகளுக்கு இது சாத்தியப்படவில்லை. காரணம், ஏழைகளுக்கு அரசுடன் இணையத் தெரியவில்லை. அத்துடன், அவர்களுக்கு அரசு ஆளுகை, நிர்வாகம் குறித்துத் தெரியாத நிலையில், பயனாளியாகவும்-மனுதாரராகவும் இருக்கவே விரும்புகின்றனர். இதன் விளைவுதான், மக்களுக்குச் சேரவேண்டியது சேராமல் ஊழலாக, ஒரு குறிப்பிட்ட வர்க்கங்களுக்குப் பலன்கள் கிடைத்துக் கொண்டிருக்கின்றன.

மக்களாட்சியில் இருக்கும் மாபெரும் ஆயுதம் வாக்குரிமை-வாக்குச் சுதந்திரம். அதையும் ஏழை மக்களின் ஏழ்மையையும், அறியாமையையும் பயன்படுத்தி, அந்தச் சுதந்திரத்தையும் உரிமையையும் விலை கொடுத்துப் பறித்து, மக்களாட்சியை மாண்பற்றதாக வைத்திருப்பது இந்திய நாட்டுக்குத் தலைகுனிவான செயல்.

மாற்றத்துக்கான தீர்வு: வழிகாட்டும் கூட்டுத் தலைமை

இந்தச் சூழலை வென்றெடுப்பது எப்படி என்பதே இன்று பெரும் மாற்றத்தை விரும்பும் அனைவரின் கேள்வியாக உள்ளது. இதற்குத் தேவை: மக்களுடன் இணைந்து செயல்பட, அவர்களுக்கு வழிகாட்டக்கூடிய ஒரு மாற்றுத் தலைமை, ஒவ்வொரு கிராமத்துக்கும், ஒவ்வொரு நகர வார்டுக்கும் தேவை.

அந்தத் தலைமை, மக்களை மேய்க்கும் தலைமை அல்ல; மக்களுக்கு வழிகாட்டும் தலைமை.
அது ஒற்றைத் தலைமை அல்ல; அது ஒரு கூட்டுத் தலைமை.
அந்தத் தலைமை அதிகாரத் தலைமை அல்ல; அது பொறுப்புக்கான ஒரு கூட்டுத் தலைமை.

நகரமோ கிராமமோ, அந்தந்தப் பகுதிகளை மேம்படுத்த "நாங்கள் பொறுப்பெடுத்துக்கொள்கிறோம்" என்று மக்கள் தயாராகி, ஒன்றிணைந்து மேம்பாட்டுப் பணிகளில் இணைய வேண்டும். அது, குப்பை மேலாண்மையாக இருக்கலாம், கிராமத்தைத் தூய்மை செய்வதாக இருக்கலாம், பள்ளிக்கூடத்தைக் கல்விக் கோயிலாக மாற்றுவதாக இருக்கலாம், இல்லங்களை செம்மை இல்லங்களாக மாற்றுவதாக இருக்கலாம். இதுபோன்று எண்ணற்ற, செலவில்லாத செயல்பாடுகள் செய்வதற்கு மக்களைத் தயார் செய்யும்போது, அங்கே கட்சி, ஜாதி ஆகியவற்றை கடந்து, ஒரு மிகப் பெரிய மக்கள் சக்தி ஒருங்கிணைந்து உருவாகும். அந்தச் சக்திதான் மகத்தான மக்கள் சக்தி. அதை நோக்கிச் செயல்பட நாம் தயாராக வேண்டும்.